(ភ្នំពេញ)៖ លោក សុខ ផល រដ្ឋលេខាធិការក្រសួងមហាផ្ទៃ ទទួលបន្ទុកការងារអន្ដោប្រវេសន៍ នៅរសៀលថ្ងៃទី០៤ ខែមីនា ឆ្នាំ២០១៩នេះ បានណែនាំឲ្យថ្នាក់ដឹកនាំអគ្គនាយកដ្ឋានអន្ដោ ប្រវេសន៍ទាំងអស់ ពិសេសនៅតាមច្រកទ្វារព្រំដែន ត្រូវបង្កើនស្មារតីប្រុងប្រយ័ត្ន ដើម្បីចូលរួមអនុវត្តដីកាចាប់ខ្លួន ទណ្ឌិត សម រង្ស៊ី ក្នុងករណីបុគ្គលរូបនេះវិលត្រឡប់មកកម្ពុជាវិញនៅពេលណាមួយ។

សារជំរុញជាថ្មីរបស់លោក សុខ ផល ត្រូវបានធ្វើឡើងក្នុងឱកាសអញ្ជើញជាអធិបតី បិទសន្និបាតបូកសរុលលទ្ធផលការងារឆ្នាំ២០១៨ និងលើកទិសដៅបន្ដ ឆ្នាំ២០១៩ របស់អគ្គនាយកដ្ឋាន អន្ដោប្រវេសន៍ ​ដោយមានការចូលរួមពីថ្នាក់ដឹកនាំក្រសួង ថ្នាក់ដឹកនាំនគរបាលអន្ដោប្រវេសន៍ និងមន្ដ្រីពាក់ព័ន្ធជាច្រើនរូបទៀតផងដែរ។

លោក សុខ ផល បានថ្លែងយ៉ាងដូច្នេះថា «យើងត្រូវលើកកម្ពស់ស្មារតីប្រុងប្រយ័ត្នខ្ពស់ យើងវាយតម្លៃថា មិនមកនោះទេ ប៉ុន្ដែបើចុងក្រោយមកវិញ គឺថាផែនការទាំងអស់ត្រូវតែអនុវត្តភ្លាម។ អគ្គនាយកដ្ឋានអន្ដោប្រវេសន៍ គឺជាអង្គភាពមួយនៃសន្ដិសុខជាតិដែរ យើងត្រូវអនុវត្តដីកាណុងទៅ ហើយបន្ទាប់មកយើងបញ្ជូនទៅសមត្ថកិច្ចអនុវត្តបន្ដទៀត ទៅតាមបទបញ្ជារបស់ថ្នាក់ដឹកនាំ»។

មន្ដ្រីជាន់ខ្ពស់ក្រសួងមហាផ្ទៃរូបនេះ បានអះអាងបន្ដទៀតថា នៅតាមច្រកទ្វារអន្ដរជាតិទាំងអស់ មានតែមន្ដ្រីនគរបាលអន្ដោប្រវេសន៍ ប៉ុណ្ណោះដែលអាចចេញចូលបានដោយងាយ ដូច្នេះប្រសិនបើមានករណីចាំបាច់ណាមួយ បទបញ្ជាទាំងឡាយត្រូវតែអនុវត្តភ្លាមៗ ពិសេសលើការចាប់ខ្លួនទណ្ឌិត សម រង្ស៊ី តាមដីកានេះតែម្ដង។

ជាមួយគ្នានេះផងដែរ លោក សុខ ផល ក៏បានណែនាំដល់នគរបាលអន្ដោប្រវេសន៍ ពិសេសនៅតាមបណ្ដាស្នងការដ្ឋានរាជធានី-ខេត្ត លើការងារដកហូតឯកសាររដ្ឋបាលកម្ពុជាមិនប្រក្រតី ដែលកាន់កាប់ដោយជនបរទេស ខណៈដែលឱសាទនៃអនុក្រឹត្យរបស់រាជរដ្ឋាភិបាល លើបញ្ហានេះកាន់តែគៀកនឹងផុតកំណត់ទៅហើយនោះ។

