(ភ្នំពេញ)៖ បុរសម្នាក់បើករថយន្តលឿន មិនប្រយ័ត្នរេចង្កូតទៅបុកដើមឈើ បណ្ដាលឲ្យមានអ្នករងរបួសធ្ងន់ស្រាលចំនួន២នាក់ ចំណែលរថយន្តរងការខូចខាតយ៉ាងដំណំ ដែលហេតុការណ៍នេះ បានបង្កឲ្យមានការភ្ញាក់ផ្អើលឡើង នៅម៉ោងជាង២យប់ ថ្ងៃទី២៦ ខែកុម្ភៈ ឆ្នាំ២០១៩ នៅតាមបណ្ដោយផ្លូវ២៧១ ចំណុចមុខវិទ្យាល័យជាស៊ីមសាមគ្គី ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញរថយន្តមួយគ្រឿង ម៉ាក CAMRY ពណ៌ស ពាក់ស្លាកភ្នំពេញ 2AQ-7112 ធ្វើដំណើរដោយបុរស២នាក់ លុះមកដល់ចំណុចផ្លូវកោង ដោយរថយន្តបើកក្នុងល្បឿនលឿនផងក៏រេចង្កូតងាកមកឆ្វេងដៃក៏ជ្រុលទៅបុកដើមឈើ ហើយរថយន្តមិនទាន់អស់ល្បឿន ក៏ជ្រុលទៅឡើងឃឿនផ្ទះប្រជាពលរដ្ឋ ទើបឈប់នៅនឹងកន្លែងតែម្ដង។
គ្រោះថ្នាក់ចរាចរណ៍នេះ អ្នកបើកបររថយន្តបានរងរបួសធ្ងន់ ចំណែកឯអ្នករួមដំណើររងរបួសស្រាល ត្រូវបានប្រជាពលរដ្ឋនាំគ្នាជួយយកចេញពីរថយន្ដ និងហៅរថយន្តសង្គ្រោះបន្ទាន់ ដឹកយកទៅសង្គ្រោះនៅឯមន្ទីរពេទ្យ។
ក្រោយកើតហេតុសមត្ថកិច្ចមូលដ្ឋាន បានចុះមកដល់រួចធ្វើការទាក់ទងទៅសមត្ថកិច្ចជំនាញ ដើម្បីឲ្យចុះមកធ្វើការវាស់វែង យករថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាទៅតាមផ្លូវច្បាប់នៅពេលក្រោយ៕
