(កំពង់ឆ្នាំង)៖ នៅថ្ងៃចន្ទ ១៣រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៤ ខែមីនា ឆ្នាំ២០១៩នេះ កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានប្រគល់ផ្ទះថ្មីចំនួន២ខ្នង ជាព្រះរាជអំណោយរបស់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជូនប្រជារាស្ត្រចំនួន២គ្រួសារ រស់នៅស្រុកបរិបូរណ៍ ខេត្តកំពង់ឆ្នាំង។
ផ្ទះទាំងពីរខ្នងនេះ ប្រើពេលសាងសង់អស់រយៈពេល៦០ថ្ងៃ ដែលផ្ទះនីមួយៗចំណាយថវិកា ៥.២៤៤,៥០ដុល្លារ មានទំហំ ៤m x ៦m សង់ពីថ្ម ប្រក់ហ្វីប្រូ ក្រាលការូ តតាកមុខផ្ទះស័ង្កសី និងចាក់សាបក្រោមតាកមុខផ្ទះ ៣m x ៤m ត្រូវបានប្រគល់ជូនគ្រួសារទី១ ម្ចាស់ផ្ទះឈ្មោះអ្នកស្រី ជា រ៉េន អាយុ ៣៥ឆ្នាំ ជាស្ត្រីមេម៉ាយទទួលបន្ទុកចិញ្ចឹមកូន៤នាក់ ប្រកបរបរស៊ីឈ្នួលច្រូតស្រូវឱ្យគេ និងធ្វើល្អីលក់រស់នៅភូមិកែវឡាត ឃុំពន្លៃ និងគ្រួសារទី២ ម្ចាស់ផ្ទះឈ្មោះ អ្នកស្រី អុល ធីតា អាយុ ៣២ឆ្នាំ និងស្វាមី ដែលមានកូនស្រី ២នាក់ រងគ្រោះដោយអំពើរំលោភសម្លាប់ រស់នៅភូមិថ្មី ឃុំផ្សារ។
ក្នុងឱកាសនោះ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមជាមួយលោក ឈួរ ច័ន្ទឌឿន ប្រធានកិត្តិយសសាខាកាកបាទក្រហមកម្ពុជា ខេត្តកំពង់ឆ្នាំង បានពាំនាំនូវព្រះរាជបណ្តាំ និងប្រសាសន៍ផ្ដាំផ្ញើសួរសុខទុក្ខ ក្តីនឹករលឹក និងអាណិតស្រឡាញ់ដ៏ជ្រាលជ្រៅពីសំណាក់ សម្ដេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះម្ចាស់ផ្ទះថ្មីទាំង២ខ្នង និងប្រជារាស្ត្រទាំងអស់ ព្រមទាំងសូមផ្តាំផ្ញើឲ្យយកចិត្តទុកដាក់គិតគូរលើកកម្ពស់ជីវភាពគ្រួសារ ត្រូវខិតខំប្រកបរបចិញ្ចឹមជីវិត ជាពិសេសថែទាំសុខភាពឱ្យបានល្អ មានអនាម័យក្នុងការរស់នៅ និងផឹកទឹកឆ្អិនដាំពុះជានិច្ច។
ដោយឡែកចំពោះអ្នកស្រី ជា រ៉េន មានកូន ៤នាក់នោះ ត្រូវគិតគូរបញ្ជូនកូនទៅសាលារៀន ដើម្បីអនាគតភ្លឺស្វាង មានសមត្ថភាពចិញ្ចឹមជីវិត និងលើកស្ទួយជីវភាពគ្រួសារ ហើយជាពិសេស អាជ្ញាធរមូលដ្ឋានក៏ត្រូវយកចិត្តទុកដាក់គិតគូរជួយជំរុញអាណាព្យាបាលទាំងអស់ឲ្យបញ្ជូនកូនចៅទៅសាលារៀនឱ្យបានគ្រប់ៗគ្នាដែរ។
អំណោយសម្រាប់ប្រគល់ជូនផ្ទះនីមួយៗរួមមាន៖ អង្ករ មី ត្រីខ ចាន ឆ្នាំង វែក ស្លាបព្រា ខ្ទះ កន្ទេល សាប៊ូ មុង ភួយ សារុង ក្រមា អាយឺត ចង្កៀងប្រើពន្លឺព្រះអាទិត្យ និងថវិកា ១លានរៀល។ ដោយឡែក ចាស់ៗឥតទីពឹងដែលរស់នៅជិតខាងចំនួន ២៦នាក់ ក្នុងម្នាក់ៗទទួលបាន ៖ អង្ករ មី ត្រីខ មុង ភួយ សារុង ក្រមា អាវយឺត ចង្កៀងប្រើពន្លឺព្រះអាទិត្យ និងថវិកាមួយចំនួន៕
