(ភ្នំពេញ)៖ នៅពេលមេបក្សប្រឆាំងដ៏ធំនៅកម្ពុជា លោក កឹម សុខា ត្រូវបានចាប់ខ្លួននៅយប់រំលងអាធ្រាត ខែកញ្ញា ឆ្នាំ២០១៧ ប្រព័ន្ធផ្សព្វផ្សាយភាគច្រើនបានភ្ញាក់ផ្អើលជាខ្លាំង។ មានតែបណ្តាញព័ត៌មានអនឡាញ Fresh News មួយប៉ុណ្ណោះ ដែលមានទំនាក់ទំនងជិតស្និទ្ធជាមួយរដ្ឋាភិបាល ដែលធ្វើការផ្សាយផ្ទាល់នូវទិដ្ឋភាពនៃការចាប់ខ្លួនលោក កឹម សុខា នៅឯគេហដ្ឋានរបស់លោក ក្នុងអំឡុងប្រតិបត្តិការមួយ ដែលមានកម្លាំងប៉ូលិសប្រដាប់ដោយអាវុធប្រមាណជា១០០នាក់។
ការចាប់ខ្លួននេះ បានដៅនូវចំណុចកំពូលចុងក្រោយនៃយុទ្ធនាការរាប់ខែរបស់ Fresh News ក្នុងការព្យាយាមបំផ្លាញកេរ្តិ៍ឈ្មោះរបស់លោក កឹម សុខា ជាប្រធាននៃអតីតគណបក្សសង្រ្គោះជាតិ CNRP ដែលបច្ចុប្បន្នត្រូវបានគេរំលាយចោលបាត់ទៅហើយ។ Fresh News បានចោទថា លោក កឹម សុខា មានការពាក់ព័ន្ធក្នុងគម្រោងការមួយមានអាមេរិកនៅពីក្រោយ ដែលសំដៅផ្តួលរំលំរដ្ឋាភិបាលនៃគណបក្សប្រជាជាជនកម្ពុជា របស់លោកនាយករដ្ឋមន្រ្តី ហ៊ុន សែន ដែលបានដឹកនាំប្រទេសកម្ពុជាអស់រយៈពេលជាង០៣ទសវត្សរន៍មកហើយ។
ក្រោយពីលោក កឹម សុខា ត្រូវបានចាប់ខ្លួន Fresh News នៅតែបានបន្តយុទ្ធនាការផ្សព្វផ្សាយព័ត៌មានបែបវាយប្រហាររបស់ខ្លួន ជាមួយអត្ថបទដូចជា «តើហេតុអ្វីលោក កឹម សុខា ត្រូវបានចាប់ខ្លួន? ស្តាប់ចម្លើយសារភាពនៃអំពើក្បត់ជាតិរបស់លោក» ដែលមានផ្ទុកនូវតភ្ជាប់វីដេអូមួយកាលពីឆ្នាំ២០១៣ នៃសកម្មភាពរបស់លោក កឹម សុខា ធ្វើការថ្លែងអំណរគុណចំពោះអាមេរិក សម្រាប់ការគាំទ្រផ្នែកនយោបាយ និងយុទ្ធសាស្រ្តយ៉ាងលម្អិតដើម្បីការផ្លាស់ប្តូរទៅរកលទ្ធិប្រជាធិបតេយ្យ។ រដ្ឋាភិបាលកម្ពុជា បានអះអាងថា ពាក្យសម្តីទាំងនេះរបស់លោក កឹម សុខា គឺជាបទល្មើសជាក់ស្តែង ដូច្នេះអនុញ្ញាតឲ្យមានការដកហូតអភ័យឯកសិទ្ធិតំណាងរាស្រ្តចេញពីរូបលោក។
