(ឧត្តរមានជ័យ)៖ ទេសរដ្ឋមន្រ្តី គន់ គីម ប្រធានក្រុមការងារថ្នាក់ជាតិចុះជួយខេត្តឧត្តរមានជ័យ នៅថ្ងៃទី០១ ខែមីនា ឆ្នាំ២០១៩នេះ បានអញ្ជើញជាអធិបតីក្នុងពិធីបិទសន្និបាត រដ្ឋបាលខេត្តឧត្តរមានជ័យ។
លោក ប៉ែន កុសល អភិបាលខេត្តឧត្ដរមានជ័យ ដែលបានគូសបញ្ជាក់ពីលទ្ធផល នៃដំណើរការអង្គសន្និបាត ដែលបានឆ្លុះបញ្ចាំងពីសមិទ្ធិផលធំៗជាច្រើន ដែលខេត្តសម្រេចបានក្នុងឆ្នាំកន្លងមក។
ថ្លែងទៅកាន់អង្គសន្និបាត ទេសរដ្ឋមន្រ្តី គន់ គីម បានសម្តែងការកោតសសើរ និងវាយតម្លៃខ្ពស់ចំពោះការចូលរួមរបស់មន្ត្រី បុគ្គលិក រាជការ កងកម្លាំងប្រដាប់អាវុធ និងប្រជាពលរដ្ឋនៅក្នុងខេត្តទាំងមូល ដែលបានរួមគ្នាសម្រេចបាននូវសមិទ្ធិផលល្អប្រសើរលើគ្រប់វិស័យ គួរជាទីមោទនៈ។
ជាមួយគ្នានេះ លោកទេសរដ្ឋមន្រ្តី ក៏បានរំលឹកឲ្យអាជ្ញាធរគ្រប់លំដាក់ថ្នាក់ សមត្ថកិច្ចជំនាញ កងកម្លាំងប្រដាប់អាវុ និងប្រជាពលរដ្ឋនៅទូទាំងខេត្ត ត្រូវបន្តការរួមសហការគ្នា អនុវត្តឲ្យបានជោគជ័យភារកិច្ចឆ្នាំ២០១៩ ដោយផ្តោតសំខាន់ទៅលើការងារសំខាន់ៗដូចខាងក្រោម៖
*ទី១៖ ពង្រឹងសន្តិភាព និងស្ថេរភាពនយោយ ទប់ស្កាត់ និងបង្ក្រាបរាល់សកម្មភាពណាដែលនាំឲ្យប៉ះពាល់ដល់សន្តិសុខជាតិ។ បុគ្គលិក មន្រ្ដីរាជការ កងកម្លាំងសមត្ថកិច្ច និងកងកម្លាំងប្រដាប់អាវុធត្រូវពង្រឹងវិន័យ លក្ខន្តិកៈ និងលើកកម្ពស់សមត្ថភាពក្នុងការបំពេញមុខងារ។
*ទី២៖ រក្សាសន្តិសុខ សណ្តាប់ធ្នាប់សាធារណៈ បង្ក្រាប និងទប់ស្កាត់រាល់បទល្មើសនានា ដែលកើតឡើង និងមានវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀន។
*ទី៣៖ បង្កើនការអភិវឌ្ឍសេដ្ឋកិច្ចដោយផ្តោតលើ វិស័យកសិកម្ម និងកសិឧស្សាហកម្ម។
*ទី៤៖ ជំរុញការអនុវត្តកំណែទម្រង់វិមជ្ឈការ និងសហវិម្ឈការ តាមកិច្ចការអទិភាពទាំងបួន។
*ទី៥៖ លើកកម្ពស់ការផ្តល់សេវាសាធារណៈ និងខិតខំថែមទៀត ក្នុងការដោះស្រាយបញ្ហាប្រឈមនៅមូលដ្ឋាន។
*ទី៦៖ អាជ្ញាធរគ្រប់ថ្នាក់ ក្រុមការងារ សមត្ថកិច្ចពាក់ពន្ធ និងកងកម្លាំងប្រដាប់អាវុធត្រូវត្រៀមកម្លាំង មធ្យោបាយ និងសម្ភារជួយសង្គ្រោះប្រជាពលរដ្ឋ នៅក្នុងរដូវរាំងស្ងួតខាងមុខនេះ។
និងទី៧៖ ធ្វើការពង្រឹងរបៀបរបបការងារ រក្សាឲ្យបានការសាមគ្គីឯកភាពផ្ទៃក្នុង លប់បំបាត់វប្បធ៌មអន្តរាគមន៍។
ពិធីនេះបានបញ្ចប់ក្រោយពី ទេសរដ្ឋមន្រ្តី គន់ គីម បានប្រគល់ប័ណ្ណសរសើរ លិខិតសរសើរជូនដល់ អង្គភាពចំនួន៤៨ ដែលមានស្នាដៃឆ្នើមក្នុងឆ្នាំកន្លងមកផងដែរ៕
