(កំពង់ធំ)៖ លោក សាកាហ្គូជិ ណាអុតុ អតីតសមាជិកសភា នៃសភាជាន់ទាបប្រចាំតំបន់ក្នុងប្រទេសជប៉ុន និងលោកកុអ៊ិជិ តាគូម៉ា ប្រធានសមាគមជនជាតិជប៉ុនប្រចាំនៅកម្ពុជា នៅថ្ងៃទី០២ ខែមីនាម្សិលមិញ បានធ្វើដំណើរទស្សនកិច្ច នៅសាលាបឋមសិក្សា និងអនុវិទ្យាល័យអាត់ស៊ូ នៅឃុំអាត់ស៊ូ ស្រុកប្រាសាទសំបូរ ខេត្តកំពង់ធំ ហើយបាននាំយកសៀវភៅប្រវត្តិរបស់លោក ណាកាតា អាត់ស៊ូអ៊ីតូ ចំនួន ៤៥០ក្បាល ចែកជូនដល់សិស្សានុសិស្ស ។
ដំណើរទស្សនកិច្ច និងការចែកជូនសៀវភៅប្រវត្តិសាស្ដ្ររបស់លោក ណាកាតា អាត់ស៊ូអ៊ីតូ ខាងលើ ដោយសារលោក សាកាហ្គូជិ ណាអុតុ ចង់រំលឹកនូវអនុស្សាវរីយ៍ និងវីរភាពរបស់លោក អាត់ស៊ូអ៊ីតុ ដែលបុរសជនជាតិជប៉ុនម្នាក់ បានពលីអាយុជីវិតក្នុងកិច្ចកសាងសន្ដិភាព ក្នុងប្រទេសប្រទេសកម្ពុជា អំឡុងពេលបំពេញបេសកកម្មក្នុងនាមជាបុគ្គលិកស្ម័គ្រចិត្ត នៃអាជ្ញាធរបណ្ដោះអាសន្នអង្គការសហប្រជាជាតិប្រចាំកម្ពុជា(អ៊ុនតាក់) កាលពីឆ្នាំ១៩៩២ ។
ចំពោះសៀវភៅប្រវត្តិរបស់លោក អាត់ស៊ូអ៊ីតូ នេះ និពន្ធផ្ទាល់ដោយលោក សាកាហ្គូជិ ណាអុតុ ដោយបោះពុម្ពលើកទី១ ចំនួន ៣,០០០ក្បាល ក្នុងគោលបំណងរំលឹក និងឲ្យមនុស្សម្នាបានដឹងអំពីប្រវត្តិ បុគ្គលិកលក្ខណៈ ឥទ្ធិពល និងវីរភាពដ៏អង់អាចក្លាហានរបស់លោក អាត់ស៊ូអ៊ីតូ ដែលបានផ្ដល់ឲ្យប្រទេសកម្ពុជា និងជប៉ុន ។ ការនិពន្ធនេះ ទទួលបានការឧបត្ថម្ភពីសហជីពសាគូរ៉ាណែតវកស៊ីស្ទែម និងសម្របសម្រួលការបោះពុម្ពផ្សាយដោយក្រុមហ៊ុនឡូកូម៉ូគ្រុប ដោយសរសេរជាភាសាជប៉ុន និងខ្មែរ ។
សូមរំលឹកថា លោក អាត់ស៊ូអ៊ីតូ បានធ្វើដំណើរមកកម្ពុជា ក្នុងឆ្នាំ១៩៩២ ដើម្បីជួយរៀបចំការបោះឆ្នោតនៅកម្ពុជា នាឆ្នាំ១៩៩៣ បន្ទាប់ពីរបបខ្មែរក្រហម ដែលបានសំលាប់ប្រជាពលរដ្ឋកម្ពុជាស្លូតត្រង់រាប់លាននាក់ និងសង្រ្គាមស៊ីវិល ដែលបានអូសបន្លាយរយៈពេលជាច្រើនឆ្នាំត្រូវបានបញ្ចប់ ហើយកម្ពុជាបានរៀបចំការបោះឆ្នោតដោយសេរី និងយុត្តិធម៌ ជាលើកដំបូង ដែលជាជំហានមួយឆ្ពោះទៅរកសន្តិភាព និងប្រជាធិបតេយ្យដ៏ពេញលេញក្រោមកិច្ចសហប្រតិបត្តិការពីសំណាក់អ៊ុនតាក់។
កំឡុងពេលនេះលោក អាត់ស៊ូអ៊ីតូ គឺជាបុគ្គលិកស្ម័គ្រចិត្ត បានធ្វើដំណើរទៅខេត្តកំពង់ធំ ដែលជាចំនុចសមរភូមិក្ដៅ កាលពីជំនាន់នោះ ដើម្បីជំរុញ និងផ្សព្វផ្សាយឱ្យប្រជាជនទៅចូលរួមបោះឆ្នោត អប់រំអ្នកបោះឆ្នោតអោយបានយល់ដឹងពីសារប្រយោជន៍នៃការបោះឆ្នោត ។ តែជាអុកសលនៅថ្ងៃទី៨ ខែមេសា ឆ្នាំ១៩៩៣ មុនការបោះឆ្នាតប៉ុន្មានសប្តាហ៍ លោក អាត់ស៊ូអ៊ីតូ ត្រូវបានគេបាញ់សម្លាប់នៅអាយុ ២៥ឆ្នាំ នៅភូមិជាយសំពៅក្នុងខេត្តកំពង់ធំ ដែលធ្វើឲ្យមានការសោកស្ដាយជាខ្លាំង ទាំងប្រជាជនជប៉ុន និងប្រជាជនកម្ពុជា ។
ប៉ុន្ដែទោះបីជាលោកបានស្លាប់ក៏ពិតមែន តែកិច្ចខិតខំប្រឹងប្រែងរបស់លោក មិនអត់ប្រយោជន៍ឡើយ ជាក់ស្តែងនៅថ្ងៃបោះឆ្នោត(១៩៩៣) អត្រាបោះឆ្នោតនៅតំបន់ ដែលលោកបានបំពេញបេសកកមម្មនោះ មានចំនួនអ្នកបោះឆ្នោតដ៏ច្រើនលើសលប់រហូតដល់ ៩៩,៩% ឯណោះ ។ មិនត្រឹមតែប៉ុណ្ណោះ ដើម្បីផ្តល់កិត្តិយស និងការចងចាំអំពីវីរភាពរបស់បុរសជប៉ុនរូបនេះ ភូមិជាយសំពៅ ដែលជាភូមិលោកតូ្រវបានគេបាញ់សម្លាប់នោះ បានប្តូរជាឈ្មោះមកជាភូមិអាត់ស៊ូ និងមានការកសាងសាលាបឋមសិក្សា និងអនុវិទ្យាល័យណាកាតាអាត់ស៊ូអ៊ីតូ ក៏ដូចជាទទួលបានជំនួយជាបន្ដបន្ទាប់ពីគ្រួសារលោក អាត់ស៊ូអ៊ីតូ ទៀតផង ៕