ការកើនឡើងមុខមាត់របស់ Fresh News ក្នុងនាមជាស្ថាប័នដ៏សំខាន់មួយ នៅក្នុងរបបដឹកនាំនៃប្រទេសកម្ពុជា បានកើតមានចំពេលដែលរដ្ឋាភិបាលបានចេញប្រតិបត្តិការបង្រ្កាប មិនធ្លាប់មានពីមុនមក ទៅលើសេរីភាពនៃសារព័ត៌មាន និងសង្គមស៊ីវិល ដែលកន្លងមកធ្លាប់តែមានសកម្មភាពខ្លាំងនៅកម្ពុជា។ តួយ៉ាងសារព័ត៌មាន Cambodia Daily ត្រូវបានបិទទ្វារនៅឆ្នាំ២០១៧ ជុំវិញបញ្ហាបង់ពន្ធ។ បន្ទាប់មកទៀតកាលពីឆ្នាំមុន សារព័ត៌មានឯករាជ្យចំណាស់ជាងគេនៅកម្ពុជា Phnom Penh Post ត្រូវបានទិញយកដោយម្ចាស់ថ្មី ដែលមានទំនាក់ទំនងជិតស្និទ្ធជាមួយរដ្ឋាភិបាល ដែលបានអនុវត្តន៍គោលការណ៍ផ្សព្វផ្សាយតឹងរ៉ឹងជាងមុន។ រីឯស្ថានីយវិទ្យុអាស៊ីសេរីវិញ ត្រូវបានបង្ខំឲ្យបោះបង់ចោលប្រតិបត្តិការរបស់ខ្លួន នៅក្នុងប្រទេសកម្ពុជាតែម្តង។
ក្នុងអំឡុងយុទ្ធនាការបង្រ្កាបលើប្រព័ន្ធផ្សព្វផ្សាយ សារព័ត៌មានឌីជីថល Fresh News បានក្លាយជាឧបករណ៍ដ៏មានប្រយោជន៍បំផុតមួយរបស់នាយករដ្ឋមន្រ្តី ហ៊ុន សែន ដែលមានឥទ្ធិពលយ៉ាងធំសម្បើម ជុំវិញការចែកចាយព័ត៌មានមិនពិតផ្នែកនយោបាយក៏ដូចជាការឃោសនានយោបាយ។
Fresh News ត្រូវបានបង្កើតឡើងកាលពីឆ្នាំ២០១៤ ជាមួយអ្នកកាសែតត្រឹម២០នាក់ និងត្រូវបានកាសែត Phnom Penh Post ហៅថាជា «ដំបងរបស់គណបក្សកាន់អំណាច» Fresh News បច្ចុប្បន្នគឺជាវែបសាយក្នុងស្រុកមានអ្នកចូលមើលច្រើនជាងគេលំដាប់ទីបីនៅកម្ពុជា និងបានដឹកនាំសង្រ្គាមប្រឆាំងក្រុមអ្នករិះគន់រដ្ឋាភិបាល តាមរយៈការផ្សព្វផ្សាយព័ត៌មានរសើបៗដែលគ្មានមូលដ្ឋានច្បាស់លាស់ ការបញ្ចេញសំឡេងសន្ទនាទូរស័ព្ទរវាងអ្នកនយោបាយបក្សប្រឆាំង និងការជួយក្នុងការបង្កើតគោលនយោបាយប្រឆាំងលទ្ធិប្រជាធិបតេយ្យថែមទៀតផង។
Fresh News ដែលសព្វថ្ងៃមានបុគ្គលប្រហែល១០០នាក់ និងការផ្សព្វផ្សាយទាំងនៅលើវែបសាយ ទូរទស្សន៍ វិទ្យុ Facebook និង YouTube នោះ ជារឿយៗតែងទទួលបានការធ្វើកិច្ចសម្ភាសន៍ផ្តាច់មុខជាមួយមន្រ្តីជាន់ខ្ពស់រដ្ឋាភិបាល ដោយរួមមានទាំង នាយករដ្ឋមន្រ្តី ហ៊ុន សែន ផ្ទាល់ ដែលកម្រនឹងផ្តល់បទសម្ភាសន៍ជាមួយសារព័ត៌មានដទៃទៀតបំផុត។ ដោយមានការផ្សាយជាភាសាខ្មែរ អង់គ្លេស និងចិន។ Fresh News បានក្លាយជាដៃទីបីរបស់រដ្ឋាភិបាល ក្នុងយុទ្ធនាការដាក់គំនាបលើប្រព័ន្ធផ្សព្វផ្សាយ។
