(ភ្នំពេញ)៖ លោក វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានស្នើឲ្យអគ្គនាយកដ្ឋានផលិតកម្មសត្វ ត្រូវពង្រឹងការអនុវត្តនីតិវិធី នៃការដឹកជញ្ជូនសត្វ ការធ្វើចរាចរណ៍សត្វ និងផលិតផលសត្វ ការតាំងលក់ និងដឹកជញ្ជូនផ្ទាំងសាច់ ឲ្យបានត្រឹមត្រូវតាមបច្ចេកទេស។

ការស្នើយ៉ាងដូច្នេះ បានធ្វើឡើងក្នុងឱកាសដែល លោក វេង សាខុន អញ្ជើញបិទកិច្ចប្រជុំ បូកសរុបលទ្ធផលការងារឆ្នាំ២០១៨ និងលើកទិសដៅអនុវត្តការងារបន្ត ឆ្នាំ២០១៩ របស់អគ្គនាយកដ្ឋានផលិតកម្មសត្វ នារសៀលថ្ងៃទី២២ ខែកុម្ភៈ ឆ្នាំ២០១៩។

លោក វេង សាខុន បានលើកឡើងយ៉ាងដូច្នេះថា «ត្រូវពង្រឹងការអនុវត្តនីតិវិធី នៃការដឹកជញ្ជូនសត្វ ការធ្វើចរាចរណ៍សត្វ និងផលិតផលសត្វ ការតាំងលក់ និងដឹកជញ្ជូនផ្ទាំងសាច់ ឲ្យបានត្រឹមត្រូវតាមបច្ចេកទេស ដើម្បីលើកកម្ពស់អនាម័យសត្វ ផលិតផលសត្វ គុណភាព និងអនាម័យចំណីសត្វ និងបសុឱសថ»។

រដ្ឋមន្ដ្រីក្រសួងកសិកម្ម បានបញ្ជាក់ថា ការធ្វើបែបនេះ ក្នុងគោលបំណងធានាគុណភាព សុវត្ថិភាពសាច់និងផលិតផលសត្វ និងបង្កើនប្រសិទ្ធភាពលើការបង្ការ ទប់ស្កាត់ និងការពារជំងឺឆ្លងសត្វ ជំងឺស៊ូណូស ដើម្បីលើកកម្ពស់ សុខភាពសាធារណៈ។

ជាមួយគ្នានោះ លោក វេង សាខុន បានបន្ថែមថា ត្រូវបន្តយកចិត្តទុកខ្ពស់ ដល់ការគ្រប់គ្រង កាកសំណល់ពីសត្វ បញ្ហាអនាម័យ នៅតាមបណ្តាសត្តឃាតដ្ឋាន កសិដ្ឋាន កន្លែងចិញ្ចឹមសត្វ តាមរយៈការអប់រំ ផ្សព្វផ្សាយការអនុវត្តល្អ ប្រសើរលើការចិញ្ចឹមសត្វ ការសាងសង់ឡជីវឧស្ម័ននៅកសិដ្ឋានចិញ្ចឹមសត្វ និងគ្រួសារ។

លោករដ្ឋមន្ដ្រី បានគូសបញ្ជាក់ទៀតថា ត្រូវចាត់វិធានការទប់ស្កាត់ នូវរាល់បទល្មើសដូចជា ការនាំចូលសត្វ សាច់សត្វ ចំណីសត្វ វត្ថុធាតុដើមផ្សំចំណីសត្វថ្នាំការពារ និងព្យាបាលសត្វខុស ច្បាប់តាមច្រករបៀងនាបណ្តាខេត្ត នៅជាប់ព្រំដែន ដោយត្រូវសហការជាមួយសមត្ថកិច្ចពាក់ព័ន្ធ ទាំងអស់ប្រយោជន៍ ដើម្បីការពារជំងឺឆ្លងសត្វ គ្រប់គ្រងស្ថិតិសត្វ ចលនាសត្វ និងផលិតផលសត្វឲ្យបានសុក្រឹត្យ៕