(ភ្នំពេញ)៖ ត្រឹមតែរយៈពេល៨ម៉ោងប៉ុណ្ណោះ នឹងអាចរកឃើញនូវមេរោគជំងឺកាចសាហាវចំនួន៣ប្រភេទរួមមាន៖ ជំងឺរលាកថ្លើមប្រភេទ B និងC, ជំងឺមហារីកមាត់ស្បូន (វីរុស HPV) និងជំងឺរបេង (MTB) ដែលសុទ្ធសឹងតែប្រភេទជំងឺ ដែលមានការរីករាលដាលយ៉ាងខ្លាំងនៅសង្គមបច្ចុប្បន្ននេះ ដើមហេតុនេះបានធ្វើឲ្យមន្ទីរពេទ្យជោរៃភ្នំពេញ បាននាំយកនូវម៉ាស៊ីនទំនើបមួយប្រភេទ REAL-TIME PCR ដំបូងគេនៅកម្ពុជា ដែលមានតួនាទីពិសេស ក្នុងការកំណត់រោគសញ្ញាបានយ៉ាងឆាប់រហ័ស។

នាព្រឹកថ្ងៃទី១៥ ខែកុម្ភៈ ឆ្នាំ២០១៩ នេះ មន្ទីរពេទ្យជោរៃភ្នំពេញ បានសហការជាមួយក្រុមហ៊ុន Veit A បានសម្ពោធដាក់ឲ្យដំណើរការ ម៉ាស៊ីន REAL-TIME PCR ដែលមានតួនាទីខ្ពស់ ក្នុងពិនិត្យរោគវិនិច្ឆ័យ បានយ៉ាងឆាប់រហ័ស ហើយពិធីសម្ពោធនូវម៉ាស៊ីនទំនើបថ្មីទើបនាំចូលមកនេះ ក៏បានការចូលរួមពី វេជ្ជបណ្ឌិត ត្រាន់ ថាញ់ទុង អគ្គនាយកមន្ទីរពេទ្យជោរៃភ្នំពេញ, លោក ង្វៀន ដានវ៉ី អនុប្រធានក្រុមហ៊ុន Veit A រួមនឹងថ្នាក់ដឹកនាំមន្ទីរជោរៃភ្នំពេញជាច្រើននាក់ទៀតផងដែរ។

នាឱកាសនោះ លោកវេជ្ជបណ្ឌិត ឡេ វ៉ាន់ថាញ់ ប្រធានផ្នែកមន្ទីរពិសោធន៍ នៃមន្ទីរពេទ្យជោរៃភ្នំពេញ បានលើកឡើងថា «ម៉ាស៊ីននេះគឺថ្មីបំផុតនៅក្នុងប្រទេសកម្ពុជា ហើយវាធ្វើការពិនិត្យវិនិច្ឆ័យ រករោគសញ្ញានៃជំងឺ បានលឿន និងឆាប់រហ័សដោយចំណាយពេលត្រឹមតែ៨ម៉ោង ឬ១ថ្ងៃប៉ុណ្ណោះ អាចទទួលបានលទ្ធផល ខុសប្លែកពីមុនដោយចំណាយពេលចាប់ពី៣ថ្ងៃ ដល់មួយសប្ដាហ៍ទើបទទួលបានលទ្ធផល»។

គួរជម្រាបថា គុណសម្បត្តិរបស់ Real Time PCR (Real-time polymerase chain reaction) ធៀបទៅនឹង PCR ធម្មតា គឺថាដំណើរការទាំងមូលពី ការពង្រីក DNA ទៅការវិភាគត្រូវបាន អនុវត្តនៅក្នុងបំពង់តែមួយ។ នេះខុសពី PCR ធម្មតា ដែលផលិតផល PCR ត្រូវបានផ្លាស់ប្តូរ និងរៀបចំទៅជាទម្រង់ផ្សេង។ ជាលទ្ធផលការថយចុះលទ្ធភាព នៃការឆ្លងគ្នារជាមួយនឹងវិធីសាស្រ្ត Real Time PCR។

REAL TIME PCR បានក្លាយទៅជាគ្រឹះនៃការធ្វើរោគវិនិច្ឆ័យម៉ូលេគុល និងការធ្វើរោគវិនិច្ឆ័យ និងការគ្រប់គ្រងជំងឺដូចជា៖ រាប់មេរោគ៖ មេរោគរលាកថ្លើមប្រភេទ B វីរុសជំងឺរលាកថ្លើមប្រភេទ C មហារីកមាត់ស្បូន (វីរុស HPV), ជម្ងឺរបេង(MTB) ។ គុណសម្បត្តិផ្សេងទៀតរបស់ Real Time PCR គឺសមត្ថភាពក្នុងការសម្គាល់ចំនួន ក្នុងកំឡុងពេលដំណើរការ PCR ។ Real Time PCR វាស់បរិមាណ ក្នុងដំណាក់កាលនិទស្សន្តចំណែកឯ Standard PCR វាស់បរិមាណក្នុងដំណាក់ ក្នុងដំណាក់កាល Plateau។ វាមានប្រសិទ្ធិភាពជាងមុនក្នុងការវាស់ស្ទង់អំឡុងដំណាក់កាល អិចស្ប៉ូណង់ស្យែងដោយសារតែ ការវាស់ស្ទង់កំឡុងពេល Plateau មិនបង្ហាញបរិមាណចាប់ផ្តើម។

ជាមួយគ្នានោះ លោក ង្វៀន ដានវ៉ី បានបញ្ជាក់ថា «ក្រុមហ៊ុន Veit A ជាក្រុមហ៊ុនដែលសហការជាមួយបណ្ដាមន្ទីរពេទ្យប្រមាណ៧០% នៅក្នុងប្រទេសវៀតណាម ហើយថ្ងៃនេះបានសហការជាមួយ មន្ទីរពេទ្យជោរៃភ្នំពេញ ដាក់ដំណើរការសេវាកម្ម រាប់មេរោគរលាកថ្លើមប្រភេទ B,c និងវីរុស HPV, ជម្ងឺរបេង MTB ដើម្បីឲ្យប្រជាពលរដ្ឋមានភាពងាយស្រួល ក្នុងការទទួលបានសេវាមួយនេះទាន់ពេលវេលា»។

តំណាងក្រុមហ៊ុន Veit A រូបនេះបន្ថែមថា «បើតាមខ្ញុំដឹងម៉ាស៊ីនរាប់មេរោគនេះ គឺមានជាលើកដំបូងនៅក្នុងមន្ទីរពេទ្យជោរៃភ្នំពេញ ក៏ដូចជានៅក្នុងប្រទេសកម្ពុជាផងដែរ ហើយរាល់ការទទួលសេវកម្មនេះម្ដង គឺមានតម្លៃថោកជាង២០ភាគរយនៃការទទួលសេវានេះនៅប្រទេសវៀតណាម»៕