(កោះកុង)៖ ដោយមានការចង្អុលបង្ហាញពីលោកឧត្តមសេនីយ៍ទោ សំឃិត វៀន ស្នងការនគរបាលខេត្តកោះកុង និងលោកឧត្តមសេនីយ៍ត្រី ញ៉ែម តារា ស្នងការរងខេត្តកោះកុង បានដឹកនាំកម្លាំងនគរបាលខេត្ត សហការជាមួយលោកចៅសង្កាត់ មេភូមិ ចុះចែកទឹកជូនប្រជាពលរដ្ឋដែលមានផលប៉ះពាល់ កង្វះទឹកប្រើប្រាស់ដែលស្ថិតនៅចំណុចភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង។
លោកឧត្តមសេនីយ៍ត្រី ញ៉ែម តារា បានថ្លែងឲ្យដឹងថា លោកបានដឹកនាំកម្លាំងនគរបាល និងរថយន្តពន្លត់អគ្គីភ័យចំនួន២គ្រឿង បានចុះចែកទឹកជូនប្រជាពលរដ្ឋ នៅចំណុចភូមិ៤ សង្កាត់ដងទង់ ក្រុងខេមរភូមិន្ទ ដែលកំពុងខ្វះទឹកប្រើប្រាស់ប្រចាំថ្ងៃ រយៈពេល១ខែមកហើយ។
លោក ញ៉ែម តារា បានបន្តថា ដោយមានការចង្អុលបង្ហាញពីឧត្តមសេនីយ៍ទោ សំឃិត វៀន បានដាក់បញ្ជាឲ្យដឹកទឹកចែកជូនប្រជាពលរដ្ឋ ដែលខ្វះទឹកប្រើប្រាស់ដែលពួកគាត់រស់នៅ ទីតាំងខាងលើនេះ មានរយៈពេលជាច្រើនថ្ងៃមកហើយ ដែលធ្វើឲ្យពួកគាត់ជួបផលលំបាកយ៉ាងខ្លាំង ត្រូវសន្សំសំចៃទឹក ដែលបានស្តុកទុក នៅក្នុងពាង ឬអាង បន្តិចបន្តួចដែលពួកគាត់រស់តាមតំបន់មាត់ព្រែកខ្វះទឹកប្រើប្រាស់ទៀតផង។
លោកបន្ថែមថា ទាក់ទិននឹងបញ្ហាកង្វះទឹកស្អាតប្រើប្រាស់នេះ អាជ្ញាធរត្រូវរិះរកគ្រប់មធ្យាបាយគ្រប់កាលៈទេសៈ ដើម្បីធ្វើការដោះស្រាយជូនពលរដ្ឋ ព្រោះទឹកមានសារៈសំខាន់ណាស់ក្នុងក្រុមគ្រួសារនីមួយៗ៕
