​(សៀមរាប)៖ នៅព្រឹកថ្ងៃ​​ទី១៧ ខែកុម្ភៈ ឆ្នាំ២០១៩នេះ លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបរសសកម្មពិសេស ក្នុងនាមរាជរដ្ឋាភិបាលកម្ពុជា បានអញ្ជើញចាត់ចែង និងជូនដំណើរជនជាតិ​ម៉ាឡេស៊ីទាំង៤៧នាក់ នៅអាកាសយាន្តដ្ឋានអន្តរាជាតិក្រុងសៀមរាប បន្ទាប់ពីត្រូវ​សាលាដំបូងខេត្តបន្ទាយមានជ័យ ​ចេញដីកា​បង្គាប់ឱ្យដោះលែង​នៅក្រៅឃុំជាបណ្តោះអាសន្ន កាលពីថ្ងៃទី១៥ ខែកុម្ភៈ ឆ្នាំ២០១៩​កន្លងទៅនេះ។​

គួរបញ្ជាក់ថា ប្រធានពន្ធនាគារខេត្តបន្ទាយមានជ័យ លោកឧត្តមអគ្គានុរក្ស២ អ៊ុង ស៊ីផាន កាលពីថ្ងៃទី១៥ ខែកុម្ភៈ ឆ្នាំ២០១៩ បានចេញលិខិតដោះលែង ជនជាតិម៉ាឡេស៊ីទាំង៤៧នាក់ ដោយអនុវត្តតាមដីកាបង្គាប់ឱ្យដោះលែងរបស់លោកចៅក្រមស៊ើបសួរសាលាដំបូងខេត្តបន្ទាយមានជ័យ​។ ពួកគេទាំង៤៧នាក់ ត្រូវបានជាប់ចោទពីបទ ឆបោក បើកកន្លែងល្បែងស៊ីសង ការកាន់កាប់ល្បែងស៊ីសង និងចាត់ចែងល្បែងស៊ីសង​។

ក្នុងពេលជូនដំណើរនៅព្រឹកមិញនេះ ដោយសារតែក្នុងចំណោមពួកគេទាំង៤៧នាក់ មាន៣នាក់រស់នៅរដ្ឋ Selangor និងម្នាក់នៅទីក្រុងគូឡាឡាំពួរ ទើបពួកគាត់ទាំង៤ ត្រូវបានចាត់ចែងឲ្យចេញដំណើរដោយឡែក ឆ្ពោះទៅកាន់ទីក្រុងគូឡាឡាំពួរ តាមរយៈយន្តហោះ Air Asia ​ជើងហោះហើរលេខ​AK 543 នៅ​វេលាម៉ោង​០៨៖៣៥នាទី​ព្រឹក។

ចំណែកការចេញដំណើរជើងបន្ទាប់ គឺមានចំនួន​៤៣នាក់ ដែលមកពី​រដ្ឋ Sarawak ៤០នាក់ និង​Sabah ៣នាក់ ត្រូវបានរដ្ឋាភិបាលម៉ាឡេស៊ី បានចាត់ចែងយន្តហោះឯកជន​របស់ ក្រុមហ៊ុន JC International Airlines ធ្វើដំណើរឆ្ពោះទៅកាន់ទីក្រុង Kuching រដ្ឋ Sarawak នៅវេលាម៉ោង១០ព្រឹក៕