(កំពង់ឆ្នាំង)៖ ក្រុមការងារនៃនាយកដ្ឋានជំរុញទេសចរណ៍ក្នុងស្រុក និងអប់រំការយល់ដឹងជាសាធារណៈ នៃក្រសួងទេសចរណ៍ សហការជាមួយមន្ទីរទេសចរណ៍ខេត្តកំពង់ឆ្នាំង បានរៀបចំសិក្ខាសាលាស្តីពី ការបញ្ជ្រាបការយល់ដឹងជាសាធារណៈពីវិស័យទេសចរណ៍ដល់យុវជន សិស្ស និស្សិត មន្ត្រី រាជការ និងប្រជាពលរដ្ឋ នៅខេត្តកំពង់ឆ្នាំង។
សិក្ខាសាលានេះធ្វើឡើងនាថ្ងៃទី២៨ ខែកុម្ភៈ ឆ្នាំ២០១៩ ដែលមានអ្នកចូលរួមប្រមាណ ១០៤នាក់ និងមានរយៈពេលពីរថ្ងៃ។
គោលបំណងនៃសិក្ខាសាលាគឺដើម្បីអប់រំយុវជន សិស្ស និស្សិត មន្រ្តីរាជការ និងប្រជា ពលរដ្ឋ ឲ្យយល់ដឹងពី សារសំខាន់នៃវិស័យទេសចរណ៍ចំពោះវប្បធម៌ សង្គម សេដ្ឋកិច្ច បរិស្ថាន និងសហគមន៍ ចូលរួមអភិវឌ្ឍវិស័យ ទេសចរណ៍ប្រកបដោយប្រសិទ្ធភាពខ្ពស់ ចូលរួមចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» និងចូលរួមយុទ្ធនាការផ្សព្វផ្សាយ «កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ»។
សិក្ខាសាលានេះ ក៏រៀបចំឡើងដើម្បីជំរុញទេសចរក្នុងស្រុកឲ្យធ្វើដំណើរកម្សាន្តពីខេត្តមួយទៅខេត្តមួយ លើកកម្ពស់ស្មារតីស្នេហាជាតិ លើកកម្ពស់សុខុមាលភាពរបស់ប្រជាជន និងបង្កើនការងាររបស់ប្រជាពលរដ្ឋ។
នេះជារឿងចាំបាច់ដែលពលរដ្ឋកម្ពុជាត្រូវរួមគិត រួមធ្វើ និងរួមទទួលខុសត្រូវ ក្រោមពាក្យស្លោក «ទេសចរណ៍ ដើម្បីយើងទាំងអស់គ្នា ហើយយើងទាំងអស់គ្នាដើម្បីទេសចរណ៍»។
សិក្ខាសាលានេះក៏ធ្វើឡើងដើម្បី បញ្រ្ជាបការយល់ដឹងរបស់ប្រជាពលរដ្ឋក្នុងមូលដ្ឋាន ដើម្បីត្រៀមចូលរួមអបអរពិធីបុណ្យទន្លេលើកទីប្រាំ ដែលនឹងប្រព្រឹត្តិទៅចាប់ពីថ្ងៃទី១៥ ដល់ថ្ងៃទី១៧ ខែមីនា ឆ្នាំ២០១៩ នៅខេត្តកំពង់ឆ្នាំង ដែលជាខេត្តមួយល្បីខាងផលិតក្អមឆ្នាំងដី ដែលមានគុណភាពល្អ៕
