(ភ្នំពេញ)៖ បុរសម្នាក់បើកម៉ូតូលឿន ដូចហោះជ្រុលទៅបុកខឿនផ្លូវដួលបោកក្បាលផ្ទប់នឹងបង្គោលស្លាកសញ្ញាចរាចរណ៍ បែកក្បាធ្លាយខួរលស្លាប់យ៉ាងអាណោចអាធ័ម។ ហេតុការណ៍នេះ បានបង្កឲ្យមានការភ្ញាក់ផ្អើលឡើងនៅម៉ោងជាង១យប់រំលងអាធ្រាត្រ ឈានចូលថ្ងៃទី០៤ ខែមិនា ឆ្នាំ២០១៩ នៅចំណុងរង្វត់មូលគួចកាណុង ស្ថិតនៅតាមបណ្តោយផ្លូវព្រះមុនីវង្ស សង្កាត់ស្រះចក ខណ្ឌដូនពេញ។
ជនរងគ្រោះឈ្មោះ អ៊ូ ករិទ្ធទ្យា មានអាយុ ៣២ឆ្នាំ មានស្រុកកំណើតស្ថិតនៅឃុំកោះដាច់ ស្រុកមុខកំពូលខេត្តកណ្ដាល និងមានទីលំនៅបច្ចុប្បន្ន ស្ថិតនៅផ្ទះលេខ៣៩៩អឺ៣ ផ្លូវ៩៣ភូមិ០៧ស្ថិតក្នុងសង្កាត់អូរឫស្សី០៤ខណ្ឌ៧មករា ក្រុងភ្នំពេញ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញជនរងគ្រោះបើកម៉ូតូមួយគ្រឿងម៉ាក HONDA DREAM ស៊េរីឆ្នាំ២០១៨ ពណ៌ក្រហម ពាក់ស្លាកលេខភ្នំពេញ 1HF-8091បានធ្វើដំណើរតាមបណ្តោយផ្លូវព្រះមុនីវង្ស ទិសដៅពីត្បូងទៅជើងបោះពួយយ៉ាងលឿន លុះមកដល់ចំណុចកើតហេតុខាងលើបានបត់ស្តាំដៃមិនទាន់ ក៏ជ្រុលបុកខឿនផ្លូវដួលបោកក្បាលផ្ទប់នឹងបង្គោលស្លាកសញ្ញាចរាចរណ៍ បែកក្បាលធ្លាយខួរស្លាប់យ៉ាងអាណោចអាធ័ម។
ក្រោយកើតហេតុសមត្ថកិច្ចពិនិត្យរួច សពត្រូវបានរថយន្តសាមុយរៀបចំលើកដាក់ ក្នុងរថយន្តដើម្បីរង់ចាំបងប្អូនមកទទួលសពយកទៅធ្វើបុណ្យតាមប្រពៃណី រីឯម៉ូតូវិញត្រូវបានសមត្ថកិច្ចជំនាញយកទៅរក្សាទុកនៅការិយាល័យចរាចរណ៍ ដើម្បីរង់ចាំសាច់ញាត្តិយកឯកសារ មកទទួលយកទៅវិញ៕
