(ត្បូងឃ្មុំ)៖ រដ្ឋបាលខេត្តប៉ៃលិន នៅថ្ងៃទី៤ ខែកញ្ញា ឆ្នាំ២០១៧នេះ បានចេញញត្តិគាំទ្រយ៉ាងពេញទំហឹងទៅលើចំណាត់ការរបស់ស្ថាប័នសមត្ថកិច្ច ដែលចាប់ខ្លួនបុគ្គល កឹម សុខា ដែលបានឃុបឃិតជាមួយបក្ខពួក និងបរទេសមួយចំនួន ជាសម្ងាត់ចង់ផ្ដួលរំលំរាជរដ្ឋាភិបាលស្របច្បាប់ដឹកនាំដោយ សម្ដេចតេជោ ហ៊ុន សែន ដែលជាទង្វើក្បត់ជាតិ ធ្វើឲ្យប៉ះពាល់ដល់សន្ដិសុខ សណ្ដាប់ធ្នាប់ អធិបតេយ្យ និងឯករាជ្យភាព របស់ប្រទេសកម្ពុជា។

រដ្ឋបាលខេត្តប៉ៃលិន សូមទទួចដល់ស្ថាប័នមានសមត្ថកិច្ចគ្រប់ជាន់ថ្នាក់ ជាពិសេសស្ថាប័នតុលាការ សូមមេត្តាផ្ដន្ទាទោសឱ្យបានធ្ងន់ធ្ងរ និងឱ្យបានសាកសមបំផុតចំពោះអំពើក្បត់ជាតិ ដែលមិនអាចអត់ឱនឱ្យបាននេះ។

រដ្ឋបាលខេត្តប៉ៃលិន សូមថ្កោលទោសយ៉ាងដាច់អហង្កា ចំពោះលោក កឹម សុខា ប្រាធានគណបក្សសង្គ្រោះជាតិ នូវទង្វើរក្បត់មួយនេះក្បត់ជាតិនេះ ដែលមិនអាចអត់ឱនឱ្យបានទេ បន្ទាប់ពីវីដេអូក្លីប ដែលត្រូវបានផ្សព្វផ្សាយដោយបណ្តាញ CBN (Cambodia Broadcasting Network) ដែលមានទីតាំងនៅប្រទេសអូស្ត្រាលី ដែលបានបង្ហោះឱ្យឃើញច្បាស់ពីផែនការសម្ងាត់ នៃការចង់ផ្តួលរំលំរាជរដ្ឋាភិបាលស្រប់ច្បាប់ ដោយឃុបឃិតជាមួយបរទេស។

សូមបញ្ជាក់ថា លោក កឹម សុខា ត្រូវបានកម្លាំងសមត្ថកិច្ចចាប់ខ្លួននៅវេលាម៉ោងប្រមាណ១២៖៣៥នាទីរំលងអាធ្រាត្រឈានចូលថ្ងៃទី៣ ខែកញ្ញា ឆ្នាំ២០១៧ នៅគេហដ្ឋានរបស់លោកស្ថិតនៅក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ក្រោយពីមានការបែកធ្លាយវីដេអូ ក្បត់ជាតិបែបនេះ។

រាជរដ្ឋាភិបាលកម្ពុជា បានចេញសេចក្តីថ្លែងការណ៍ភ្លាមៗ ក្រោយការចាប់ខ្លួននេះ ដោយបានចាត់ទុកកាយវិការ និងសកម្មភាពរបស់មេបក្សប្រឆាំង តាមរយៈការនិយាយដោយផ្ទាល់មាត់នៅក្នុងវីដេអូនេះថា ជាអំពើក្បត់ជាតិ ដែលមានចែង និងផ្តន្ទាទោសតាមបញ្ញត្តិនៃមាត្រា៤៤៣ (បទសន្ទិដ្ឋិភាពជាមួយបរទេស) ក្នុងផ្នែកទី១ ស្តីពីអំពើក្បត់ជាតិ និងអំពើចារកម្ម ជំពូកទី២ ស្តីពីការប៉ះពាល់សន្តិសុខនៃរដ្ឋ មាតិកាទី១ ស្តីពីអំពើក្បត់ជាតិ និងអំពើចារកម្មជំពូកទី២ ស្តីពីការប៉ះពាល់ដល់សន្តិសុខនៃរដ្ឋ មាតិកាទី១ ស្តីពីការប៉ះពាល់ដល់ស្ថាប័នចម្បងរបស់រដ្ឋ គន្ថីទី៤ ស្តីពីបទល្មើសប្រឆាំងនឹងជាតិ នៃក្រមព្រហ្មទណ្ឌរបស់ប្រទេសកម្ពុជា។

តាមរយៈសេចក្តីថ្លែងការណ៍នេះ រាជរដ្ឋាភិបាល បានអំពាវនាវដល់ប្រជាពលរដ្ឋរក្សាភាពស្ងប់ស្ងាត់ និងទុកករណីនេះជូនតុលាការ ដើម្បីចាត់ការបន្ត៕