ការពេញចិត្តរបស់រដ្ឋាភិបាលចំពោះការផ្សព្វផ្សាយព័ត៌មានរបស់ Fresh News ហាក់ដូចមានទំហំធំធេងខ្លាំង ដោយនាយករដ្ឋមន្រ្តី ហ៊ុន សែន បានប្រៀបធៀប Fresh News ជាមួយស្ថាប័នព័ត៌មានអន្តរជាតិធំៗ ដូចជា Reuters ជាដើម។ ថ្លែងក្នុងសុន្ទរកថាមួយនៅខែកញ្ញា ឆ្នាំ២០១៧ ប៉ុន្មានថ្ងៃក្រោយការចាប់ខ្លួន លោក កឹម សុខា, នាយករដ្ឋមន្រ្តី ហ៊ុន សែន បាននិយាយដូច្នេះថា «Fresh News ឥឡូវមិនត្រឹមតែមានអ្នកទស្សនាក្នុងប្រទេសប៉ុណ្ណោះទេ តែក៏ត្រូវគេតាមដានមើលនៅក្រៅប្រទេសផងដែរ។ យើងមានប្រព័ន្ធផ្សព្វផ្សាយព័ត៌មានយ៉ាងរហ័សមួយ ដែលមិនចាញ់សារព័ត៌មានបរទេស AFP, UPI, AP, ឬក៏ Reuters ឡើយ»។
អ្នកនាំពាក្យរដ្ឋាភិបាលលោក ផៃ ស៊ីផាន បានប្រាប់កាសែត Phnom Penh Post ឲ្យដឹងថា Fresh News គឺជាមធ្យោបាយមួយសម្រាប់ឲ្យរដ្ឋាភិបាលចែករំលែកព័ត៌មាន និងថាស្ថាប័នព័ត៌មាននេះ ទទួលបានព័ត៌មានដោយផ្ទាល់ពីរដ្ឋាភិបាល។ ភាពជោគជ័យរបស់ Fresh News ក៏អាចប្រៀបធៀបនឹងទៅនឹងការរិះគន់លើបណ្តាញផ្សព្វផ្សាយព័ត៌មានបែបស៊ើបអង្កេតនៅតាមប្រទេសជាច្រើនជុំវិញភពលោកផងដែរ។ តួយ៉ាងប្រធានាធិបតីអាមេរិក លោក ដូណាល់ ត្រាំ បានហៅ CNN ថា ជា «ព័ត៌មានក្លែងក្លាយ» តែស្របពេលជាមួយគ្នាក៏បានស្វាគមន៍ដៃពីរដល់សារព័ត៌មានដូចជា Fox News។ រីឯប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ វិញ បានហៅសារព័ត៌មាន Rappler ថា ព័ត៌មានក្លែងក្លាយ ដូចគ្នាផងដែរ។
ដោយមានទំនោរគាំទ្ររដ្ឋាភិបាលតាំងតែពីចាប់បើកដំបូង Fresh News បានដើរតួនាទីសកម្មខ្លាំងជាងមុន នាពាក់កណ្តាលឆ្នាំ២០១៧។ នៅមុនការចាប់ខ្លួនលោក កឹម សុខា រដ្ឋាភិបាលបានបិទអង្គការប្រជាធិបតេយ្យ NDI របស់អាមេរិក ដែល Fresh News បានអះអាងថា មានជាប់ពាក់ព័ន្ធនឹងផែនការសំដៅបំផុសបំផុលឲ្យមាន «បដិវត្តន៍ពណ៌» ដើម្បីផ្តួលរំលំរដ្ឋាភិបាល ដូចនៅអឺរ៉ុបខាងកើត និងអារ៉ាប់។ អង្គការ NDI ត្រូវបានបិទទ្វារហើយបុគ្គលិក បរទេសបីនាក់របស់អង្គការ ត្រូវបានបណ្តេញចេញពីប្រទេស។ រដ្ឋាភិបាលបានយកឯកសារដែលតាមពិតខ្លួនបានផ្តល់ឲ្យ Fresh News យកទៅចេញបញ្ចេញនោះ ធ្វើជាហេតុផលគាំទ្រដល់ការសម្រេចបិទអង្គការ NDI។
