(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់​ និងក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន នឹងមានរៀបចំពិធី ចុះអនុស្សរណៈកិច្ច សហប្រតិបត្តិការស្តីពី «​ការបង្កើតវេទិកាសាធារណៈ-ឯកជន ស្តីពីការអភិវឌ្ឍនគរូបនីយកម្មកម្ពុជា-ជប៉ុន» នៅថ្ងៃទី២៦ ខែកុម្ភៈ ឆ្នាំ២០១៩ស្អែកនេះ។

បើតាមសេចក្ដីប្រកាសព័ត៌មាន ដែលអង្គភាព Fresh News ទទួលបាននៅថ្ងៃទី២៥ ខែកុម្ភៈ ឆ្នាំ២០១៩នេះ បានបញ្ជាក់ថា ពិធីដែលនឹងត្រូវធ្វើនៅស្អែកនេះ ​ក្រោមអធិបតីភាព ឧបនាយករដ្ឋមន្រ្តី​ ជា សុផារ៉ា ​រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

ផ្តើមចេញពីអនុស្សរណៈនៃកិច្ចសហប្រតិបត្តិការនេះ នៅព្រឹកថ្ងៃទី​២៧ ខែកុម្ភៈ ឆ្នាំ​២០១៩​ ក្រសួងរៀបចំដែនដី នគរូបនីយកម្ម និងសំណង់ ដោយមានកិច្ចសហការពីក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃ​ប្រទេសជប៉ុន នឹងរៀបចំវេទិកាសាធារណៈឯកជន ស្តីពីការអភិវឌ្ឍនគរូបនីយកម្មកម្ពុជា-ជប៉ុន លើកទី១។

ពិធីនេះនឹងធ្វើឡើងក្រោមវត្តមានឧបនាយករដ្ឋមន្ដ្រី ជា សុផារ៉ា និងមានការចូលរួមពី លោក Fumihiko YUKI អនុរដ្ឋមន្ត្រី នៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន គណៈប្រតិភូនៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន តំណាងស្ថានទូតជប៉ុនប្រចាំនៅ​កម្ពុជា តំណាងក្រសួង ស្ថាប័នពាក់ព័ន្ធ ក្រុមហ៊ុនវិនិយោគ និងធុរជនជប៉ុនប្រមាណ៦០ ក្រុមហ៊ុនវិនិយោគ ក្នុងវិស័យអភិវឌ្ឍអចលនទ្រព្យ សំណង់ ស្ថាបត្យកម្ម លំនៅឋាន ប្រព័ន្ធលូ ធនាគារ និងធានារ៉ាប់រង និងគណៈស្ថាបត្យករកម្ពុជា គណៈវិស្វករកម្ពុជា សភាពាណិជ្ជកម្មកម្ពុជា សមាគមអ្នកសាងសង់កម្ពុជា សមាគមអ្នកអភិវឌ្ឍលំនៅឋានកម្ពុជា និងសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា៕