(រ៉ង់ហ្គូន)៖ ការវាយប្រហាររបស់ក្រុមសកម្មប្រយុទ្ធ ជនជាតិដើមអ៊ីស្លាមរ៉ូហ៊ីងយ៉ា (Rohingya) ទៅលើមូលដ្ឋានរបស់កងកម្លាំងសន្តិសុខជាច្រើនកន្លែង នៅក្នុងរដ្ឋ Rakhine ភាគខាងលិចប្រទេសមីយ៉ាន់ម៉ា នាថ្ងៃសុក្រនេះ បានបណ្តាលឲ្យមនុស្សសរុប ចំនួន៧១នាក់បាត់បង់ជីវិត។ នេះបើតាមការបញ្ជាក់ពីរដ្ឋាភិបាលមីយ៉ាន់ម៉ា ដកស្រង់ដោយសារព័ត៌មាន BBC នៅយប់ថ្ងៃសុក្រ ទី២៥ ខែសីហា ឆ្នាំ២០១៧។
រដ្ឋាភិបាលមីយ៉ាន់ម៉ាបានឲ្យដឹងថា មូលដ្ឋានឈរជើងរបស់ប៉ូលិសច្រើនជាង២០ទីតាំង បានទទួលរងការវាយប្រហារ ពីសំណាក់ក្រុមសកម្មប្រយុទ្ធអ៊ីស្លាម ដែលមានគ្នាប្រមាណជា១៥០នាក់ ដែលវាគឺជាអំពើហិង្សាដ៏អាក្រក់ជាងគេបំផុត នៅរដ្ឋ Rakhine ក្នុងអំឡុងពេលជាច្រើនខែកន្លងទៅនេះ ខណៈតំបន់នេះជារឿយៗតែងតែបានជួបប្រទះការប៉ះទង្គិចគ្នា ជាច្រើនលើកច្រើនសា រវាងសហគមន៍អ៊ីស្លាមនិងពុទ្ធសាសនិក។ យោងតាមប្រភពដដែល ពលទាហានម្នាក់, មន្រ្តីអន្តោប្រវេសន៍ម្នាក់, មន្រ្តីប៉ូលិស១០នាក់, និងជនសកម្មប្រយុទ្ធចំនួន៥៩នាក់ បានស្លាប់នៅក្នុងការប្រយុទ្ធគ្នានេះ។
គួរបញ្ជាក់ថា ការវាយប្រហារខាងលើ ត្រូវបានធ្វើឡើងដោយក្រុមសកម្មប្រយុទ្ធមានឈ្មោះថា Arakan Rohingya Salvation Army ហៅកាត់ ARSA ដែលធ្លាប់បានបើកការវាយប្រហារស្រដៀងគ្នានេះ កាលពីខែតុលា ឆ្នាំ២០១៦ ទៅលើប៉ុស្តិ៍ត្រួតពិនិត្យតាមព្រំដែន ហើយបានបណ្តាលឲ្យមន្រ្តីប៉ូលិស ចំនួន០៩នាក់បាត់បង់ជីវិត៕