ឯកសារទាំងនេះមានប្រភពចេញពីមកពីជំនួបមួយរវាង NDI និងបក្ស CNRP ដែលក្នុងអំឡុងពេលនោះភាគីទាំងពីរបានជជែកគ្នាពីយុទ្ធសាស្រ្តយុទ្ធនាការបោះឆ្នោត។ ដោយឆ្លើយការពារខ្លួន អង្គការ NDI បានអះអាងថា ពួកគេក៏ធ្លាប់បានរៀបចំវគ្គបណ្តុះបណ្តាលស្រដៀងគ្នានេះជាមួយគណបក្សជាច្រើនផ្សេងទៀតផងដែរ រួមមានទាំងបក្សប្រជាជនកម្ពុជារបស់នាយករដ្ឋមន្រ្តី ហ៊ុន សែន។ ភស្តុតាងបន្ថែមទៀតនៃចំណងស្អិតល្មួតរវាង Fresh News និងរដ្ឋាភិបាលបានលេចឡើង នៅពេលស្ថាប័នព័ត៌មាននេះបានបញ្ចេញរូបភាពបុគ្គលិកទាំងបីនាក់របស់ NDI ដែលថតបានពេលពួកគេចាកចេញពីទឹកដីកម្ពុជា នៅឯអាកាសយានដ្ឋានអន្តរជាតិភ្នំពេញ។ អង្គការ USAID បានចេញសេចក្តីថ្លែងការណ៍ថ្កោលទោស ចំពោះការសម្រេចចិត្តគួរឲ្យខកចិត្តជាខ្លាំងនេះ ខណៈសមាជិកព្រឹទ្ធសភាអាមេរិកជាច្រើននាក់ រួមទាំងលោក John McCain ក៏បានចេញមុខថ្កោលទោសផងដែរនាពេលនោះ។
ការលេចធ្លាយឯកសារទាំងនេះ គឺជាផ្នែកនៃលំនាំមួយ។ ដោយខុសពីបណ្តាញផ្សព្វផ្សាយដទៃទៀតនៅកម្ពុជា Fresh News ទទួលបានអត្ថប្រយោជន៍ពីសិទ្ធិពិសេសនិងផ្តាច់មុខ ក្នុងការទទួលបានឯកសារពីរដ្ឋាភិបាល រួមមានទាំងដីកាកោះហៅ និងចាប់ខ្លួនរបស់តុលាការ ដែលទាំងនេះសុទ្ធតែត្រូវចេញផ្សាយជាសាធារណៈនៅលើវែបសាយព័ត៌មានមួយនេះ។ កាលពីខែមករា កន្លងទៅសកម្មជនលេចធ្លោបីនាក់ ត្រូវបានចោទប្រកាន់ពីបទរំលោភទំនុកចិត្ត នៅក្នុងសំណុំរឿងមួយ ដែលមនុស្សភាគច្រើនមើលឃើញថា មានចេតនានយោបាយនៅពីខាងក្រោយ។ បុរសទាំងបីនាក់បានដឹងអំពីការចោទប្រកាន់មកលើពួកគេ គឺនៅពេលដែលឯកសាររបស់តុលាការ ត្រូវបានចេញផ្សាយនៅលើ Fresh News។
ការបញ្ចេញព័ត៌មានរសើបៗដោយ Fresh News ក៏បានបង្កើតរឿងក្តីក្តាំងយ៉ាងស្មុគស្មាញផងដែរ សម្រាប់ក្រុមអ្នករិះគន់។ អតីតឧបនាយករដ្ឋមន្រ្តីនៃគណបក្សហ៊្វុនស៊ិនប៉ិច លូ ឡាយស្រេង ត្រូវបាន Fresh News ចែកចាយសំឡេងសន្ទនាឯកជនតាមទូរស័ព្ទ កាលពីខែតុលា ឆ្នាំ២០១៧ ដោយក្នុងនោះលោក ឡាយស្រេង បានប្រមាថព្រះចេស្តាមហាក្សត្រខ្មែរ ដោយសារការមិនជួយខិតខំការពារលទ្ធិប្រជាធិបតេយ្យនៅក្នុងប្រទេស។ លោក ស្រេង ក៏បានចោទប្រកាន់អតីតបក្សនយោបាយរបស់លោកថា បានចូលដៃចូលជើងជាមួយរដ្ឋាភិបាល ដើម្បីបំផ្លាញគណបក្ស CNRP ផងដែរ។
