(ភ្នំពេញ)៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានចុះហត្ថលេខាលើអនុស្សារណៈនៃកិច្ចព្រមព្រៀង (MoU) ជាមួយអង្គការចំនួន១១ព្រមៗគ្នា ក្នុងទំហំទឹកប្រាក់ជាង១៥លានដុល្លារ ប្រើប្រាស់ក្នុងរយៈពេល៣ឆ្នាំ ពីឆ្នាំ២០១៩ ដល់ឆ្នាំ២០២២ ដើម្បីជួយក្នុងវិស័យសង្គមកិច្ច នៅទូទាំងប្រទេសកម្ពុជា។ ពិធីចុះហត្ថលេខាលើអនុស្សារណៈនៃកិច្ចព្រមព្រៀង (MoU)នាពេលនេះ បានរៀបចំឡើងជាផ្លូវការ នាថ្ងៃទី៧ ខែមីនា ឆ្នាំ២០១៩ នាទីស្តីការក្រសួងសង្គមកិច្ច។ ការចុះ MoUនេះ គឺធ្វើឡើងក្នុងគោលបំណង ជួយលើកកម្ពស់លើកកម្ពស់វិស័យសង្គមកិច្ចនៅកម្ពុជា ជាពិសេសផ្តោតសំខាន់លើការជួយទៅដល់កុមាររងគ្រោះ ងាយរងគ្រោះ និងកុមារខ្វះខាត និងក្រីក្រ នៅកម្ពុជា។
នៅក្នុងពិធីចុះហត្ថលេខាលើ អនុស្សារណៈនៃកិច្ចព្រមព្រៀងខាងលើ មានការអញ្ជើញចូលរួមពី លោក តូច ចាន់នី អគ្គនាយក នៃអគ្គនាយកដ្ឋានបច្ចេកទេស ក្រសួងសង្គមកិច្ច អតីតយុទ្ធជន និងយុវនីតិសម្បទា, ថ្នាក់ដឹកនាំអង្គការទាំង១១ រួមនឹងមន្រ្តីរាជការពាក់ព័ន្ធ របស់ក្រសួងសង្គមកិច្ចជាច្រើនរូបទៀតចូលរួមផងដែរ។
អង្គការទាំង១១នោះរួមមាន៖ ១. អង្គការបម្រើសេវាសង្គមដើមឈើសប្បាយ ២. អង្គការក្រុមជំនុំដំណឹងល្អពោរពេញកម្ពុជា ៣. អង្គការអភិវឌ្ឍន៍កុមារ និងសហគមន៍ក្រីក្រ ៤. អង្គការជួយកុមារ ៥. អង្គការសុវណ្ណកុមារកម្ពុជា ៦. អង្គការមូលនិធិកុមារកម្ពុជា ៧. អង្គការ Kinderhlife- Kanbodschae.V ៨. អង្គការបែងចែកមូលនិធិ ៩. អង្គកាទាំងអស់គ្នាដើម្បីកុមារ ១០. អង្គការហ៊ីសឆាលអន្តរជាតិកម្ពុជា និងអង្គការមេត្តាករុណា។
លោក តូច ចាន់នី អគ្គនាយក នៃអគ្គនាយកដ្ឋានបច្ចេកទេស ក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា ការចូលរួមសហការរបស់អង្គការដៃគូ ពិតជាសំខាន់ណាស់ ក្នុងការលើកកម្ពស់វិស័យសង្គមកិច្ចនៅកម្ពុជា។
ជាមួយគ្នានោះ លោក តូច ចាន់នី បានស្នើឲ្យក្រុមការងារក្រសួង និងអង្គការ ដែលសហការ នាពេលនេះរួមគ្នា ដើម្បីធ្វើការងារ ដោយយកចិត្តទុកដាក់ឲ្យខ្លាំងបំផុត តាមដែលអាចធ្វើបាន។ សម្រាប់ក្រសួងសង្គមកិច្ចវិញ នៅតែស្វាគមន៍ជានិច្ច ជាមួយ ដៃគូពាក់ព័ន្ធ និងអង្គការនានា ដើម្បីជួយដល់ជនរងគ្រោះនៅកម្ពុជា ឲ្យមានជីវភាព និងជីវិតរស់នៅ ល្អប្រសើរថែមមួយកម្រិតទៀត។
គួរបញ្ជាក់ថា អង្គការទាំង១១ ដែលបានចុះហត្ថលេខា លើកិច្ចព្រមព្រៀង ជាមួយក្រសួងសង្គមកិច្ច សុទ្ធសឹងតែជាអង្គការ ដែលបានចូលរួមចំណែក និងធ្វើសកម្មភាពជួយដល់កុមារ និងយុវជនក្រីក្រនៅកម្ពុជា។ គោលបំណងសំខាន់របស់អង្គការទាំង៣ ដែលបានសហការជាមួយក្រសួងសង្គមកិច្ចនាពេលនេះ គឺដើម្បីលើកកម្ពស់ការរស់នៅរបស់កុមារនៅកម្ពុជា៕
