(សៀមរាប)៖ បច្ចុប្បន្នថ្នាំជក់សម្លាប់មនុស្ស ប្រមាណជាង៧លាននាក់ ទូទាំងពិភពលោកក្នុងមួយឆ្នាំ ដែលគិតជាមធ្យមប្រមាណជា​១៦.៤៣៨នាក់ ក្នុងមួយថ្ងៃ ក្នុងនោះ មានអ្នកស្រូបផ្សែងបារីពីគេ ចំនួន៦សែននាក់។ ​ខណៈនៅកម្ពុជា​ក្នុងមួយឆ្នាំៗ ប្រជាពលរដ្ឋ​ជាង១ម៉ឺននាក់ស្លាប់ បណ្តាលមកពីជំងឺដែលបង្កដោយ ការប្រើប្រាស់ថ្នាំជក់។​

តួលេខទាំងអស់នេះ ត្រូវបានលើកឡើងដោយលោក ហោ សារុន អនុរដ្ឋលេខាធិការក្រសួងទេសចរណ៍ ក្នុង​ពិធីបើកសិក្ខាសាលា ស្តីពី «ការជំរុញទីក្រុងសៀមរាប ជាទីក្រុងគ្មានផ្សែងបារី និងពិធីប្រគល់ពានបេតិកភណ្ឌអង្គរ គ្មានផ្សែងបារី ដល់អាជ្ញាធរអប្សរា» នៅថ្ងៃទី២៧ ខែកុម្ភៈ ឆ្នាំ​២០១៩នេះ នៅសណ្ឋាគារអប្សរាផាឡេស ខេត្តសៀមរាប ដោយមានការចូលរួមពីលោក ហង់ ពៅ អគ្គនាយក នៃអាជ្ញាធរជាតិអប្សរា, លោក ពៅ ពិសិដ្ឋ អភិបាលរងខេត្តសៀមរាប រួមនិងវត្តមានអស់លោក លោកស្រី ដែលបានចូលរួមពិធីនេះ ប្រមាណជា១២០នាក់។

មន្ដ្រីជាន់ខ្ពស់ក្រសួងទេសចរណ៍រូបនេះ បានថ្លែងយ៉ាងដូច្នេះថា «​បរិស្ថានគ្មានផ្សែងបារី ​Smoke-Free​ ជាបរិបទមួយដែលពិភពលោក ក៏ដូចជាតំបន់បាន និងយកចិត្តទុកដាក់ខ្ពស់ ក្នុងការត្រួតពិនិត្យផលិតផលថ្នាំជក់ ដែលអាចប៉ះពាល់ដល់បរិស្ថាន និងការរស់នៅរបស់ប្រជាពលរដ្ឋទូទាំងពិភពលោក។ បច្ចុប្បន្នថ្នាំជក់សម្លាប់មនុស្ស ប្រមាណជាង៧លាននាក់ ទូទាំងពិភពលោកក្នុងមួយឆ្នាំ ដែលគិតជាមធ្យមប្រមាណជា ១៦.៤៣៨នាក់ ក្នុងមួយថ្ងៃ ក្នុងនោះមានអ្នកស្រូបផ្សែងបារីពីគេចំនួន៦សែននាក់»។

លោកបានបន្ដថា អ្នកស្លាប់ទាំងនោះ គឺបណ្តាលមកពីជំងឺមហារីកសួត ដាច់សរសៃឈាមខួរក្បាល មហារីក មាត់ គាំងបេះដូង ក្រិនសរសៃឈាម មហារីកក្រពះ ប្លោកនោម។ល។ ចំពោះស្ត្រីដែលមានគភ៌ ក៏អាចធ្វើឲ្យ​ទារកកើតមកខ្វះទម្ងន់ និងមានរាងកាយមិនគ្រប់លក្ខណៈ ហើយបើគ្មានវិធានការទប់ស្កាត់ ប្រកបដោយប្រសិទ្ធ​ភាពទេ នៅឆ្នាំ២០៣០​ថ្នាំជក់អាចនឹងសម្លាប់មនុស្ស៨លាននាក់ ក្នុងមួយឆ្នាំ ហើយ៨០% នៃអ្នកស្លាប់ គឺស្ថិត​នៅបណ្តាប្រទេសកំពុងអភិវឌ្ឍន៍។​