បន្ទាប់ពី Fresh News បានបញ្ចេញសំឡេងសន្ទនានេះ លោក ឡាយស្រេង ត្រូវបាននាយករដ្ឋមន្រ្តី ហ៊ុន សែន និងគណបក្សហ៊្វុនស៊ិនប៉ិច ប្តឹងពីបទបរិហាកេរ្តិ៍ ទោះបីជាធាតុពិតជាក់ស្តែងពាក្យសម្តីរបស់លោក ឡាយស្រេង ធ្វើឡើងក្នុងកិច្ចសន្ទនាឯកជនប៉ុណ្ណោះក៏ដោយក្តី។ លោក ឡាយស្រេង ដែលបច្ចុប្បន្នស្ថិតក្នុងវ័យ៨០ទៅហើយនោះ បានគេចខ្លួនទៅកាន់សហរដ្ឋអាមេរិកភ្លាមៗ ក្រោយការលេចធ្លាយសំឡេងនេះ។ អ្វីដែលគួរឲ្យចាប់អារម្មណ៍ គឺពុំមានការស៊ើបអង្កេតណាមួយត្រូវបានបើក ដើម្បីវែករកមុខអ្នកដែលលួចថតនិងបញ្ចេញសំឡេងសន្ទនានេះ ដែលជាទង្វើខុសច្បាប់នោះឡើយ។
ក្រៅពីការចុះផ្សាយព័ត៌មានរសើប និងការបញ្ចេញព័ត៌មានឯកជនសម្ងាត់ៗ Fresh News ក៏បានព្យាយាមជួយរដ្ឋាភិបាល ក្នុងការបង្កើតគោលនយោបាយផងដែរ។ ស្របពេលដែលរដ្ឋាភិបាលរៀបចំដើម្បីរំលាយ CNRP នាយករដ្ឋមន្រ្តី ហ៊ុន សែន បានរិះរកវិធីដើម្បីធ្វើយ៉ាងណា រក្សានូវរូបភាពបំភ័ន្តភ្នែកនៃលទ្ធិប្រជាធិបតេយ្យសេរីពហុបក្ស ប៉ុន្តែអាចលុបបំបាត់គណបក្សនយោបាយដែលមានសំឡេងឆ្នោតគាំទ្រពីប្រជាជនស្ទើរតែពាក់កណ្តាលបាន។ ពេលនោះ Fresh News បានផ្តល់ដំណោះស្រាយសម្រាប់បញ្ហានេះ នៅពេលអ្នកវិភាគអនាមិកម្នាក់ បានឲ្យជាយោបល់ថា អាសនៈរបស់ CNRP ដែលនៅទំនេរក្រោយការរំលាយ អាចយកទៅចែកចាយឲ្យគណបក្សតូចៗ ដោយអាស្រ័យលើភាគរយនៃសំឡេងឆ្នោតដែលពួកគេទទួលបានក្នុងការបោះឆ្នោតថ្នាក់ជាតិកាលពីឆ្នាំមុន។ រដ្ឋាភិបាលមិនត្រឹមប្រកាន់យកគោលនយោបាយនេះប៉ុណ្ណោះទេ តែថែមទាំងបានប្រើប្រាស់រូបមន្តដូចគ្នាបេះបិទទៅនឹងអ្វីដែលលើកឡើងដោយស្ថាប័នព័ត៌មាននេះ គឺចែកកៅអីទៅឲ្យគណបក្សដែលទទួលបានសំឡេង០៣ភាគរយ ឬតិចជាងនេះ។
អ្នកដឹកនាំ Fresh News គឺនាយកប្រតិបត្តិរបស់សារព័ត៌មាននេះឈ្មោះ លឹម ជាវុត្ថា ដែលបាននិយាយអួតអាងដោយបើកចំហអំពីទំនាក់ទំនងដ៏ជិតស្និទ្ធរបស់លោកជាមួយរដ្ឋាភិបាល និងបានប្រាប់ Buzzfeed កាលពីខែមករាឆ្នាំមុនថា «នៅពេលនាយករដ្ឋមន្រ្តី ហ៊ុន សែន ចង់ផ្សាយព័ត៌មានអ្វីមួយ គឺលោកតែងតែទូរស័ព្ទមករកខ្ញុំ»។ លោក លឹម ជាវុត្ថា ជាបុគ្គលដែលមានចំណងស្និទ្ធស្នាលជាមួយសេដ្ឋីផ្នែកនយោបាយរបស់កម្ពុជា ដោយលោកត្រូវគេមើលឃើញមានវត្តមាននៅក្នុងពិធីមង្គលការកូនស្រីរបស់លោក គិត ម៉េង ដែលមានទំនាក់ទំនងជិតស្និទ្ធនឹងនាយករដ្ឋមន្រ្តី ហ៊ុន សែន។
