(ភ្នំពេញ)៖ លោកឧកញ៉ា​ លឹម ហេង អនុប្រធានសភាពាណិជ្ជកម្មកម្ពុជា និងជាអ្នកជំនួញមួយរូបនៅកម្ពុជា បានបញ្ជាក់ឲ្យដឹងថា បរិយាកាសវិនិយោគនៅកម្ពុជា នៅតែមានសក្តានុពលល្អ ទោះបីមានដំណើរការឈានទៅរកការព្យួរ EBA ក៏ដោយ។

លោកឧកញ៉ាបញ្ជាក់ថា កត្តាដែលធ្វើអ្នកវិនិយោគមានជំនឿចិត្តនៅកម្ពុជា ដោយសារតែកម្ពុជាមានស្ថិរភាពនយោបាយ និងសន្តិភាពពេញលេញ ជាមួយនឹងការធ្វើកំណែទម្រង់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីសម្រួលដល់ការវិនិយោគផងដែរ។

ការលើកឡើងបែបនេះ ក្នុងកិច្ចសម្ភាសរវាងអង្គភាពព័ត៌មាន Fresh News និងឧកញ៉ា លឹម ហេង ក្នុងកម្មវិធី «ភ្ញៀវពិសេសប្រចាំសប្តាហ៍» ក្នុងប្រធានបទស្ដីពី «ការបង្កើតតំបន់រដ្ឋបាលពិសេសតាមបណ្ដាលខេត្តជាប់ព្រំដែន ដើម្បីទាក់ទាញការវិនិយោគ និងកាត់បន្ថយថ្លៃដើម»។

លោកបានបញ្ជាក់ទៀតថា «សព្វថ្ងៃនេះកំណែទម្រង់ស៊ីជម្រៅរបស់រាជរដ្ឋាភិបាល បាននិងកំពុងធ្វើការកែ ហើយកំពុងជួយកាត់បន្ថយថ្លៃដើមទៀត។ សភាពាណិជ្ជកម្មអឺរ៉ុប គេបានប្រកាសហើយថា បើទោះបីជាមានដំណើរការឈានទៅការព្យួរ EBA បែបនេះក្ដី ក៏គេនៅតែបន្តរកស៊ីនៅប្រទេសកម្ពុជាទៀត»។

លោកលើកឡើងទៀតថា «បញ្ហា EBA មិនបានធ្វើឲ្យអ្នករកស៊ីរារែកទេ។ ប្រទេសគេផ្សេងៗនៅតំបន់អាស៊ាន ក្រៅពីកម្ពុជា ឡាវ ភូមា មាននរណាទទួលបាន EBA ដូច្នេះហើយគេនៅតែវិនិយោគ។ ខ្ញុំជឿថា យើងនៅតែធ្វើបាន»។

ជាមួយនឹងការទាក់ទាញអ្នកវិនិយោគ និងកាត់បន្ថយថ្លៃដើមនៃការផលិត អនុប្រធានសភាពាណិជ្ជកម្មរូបនេះ បានផ្តល់ជាធាតុចូលចង់ឲ្យរាជរដ្ឋាភិបាលបង្កើតតំបន់រដ្ឋបាលពិសេស ឬតំបន់ស្វយ័តពិសេស និងបង្កើតតំបន់សហគ្រាសធុនតូច និងធម្យម (SMEs) ពិសេសផងដែរ៕