(ភ្នំពេញ)៖ រាជរដ្ឋាភិបាលកម្ពុជា តាមរយៈក្រសួងការបរទេស បានចេញសេចក្តីថ្លែងការណ៍ ដោយស្នើឱ្យប្រទេសឥណ្ឌា និងប្រទេស ប៉ាគីស្ថាន រក្សាការអត់ធ្មត់ខ្ពស់បំផុត ដើម្បីចៀសវាងការប៉ះទង្គិចគ្នាដោយអាវុធបន្តទៀត ដែលនឹងនាំឱ្យមានអរិភាព ក្នុងចំណោមប្រជាជននៃប្រទេសទាំងពីរ។ នេះបើតាមសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ ដែលអង្គភាពព័ត៌មាន Fresh News ទទួលបាននៅថ្ងៃទី២៨ ខែកុម្ភៈ ឆ្នាំ២០១៩នេះ។
តាមសេចក្តីថ្លែងការណ៍របស់ក្រសួងការបរទេសកម្ពុជា បានឱ្យដឹងថា កម្ពុជាជឿជាក់ថា ប្រទេសប៉ាគីស្ថាន និងឥណ្ឌា អាចធ្វើការចរចាគ្នា ដើម្បីកាត់បន្ថយភាពតានតឹងនាពេលបច្ចុប្បន្ន និង ស្វែងរកដំណោះស្រាយទំនាស់តាមមធ្យោបាយសន្តិវិធី។
ក្រសួងការបរទេសកម្ពុជា សូមបញ្ជាក់ជាថី្មអំពីការថ្កោលទោសចំពោះការវាយប្រហារភេរវកម្ម កាលពីថ្ងៃទី១៤កុម្ភៈ ឆ្នាំ២០១៩ នៅតំបន់ Pulwama និងការបេ្តជ្ញាចូលរួមចំណែកក្នុងកិច្ចប្រឹងប្រែង ដើម្បីប្រយុទ្ធប្រឆាំង នឹងអំពើភេរវកម្មគ្រប់ទម្រង់ និងគ្រប់រូបភាពទាំងអស់។
គួរជម្រាបថា ភាពតានតឹងបានផ្ទុះឡើងរវាងប្រទេសអតីតបងប្អូនទាំងពីរ បន្ទាប់ពីមានករណីវាយប្រហារដោយបំផ្ទុះគ្រាប់បែកអត្តឃាត កាលពីពាក់កណ្តាលខែកុម្ភៈ ទៅលើកងកម្លាំងសន្តិសុខឥណ្ឌានៅមួយផ្នែក នៃតំបន់ការស្មៀរ ដែលកាន់កាប់ដោយឥណ្ឌាបណ្តាលមនុស្សជាង៤០នាក់ បាត់បង់ជីវិតដោយឡែកឥឡូវនេះ គឺស្ថានការណ៍កាន់តែផុយស្រួយខ្លាំងមែនទែនហើយ ក្រោយសង្គ្រាមលើអាកាសទើបផ្ទុះឡើង។
ដោយឡែក សហរដ្ឋអាមេរិក និងចិន ក៏បានអំពាវនាវឱ្យប្រទេសទាំងពីររក្សាភាពស្ងប់ស្ងាត់ និងការអត់ធ្មត់ ព្រោះប្រទេសទាំងពីរសុទ្ធតែមានអាវុធនុយក្លេអ៊ែរនៅក្នុងដៃ និងធ្លាប់មានប្រវត្តិទាស់ទែងគ្នា ជាច្រើទសវត្សរ៍មកហើយនៅតាមតំបន់ព្រំដែន ជាពិសេសគឺតំបន់កាស្មៀរនោះតែម្តង។
សូមអានសេចក្តីថ្លែងការណ៍ទាំងស្រុង របស់ក្រសួងការបរទេសដែលមានខ្លឹមសារទាំងស្រុងដូចខាងក្រោម៖