នៅក្នុងឈុតឆាកមិនគួរឲ្យជឿមួយ លោក ជាវុត្ថា បាននាំយកលុយ៦០,០០០ដុល្លារដោយផ្ទាល់ពីនាយករដ្ឋមន្រ្តី ហ៊ុន សែន ដើម្បីប្រគល់ជូនគ្រួសារសកម្មជន និងអ្នកវិភាគនយោបាយ លោក កែម ឡី ក្រោយករណីឃាតកម្មលើរូបលោក នៅឯការ៉ាស់សាំងមួយកន្លែងកាលពីឆ្នាំ២០១៦។ ករណីឃាតកម្មនេះទំនងបានឆ្លុះបញ្ចាំងឡើងវិញពីសម័យកាលអំពើហិង្សាផ្នែកនយោបាយនៅកម្ពុជា ដែលមនុស្សគ្រប់គ្នាសង្ឃឹមថា បានកន្លងផុតបាត់ទៅហើយ។ នៅក្នុងសារបង្ហោះលើ Facebook លោក សម រង្ស៊ី បានហៅករណីឃាតកម្មនេះថា «ការលួចធ្វើឃាត» និងជា «អំពើភេរវកម្មរបស់រដ្ឋាភិបាល»។
ថ្លែងក្នុងបទសម្ភាសន៍មួយនាពេលថ្មីៗនេះជាមួយ Coda លោក លឹម ជាវុត្ថា បានបដិសេធថា មិនមានទំនាក់ទំនងផ្លូវការណាមួយជាមួយរដ្ឋាភិបាលឡើយ ប៉ុន្តែលោកបានការពារចំពោះជំហរគាំទ្ររដ្ឋាភិបាលរបស់លោក។ លោក ជាវុត្ថា បាននិយាយដូច្នេះថា «ព័ត៌មានក្លែងក្លាយនៅកម្ពុជា ត្រូវបានប្រឌិតឡើងដោយមនុស្សមួយក្តាប់ ដោយសារតែពួកគេមិនចូលចិត្ត ឬមិនគាំទ្ររដ្ឋាភិបាល»។
លោកក៏បានលើកឡើងផងដែរថា តួនាទីមួយរបស់ Fresh News គឺរំលេចនូវសកម្មភាពលើកស្ទួយសង្គមរបស់រដ្ឋាភិបាល។ «រដ្ឋាភិបាលបានព្យាយាមកសាង អភិវឌ្ឍន៍ ធ្វើអំពើល្អ ដើម្បីជួយប្រជាជនតាមមធ្យោបាយផ្សេងៗជាច្រើន រៀបរាប់មិនអស់នោះឡើយ។ ដូច្នេះបើតាមគំនិតខ្ញុំ ហើយក្នុងនាមជាកូនខ្មែរម្នាក់ ខ្ញុំមើលឃើញនូវទង្វើល្អពិតប្រាកដរបស់រដ្ឋាភិបាល ចឹងតើហេតុអ្វីបានខ្ញុំមិនអាចចេញផ្សាយវាបាន? ហេតុអ្វីបានខ្ញុំមិនអាចចេញផ្សាយវា ដោយសារតែរដ្ឋាភិបាលកំពុងតែជួយសង្គម ជួយពលរដ្ឋក្រីក្រ ជួយអភិវឌ្ឍន៍ សាងសង់សាលារៀន បរិច្ចាគជំនួយដល់ប្រជាជន ដែលរងផលប៉ះពាល់ដោយសារទឹកជំនន់ និងអ្វីៗជាច្រើនទៀត?» នេះបើតាមសម្តីលោក លឹម ជាវុត្ថា នាយកប្រតិបត្តិអង្គភាពព័ត៌មាន Fresh News បញ្ជាក់បន្ថែម។
.............
ដោយ៖ សារព័ត៌មានបរទេស Coda Story
ទីស្នាក់ការកណ្តាល នៅទីក្រុង New York សហរដ្ឋអាមេរិក
