(ភ្នំពេញ)៖ ពិធីបុណ្យហាជ្ជ គឺជាសក្ការៈបូជាមួយនៅក្នុងចំណោមសក្ការៈបូជាទំាង៥ នៃសាសានាឥស្លាមទៅចំពោះអល់ឡោះជាម្ចាស់ ដែលទ្រង់បានបង្គាប់បញ្ជា មកលើជនមូស្លីមគ្រប់រូប។ សក្ការៈបូជាទំាង៥នៃសាសនាឥស្លាម រួមមានការទទួលស្គាល់អល់ឡោះជាម្ចាស់ និងមហំាម៉ាត់ ជាអ្នកនំាសាររបស់ព្រះ (Shahadah), ការថ្វាយបង្គំមួយថ្ងៃមួយយប់ប្រំាដង (Salat), ការផ្ដល់វិភាគទាន (Zakat) ការតមអាហារក្នុងខែរ៉ាម៉ាដន (Sawm) និងពិធីបុណ្យហាជ ឬហាជីនេះតែម្ដង។

ពិធីបុណ្យហាជ (Hajj) ត្រូវប្រារព្ធនៅឯទីសក្ការៈបូជា ក្នុងទីក្រុងម៉េកកា (Mecca) នៃព្រះរាជាណាចក្រ អារ៉ាប៊ីសាអូឌីត ជារៀងរាល់ឆ្នាំ។ ពិធីបុណ្យនេះចាប់ផ្ដើមឡើងនៅថ្ងៃទី៨ ខែស៊ុលហិច ជាស់ ឆ្នាំ១៤៣៨ រហូតដល់ថ្ងៃទី១៣ ក្នុងខែដដែលនេះ (គិតតាមកាលបរិច្ឆេទ មហាមំាម៉ាត់ សករាជ ឬចន្ទគតិ) ហើយបើគិតជាគ្រឹស្តសករាជគឺត្រូវចាប់ផ្ដើមធ្វើឡើងចាប់ពីថ្ងៃពុធ ទី៣០ ខែសីហានេះ រហូតដល់ថ្ងៃចន្ទ ទី០៤ ខែកញ្ញា ឆ្នំា២០១៧។

ប៉ុន្តែអ្នកកាន់សាសនាឥស្លាមនៅកម្ពុជា ចាប់ផ្តើមនៅថ្ងៃទី០១ ខែកញ្ញា។ ពិធីបុណ្យហាជជាកាតព្វកិច្ចចំពោះជនមូស្លីមដែល មានទ្រព្យសម្បត្តិ សមត្ថភាព និងលទ្ធភាព ក៏ប៉ុន្តែក្នុងពេលជាមួយគ្នា គេក៏ត្រូវគិតផងដែរពីជីវភាពគ្រួសាររបស់ខ្លួន ជាឧទាហរណ៍ បើសិនជាយើងខ្វះខាតលុយកាក់ ឬមានត្រឹមតែលទ្ធភាព សម្រាប់ធ្វើដំណើរនោះ កាតព្វកិច្ចមួយនេះមិនត្រូវតម្រូវឱ្យធ្វើនោះទេ ឬត្រូវរង់ចំានៅពេលក្រោយដែលយើងមានលទ្ធភាព។ បើនិយាយអំពីប្រវត្តិពិធីបុណ្យហាជ មានតំាងតែពីសម័យ អ្នកនំាសាររបស់ព្រះជាម្ចាស់ឈ្មោះ អាដំា មកម្ល៉េះរហូតដល់ មហំាម៉ាត់ ដែលជាអ្នកនំាសារចុងក្រោយ ហើយគោល បំណងនៃពិធីបុណ្យនេះគឺបង្ហាញពីជំនឿទៅចំពោះអល់ឡោះក៏ដូចជា ភាពជាបងប្អូន មិនរើសអើង របស់ជនមូស្លីមក្នុងពិភពលោក ដែលមានវប្បធម៌ ភាសា ពណ៌សម្បុរខុសៗគ្នាមកជួបជុំគ្នា តាមការបង្គាប់បញ្ជាពីអល់ឡោះជាម្ចាស់។

ដោយឡែកនៅក្នុងឆ្នាំនេះ មានប្រជាជនជាង ២លាននាក់ មកពីជុំវិញពិភពលោក ក្នុងរួមមានទាំងបងប្អូនខ្មែរឥស្លាមចំនួន ៦៤៧​នាក់ បានអញ្ជើញទៅចូលរួមពិធីបុណ្យនេះ ដោយក្នុងនោះទៀតសោត​ មនុស្ស២០នាក់ទទួលបានការឧបត្ថម្ភពីព្រះចៅសាល់ម៉ាន ពិនអាប់ឌុលអាហ្ស៊ីស អាឡាស៊ូអ៊ូឌ ព្រះមហាក្សត្រ នៃព្រះរាជាណាចក្រអារ៉ាប៊ីសាអ៊ូឌីត, ០៥នាក់ទទួលបានការឧបត្ថម្ភពីសមាគមសប្បុរសធម៌ឌូបៃ នៃប្រទេសអារ៉ាប់រួម អេមីរ៉ាត តាមរយៈ​សមាគមគ្រូពេទ្យឥស្លាមកម្ពុជា, ០៥នាក់ ទទួលបានការឧបត្ថម្ភពីអង្គការអន្តរជាតិមួយ របស់ប្រទេសម៉ាឡេស៊ី និងបងប្អូនខ្មែរឥស្លាម នៅខេត្តពោធិ៍សាត់ ចំនួន០២នាក់ទៀត ឧបត្ថម្ភដោយ លោក កែវ រតនៈ អគ្គនាយកអគ្គីសនីកម្ពុជា ហើយ០២នាក់ផ្សេងទៀត អវត្តមានមិនបានអញ្ជើញទៅដោយ សារបញ្ហាសុខភាព។
ចំណែកឯក្រៅពីកម្ពុជា បើតាមសារព័ត៌មាន Al Jazeera មានប្រទេសចំនួន១០ មានប្រជាជនច្រើនជាងគេបានចូលរួមក្នុងពិធីបុណ្យហាជ្ជ មានដូចជា ឥណ្ឌូនេស៊ី (២២១,០០០នាក់), ប៉ាគីស្ថាន (១៧៩,២១០នាក់) ឥណ្ឌា (១៧០,០០០នាក់) បង់ក្លាដែស (១២៧,១៩៨នាក) និង អេហ្ស៊ីប (១០៨,០០០នាក់) ជាដើម។

គួរបញ្ជាក់ថា ថ្វីបើពិធីបុណ្យហាជ គឺជាកាតព្វកិច្ចសម្រាប់បុគ្គលជាអ្នកកាន់សាសនាឥស្លាម គ្រប់ៗរូប ប៉ុន្តែវាក៏មានករណីលើកលែងផងដែរសម្រាប់ អ្នកស្លាប់ និងចាស់ជរា ឬក៏ពិការ មាន ជំងឺរុំារ៉ៃ អាចឱ្យអ្នកដទៃធ្វើជំនួសខ្លួនបាន។ មួយវិញទៀត បុណ្យនេះជាប់កាតព្វកិច្ចលើបុគ្គលជនម្នាក់ៗ ពោលគឺមិនមែនមានន័យថា នៅពេលសមាជិកគ្រួសារណាម្នាក់ទៅធ្វើបុណ្យហាជ ហើយ សមាជិកដទៃក្នុងគ្រួសារនោះរួចខ្លួននោះទេ៕