អនុរដ្ឋលេខាធិការរូបនេះ បានបញ្ជាក់ដែរថា ​នៅកម្ពុជាក្នុងមួយឆ្នាំៗ ប្រជាពលរដ្ឋប្រមាណជាង១ម៉ឺននាក់ស្លាប់ ជារៀងរាល់ឆ្នាំបណ្តាលមកពីជំងឺ ដែលបង្កដោយការប្រើប្រាស់ថ្នាំជក់។ ប្រទេសកម្ពុជា បានផ្តល់សច្ចាប័នចូលជាសមាជិកអនុសញ្ញា ស្តីពីការត្រួតពិនិត្យផលិតផលថ្នាំជក់ កាលពីថ្ងៃទី១៥ ខែវិច្ឆិកា ឆ្នាំ២០១៥ ក្នុងការគាំទ្រ និងប្តេជ្ញាអនុវត្តតាមគោលការណ៍ណែនាំ ដែលមានចែងក្នុងអនុសញ្ញារបស់អង្គការសុខភាពពិភពលោក ដើម្បីកាត់បន្ថយការប្រើប្រាស់ ថ្នាំជក់ និងរួមចំណែកផលប៉ះពាល់លើសុខភាព បរិស្ថាន និងសេដ្ឋកិច្ច។

នៅក្នុងអង្គសិក្ខាសាលានោះ លោក ហោ សារុន តំណាងលោក ថោង ខុន រដ្ឋមន្ដ្រីក្រសួងទេសចរណ៍ ​បានឲ្យដឹងថា ការរៀបចំសិក្ខាសាលានេះឡើង ក្នុងគោលបំណងសំខាន់ៗចំនួនរួមមាន៖

*ទី១៖ផ្សព្វផ្សាយដល់អ្នកចូលរួមនូវច្បាប់ ស្តីពីការត្រួតពិនិត្យថ្នាំជក់ និងលិខិតបទដ្ឋានគតិយុត្ត ក្រោមច្បាប់នេះ ដើម្បីធានានូវប្រសិទ្ធភាពក្នុងការអនុវត្ត

*ទី២៖យល់ដឹងអំពីអត្ថន័យជាសកល នៃទីក្រុងគ្មានផ្សែងបារី និងឧត្តមានុភាព (ការអនុវត្តល្អបំផុត) នៅបណ្តាប្រទេសក្នុងតំបន់

​*ទី៣៖ទទួលស្គាល់កិច្ចខិតខំប្រឹងប្រែង របស់អាជ្ញាធរអប្សរា ក្នុងការអនុវត្ត និងជំរុញរមណីយដ្ឋានអង្គរគ្មានផ្សែងបារី

*ទី៤៖ការចូលរួមចែករំលែកបទពិសោធន៍នានា ដែលកើតមានឡើង ក្នុងមូលដ្ឋានអាជីវកម្ម ​សេវាកម្មទេសចរណ៍ ដើម្បីប្រែក្លាយទីក្រុងសៀមរាប ជាទីក្រុងគ្មានផ្សែងបារី

និង​ទី​៥៖ពិគ្រោះពិភាក្សាអំពីការត្រៀមខ្លួនធ្វើជាម្ចាស់ផ្ទះ នៃកិច្ចប្រជុំលើកទី៧ ស្តីពីទីក្រុងគ្មានផ្សែងបារី ដែលនឹងប្រព្រឹត្តទៅនាខែតុលា ឆ្នាំ២០១៩​ខាងមុខ នៅខេត្តសៀមរាប​។

លើសពីនេះ លោកអះអាងថា ​កម្ពុជា​មានតំបន់បេតិកភណ្ឌអង្គរ ជាតំបន់គ្មានផ្សែងបារី ហើយចុងឆ្នាំ២០១៩នេះ ​នឹងជំរុញឲ្យទីក្រុងសៀមរា​ប ជាទីក្រុងគ្មានផ្សែងបារីផងដែរ ហើយឆ្នាំ២០១៩នេះ ក៏ជាឆ្នាំដែលកម្ពុជានឹងធ្វើជាម្ចាស់ផ្ទះ ក្នុងការរៀបចំកិច្ចប្រជុំថ្នាក់តំបន់អាស៊ី ប៉ាស៊ីហ្វីកលើកទី៧ ស្តីពី បរិស្ថានគ្មានផ្សែងបារីនៅ​ទឹកដីអង្គរដ៏ល្អបវរនៃយើង៕