(ភ្នំពេញ)៖ អគ្គិភ័យមួយកន្លែងដែលកើតឡើង នៅសិប្បកម្មឈើ ស្ថិតនៅតាមបណ្ដោយផ្លូវ២០០៤ ក្នុងក្រុម១ ភូមិត្រពាំងល្វា១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ បានរលត់ទៅវិញហើយ នៅល្ងាចថ្ងៃទី២២ ខែកុម្ភៈ ឆ្នាំ២០១៩នេះ បន្ទាប់ពីកម្លាំងសមត្ថកិច្ចបានជួយអន្ដរាគមន៍ ដើម្បីសង្គ្រោះករណីនេះ។

លោក ព្រហ្ម យ៉ត នាយការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា សិប្បកម្មឈើដែលត្រូវភ្លើងឆេះនេះ ឈ្មោះ កៅ​ សុវណ្ណ ភេទប្រុស អាយុ​៤៥ឆ្នាំ។ ប្រភេទសំណង ផ្ទះឈើស័ង្កសី ទំហំ៦ម៉ែត្រ គុណ១៧ម៉ែត្រ ខូចខាតទាំងស្រុង និងសម្ភារ​ប្រើប្រាស់ប្រចាំថ្ងៃ ឯកសារមួយចំនួន និងបានឆ្លង​ទៅផ្ទះសិប្បកម្មឈើដៃឯក​​បន្តិបន្ទួច។​

ដោយឡែក សម្រាប់ប្រតិបត្តិការជួយសង្រោះវិញ រថយន្តការិយាល័យអគ្គិភ័យ ចេញទៅចំនួន១០គ្រឿង ប្រើប្រាស់ទឹកអស់៤ឡាន, រថយន្ត​កងពលតូចលេខ៧០ ចំនួន៥គ្រឿង ប្រើប្រាស់ទឹកអស់ចំនួន៣ឡាន, រថយន្ត​ក្រុមហ៊ុនOCIC ទីក្រុងកោះពេជ្រ ចំនួន៤គ្រឿង ពុំបានប្រើប្រាស់ទឹក, រថយន្ត​កងរាជអាវុធហត្ថ ចំនួន៥គ្រឿង ប្រើប្រាស់ទឹកអស់ចំនួន៣ឡាន និងរថយន្តភេវកម្មចំនួន១គ្រឿង។

យ៉ាងណាមិញ ​គ្រោះថ្នាក់សង្គមមួយនេះ មិនបណ្ដាលឲ្យពលរដ្ឋណាម្នាក់រងគ្រោះ ឬស្លាប់បាត់បង់ជីវិតនោះទេ ខណៈដែលមូលហេតុ សមត្ថកិច្ចជំនាញកំពុងស្រាវជ្រាបន្ដទៀត៕