(ត្បូងឃ្មុំ)៖ ម្ចាស់អាជីវកម្មអនាម័យនៅស្រុកមេមត់ អ្នកស្រី ភួង បូផា នៅថ្ងៃទី០៧ ខែមីនា ឆ្នាំ២០១៩នេះ បានសំណូមពរឲ្យលោក ជាម ច័ន្ទសោភ័ណ្ឌ អភិបាលខេត្តត្បូងឃ្មុំ ជួយរកយុត្តិធម៌ ខណៈលោក ចេង ប៊ុណ្ណារ៉ា អភិបាលស្រុកមេមត់ បានដកហូតអាជីវកម្មអនាម័យរបស់គាត់ ដោយអយុត្តិធម៌។
អ្នកស្រី ភួង បូផា បានឲ្យដឹងថា គាត់បានទទួលសិទ្ធិធ្វើអាជីវកម្មអនាម័យ នៅស្រុកមេមត់ តាំងពីឆ្នាំ២០១២មកម្ល៉េះ ប៉ុន្តែរហូតមកដល់ខែមករា ឆ្នាំ២០១៩ ស្រាប់តែមានម្ចាស់អាជីវកម្មអនាម័យថ្មី បានធ្វើការប្រមូលសំរាមនៅទីប្រជុំជនស្រុកមេមត់ដែរ ខណៈអ្នកស្រីកំពុងតែទទួលសិទ្ធិបន្ត ធ្វើអាជីវកម្មពីប្រធានមន្ទីរបរិស្ថាន ខេត្តត្បូងឃ្មុំ។
អ្នកស្រី ភួង បូផា បានបន្តថា អ្នកស្រីមិនបានដឹងថា តើលោក ចេង ប៊ុណ្ណារ៉ា អភិបាលស្រុកមេមត់ បានដកហូតអាជីវកម្មពីអ្នកស្រី ក្នុងកំហុសអ្វីនោះទេ? ស្រាប់តែនៅដើមឆ្នាំ២០១៩នេះ គាត់បានប្រគល់សិទ្ធិឲ្យម្ចាស់អាជីវកម្មថ្មី ធ្វើការប្រមូលសំរាមនៅក្នុងស្រុកមេមត់ទៅវិញ។
ទាក់ទិនទៅនឹងករណីដកអាជីវកម្មអនាម័យពីអ្នកស្រី ភួង បូផានេះ, លោក ចេង ប៊ុណ្ណារ៉ា អភិបាលស្រុកមេមត់ បានឲ្យដឹងថា មូលហេតុដែលនាំទៅដល់ការ ដកអាជីវកម្មនេះ គឺបណ្ដាលមកពីម្ចាស់អាជីវកម្មចាស់ មិនបានអនុវត្តទៅតាមកិច្ចសន្យា ពោលការប្រមូលសំរាមមិនបានទាន់ពេលវេលា ធ្វើឲ្យប៉ះពាល់ដល់បរិស្ថាន នៃទីប្រជុំជនស្រុកមេមត់ ដូច្នេះទើបលោកដកអាជីវកម្មពីអ្នកស្រី ភួង បូផា ប្រគល់ទៅឲ្យអ្នកផ្សេងធ្វើអាជីវកម្មវិញ។
អ្នកស្រី ភួង បូផា បានបន្ថែមថា ការដកហូតអាជីវកម្មពីអ្នកស្រីនេះ គឺលោកអភិបាលស្រុកមេមត់ មិនដែលធ្វើលិខិតជូនដំណឹង ឬក៏ណែនាំម្ដងណាឡើយ ស្រាប់តែនៅដើមឆ្នាំ២០១៩នេះ ដកហូតអាជីវកម្មពីអ្នកស្រីដោយពុំមានមូលហេតុច្បាស់លាស់។ បើតាមអ្នកស្រី ការធ្វើអាជីវកម្មតាំងពីឆ្នាំ២០១២ គឺពិតប្រាកដពេល នោះផ្លូវមានការលំបាក ហើយកាលណោះអ្នកស្រីប្រើរថយន្តកែច្នៃ ដើម្បីធ្វើការប្រមូលសំរាម ប៉ុន្តែបច្ចុប្បន្នផ្លូវនៅទីប្រជុំជនស្រុកមេមត់ស្រួល ហើយថ្មីៗអ្នកស្រីបានទៅកម្មង់ទិញរថយន្តប្រមូលសំរាមថ្មី ដើម្បីយកមកប្រើប្រាស់ ដោយមិនទាន់បានយករថយន្តមកផង ក៏ស្រាប់តែកើតបញ្ហានេះតែម្តង។
ដោយឡែកទាក់ទងទៅនឹងករណីខាងលើនេះ លោក ឡុង ធាម អភិបាលរងខេត្តត្បូងឃ្មុំ បានលើកឡើងថា ករណីនេះខាងអាជ្ញាធរខេត្ត មិនទាន់បានទទួលរបាយការណ៍ ពីរដ្ឋបាលស្រុកមេមត់នៅឡើយទេ៕
