(ភ្នំពេញ)៖ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគីរី បានចេញសេចក្ដីជូនដំណឹងបញ្ជាក់ថា នៅពេលនេះមន្ទីរបាននិងកំពុង អនុវត្តតាមនីតិវិធី នៃការចុះបញ្ជីដីធ្លី (ផ្ដល់កម្មសិទ្ធិ) ជូនប្រជាពលរដ្ឋទូទៅដើម្បីផ្តល់ភាពស្របច្បាប់ ដោយគោរពតាមគោលការណ៍ នៃការផ្តល់សេវាសាធារណៈ ជូនប្រជាពលរដ្ឋ ជាមួយស្ថាប័នដែលពាក់ព័ន្ធ។
សេចក្ដីជូនដំណឹងដែលអង្គភាព Fresh News ទទួលបាននៅថ្ងៃទី២៤ ខែកុម្ភៈ ឆ្នាំ២០១៩នេះ មន្ទីររៀបចំដែនដីខេត្តមណ្ឌលគិរី បានឲ្យដឹងថា កន្លងមកថ្មីៗនេះ មានសារព័ត៌មានក្នុងស្រុក គេហទំព័រមួយចំនួន បានចុះផ្សាយនូវព័ត៌មានមិនពិតថា មានមន្ត្រីជំនាញបានឃុបឃិត ជាមួយអាជ្ញាធរពាក់ព័ន្ធ ក្នុងការផ្តល់កម្មសិទ្ធិជូនឈ្មួញ និងអ្នកមានអំណាច ដែលបានរំលោភយកដីរដ្ឋ ព្រមទាំងចំការស្រល់នានាក្នុងខេត្តមណ្ឌលគីរី។
មន្ទីរសូមបញ្ជាក់ថា «កន្លងមកពិតជាមានប្រជាពលរដ្ឋបានស្នើសុំចុះបញ្ជីដីមានលក្ខណៈដាច់ដោយដុំប្រាកដមែន ដែលភ្ជាប់មកជាមួយនូវពាក្យសុំកាន់កាប់ដី និងលិខិតផ្ទេរសិទ្ធិកាន់កាប់ដី ព្រមទាំងមានការបញ្ជាក់ពីអាជ្ញាធរមូលដ្ឋាន។ តែរហូតមកដល់ពេលនេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគីរី មិនទាន់បានសម្រេច អនុវត្តការចុះបញ្ជីដីធ្លី (ផ្ដល់កម្មសិទ្ធិ) ជូនដល់ប្រជាពលរដ្ឋណាម្នាក់ ដោយប្រាសចាកពីគោលការណ៍បច្ចេកទេស និងនីតិវិធីនោះឡើយ»៕
សូមអានខ្លឹមសារលម្អិត នៃសេចក្ដីជូនដំណឹងដែលមាននៅខាងក្រោមនេះ៖