លោកបានគូសបញ្ជាក់ថា រហូតមកដល់ពេលនេះ ការដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ប្រើប្រាស់ក្នុងកម្ពុជា ចំនួន​៣៥,០០១ឯកសារ ស្មើនឹង៨៨.៧៩% នៃផែនការ។ បានទទួលពាក្យសុំប្រកាសទទួលស្គាល់ជា ជនបរទេសអន្តោប្រវេសន្ត (ចាប់ពីអាយុ១៨ឆ្នាំឡើង) បានចំនួន ៧៥,០៨៩នាក់ ស្មើនឹង៥៩.៦៤% ក្នុងនោះ បានចេញប្រកាសទទួលស្គាល់ចំនួន២៩,១៨១ ដែលមានមនុស្ស ៤៦,៣៨១នាក់ (១៤,៤៤៩គ្រួសារ)។

ដោយឡែក ការ​ទទួលពាក្យសុំប័ណ្ណស្នាក់នៅអចិន្ត្រៃយ៍បានចំនួន ៥៧,៤៤៤នាក់ ស្មើ៤៥.៦២% ដោយ​បានផ្តល់រួចនូវបណ្ណស្នាក់នៅអចិន្ត្រៃយ៍ចំនួន ១៨.៥៣០សន្លឹក ទទួលបានប្រាក់អាករពីបណ្ណស្នាក់នៅអចិន្ត្រៃយ៍ចំនួន ១១,១០៦,០០០,០០០រៀល បង់ចូលថវិកាជាតិ។ នេះបើតាមរបាយការណ៍ ដែលបង្ហាញដោយ​នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្ដោប្រវេសន៍។

នាយឧត្តសេនីយ៍ គៀត ច័ន្ទថារិទ្ធ បានបន្ថែមថា ​ឆ្នាំ២០១៨ មានជនបរទេសដែលការស្នាក់នៅ និងធ្វើការខុសច្បាប់កើតមាន​៧៧លើក មនុស្ស១៧៧នាក់ (ច្រើនជាងគេវៀតណាម ១៣៤នាក់)។

ស្នាក់នៅលើសរយៈពេលកំណត់ ៨៦លើក មនុស្ស៨៦នាក់ (ច្រើនជាងគេនីហ្សេរីយ៉ា ៤៨នាក់) កូរ៉េខាងត្បូង០៧នាក់ អង់គ្លេស០៥នាក់។ ស្នាក់នៅគ្មានឯកសារ៥២លើក មនុស្ស១៤៧នាក់ (ច្រើនជាងគេវៀតណាម ៨៧នាក់ ចិន០៨នាក់ នីហ្សេរីយ៉ា០៧នាក់ មីយ៉ាន់ម៉ា០៦នាក់ និងឡាវ ០៦នាក់)។ ជួញដូរគ្រឿងញៀន៣១លើក មនុស្ស៥២នាក់ (ច្រើនជាងគេឡាវ១៥នាក់ វៀតណាម១៤នាក់ ថៃ១០នាក់ ចិន០៥នាក់ កូរ៉េ០៣នាក់)។

ជំរិតទារប្រាក់តាមប្រព័ន្ធ VOIP និងហ្គេមអនឡាញខុសច្បាប់ ១៤លើក មនុស្ស៤៨១នាក់ (ភាគច្រើនចិន៤០៣នាក់ ម៉ាឡេស៊ី៤៨នាក់)។ អំពើហិង្សា ២០លើក មនុស្ស២៨នាក់ (ច្រើនជាងគេចិន១៣នាក់)។ អំពើអាសអាភាស និងអណាចារ្យ ១៨លើក មនុស្ស២៥នាក់ (ច្រើនជាងគេអង់គ្លេស០៦នាក់) ក្រៅពីនោះបទល្មើសផ្សេងៗទៀតចំនួន ៧២លើក មនុស្ស១២៩នាក់៕