(ភ្នំពេញ)៖ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) នៅថ្ងៃទី១២ ខែកុម្ភៈ ឆ្នាំ២០១៩នេះ បានអំពាវនាវឲ្យអ្នកនយោបាយពឹងបរទេសបំផ្លាញជាតិសាសន៍ឯង​ ល្មមស្គាល់ការពិត និងបញ្ឈប់នូវទង្វើមហាលាមក ក្នុងបំផ្លិចបំផ្លាញសេដ្ឋកិច្ចជាតិឯង​ ដើម្បីបំរើមហិច្ឆតាអំណាចរបស់ខ្លួនហើយ។

ទោះបីលោក ហេង រតនា មិនបញ្ជាក់ឈ្មោះចំថា អ្នកនយោបាយពឹងបរទេសនោះជានរណាក្តី ប៉ុន្តែគេដឹងថា សំដៅទៅលើក្រុមទណ្ឌិត សម រង្ស៊ី ដែលកំពុងរត់ចោលស្រុក និងតែងតែអំពាវនាវឲ្យបរទេស ជាពិសេសអឺរ៉ុបដាក់ទណ្ឌកម្មលើរាជរដ្ឋាភិបាលកម្ពុជា ខណៈដែលអឺរ៉ុបទើបប្រកាសដំណើរការ នីតិវិធីព្យួរប្រព័ន្ធអនុគ្រោះពន្ធ EBA នៅថ្ងៃទី១១ ខែកុម្ភៈ ឆ្នាំ២០១៩។

លោកអគ្គនាយកស៊ីម៉ាក់ បានលើកឡើងថា «សូមអំពាវនាវខែ្មរក្រមាយាទល្អ ជាអ្នកនយោបាយពឹងបរទេសបំផ្លាញជាតិសាសន៍ឯង​ ល្មមស្គាល់ការពិត និងបញ្ឈប់នូវទង្វើមហាលាមក ក្នុងបំផ្លិចបំផ្លាញសេដ្ឋកិច្ចជាតិឯង​ ដើម្បីបំរើមហិ្ឆតាអំណាចរបស់ខ្លួន។ នេះជាទង្វើបំផ្លាញខ្លួនឯង និងបក្សពួកខ្លួនផងដែរ»។

ជាមួយគ្នានេះ លោក ហេង រតនា បានលើកយកករណីនៅប្រទេសលីប៊ី ដែលខ្ទេចខ្ទីដោយសង្គ្រាម បង្កឡើងដោយប្រទេសអឺរ៉ុបខ្លះ បាននាំលីប៊ីពីឋានសួគ៌ ក្លាយទៅជាឋាននរក។

លោកបានលើកឡើងថា «ប្រទេសអឺរ៉ុបខ្លះ បានប្រែក្លាយប្រទេសលីប៊ី ពីឋានសួគ៌ទៅជាឋាននរក? តើវាជាយុទ្ធសាស្ត្រត្រឹមត្រូវ​ ឬជាកំហុសឆ្គងមិនអាចអត់អោនឲ្យបាន? ទង្វើពួកអឺរ៉ុបនោះដើម្បីបុព្វហេតុប្រជាធិបតេយ្យ​ សិទិ្ធមនុស្ស​ និងសិទ្ធការងារមែនទេ? ប្រជាជនលីប៊ី បានក្លាយពីភាពសំបូរសប្បាយថ្លៃថ្នូរ ទៅជាទាសករសំរាប់ដាក់លក់ដេញថ្លៃ ខាងកំលាំងពលកម្ម​ដូចសត្វធាតុ? ក្លាយជាជនភៀសខ្លួន រាប់លាននាក់រត់ចោលស្រុក?»។

លោកបន្តថា ឥឡូវនេះពួកអ្នកប្រព្រឹតិ្ត ក្នុងការបង្កសង្គ្រាមទំលាក់គ្រាប់បែកលើប្រទេស និងប្រជាជនលីប៊ីមកពីអឺរ៉ុប មានប្រទេសបារាំង​ អង់គ្លេស​ និងនរ័វេស្ស​ ដែលបង្កសង្គ្រាមនេះជាង០៨ឆ្នាំហើយ​ (២០១១)​ ធ្វើឲ្យប្រទេសលីប៊ីបែកបាក់ជាតិ ​ដោយចែកតំបន់កាន់កាប់ តាមក្រុមឧទ្ទាម​ជាច្រើនតំបន់ និងរដ្ឋាភិបាលមួយមិនអាចគ្រប់គ្រង ប្រទេសរបស់ខ្លួនបានឡើយ! ការចលាចល​ និងកាប់សម្លាប់​ អសន្តិសុខ​ បន្តគ្មានទីបញ្ចប់! ហើយថ្មីៗនេះ​ រដ្ឋាភិបាលនរ័វេស្ស ដែលចូលរួមសង្គ្រាម (ទម្លាក់គ្រាប់បែក)​ និយាយថា ​មិនដឹងធ្វើម៉េចដោះស្រាយបានទេ! នេះជាការគិតខុសរបស់ពួកអឺរ៉ុបខ្លះ​ មិននឹកស្មានថា វាជាយុទ្ធសាស្ត្របាចអង្កាម​បញ្ច្រាស់ខ្យល់​ ដែលធ្វើឲ្យជំនន់ជនភៀសខ្លួនហូរចូលអឺរ៉ុប​ និងធ្វើឱយអឺរ៉ុបចលាចល​ ដែលអឺរ៉ុបល្បីខាងគោរពសិទិ្ធមនុស្ស​ ក្លាយជាអឺរ៉ុបរំលោភសិទ្ធិមនុស្ស​ (ព្រោះមិនទទួលយកជនភៀសខ្លួន)។

លោក ហេង រតនា បានលើកឡើងទៀតថា «សង្ឃឹមថាពួកអឺរ៉ុបខ្លះ​ នឹងមិនចូលរួមបង្កការលំបាកនៅកម្ពុជា​ និងក្នុងតំបន់អាស៊ាន​ ដោយគិតយុទ្ធសាស្ត្រខុសដូចនៅលីប៊ីទេ! ប្រជាជនកម្ពុជា ឆ្អែតឡើងឆ្អល់នឹងសង្គ្រាមហើយ​ ហើយប្រាថ្នាចង់បានតែសន្តិភាព និងការអភិវឌ្ឍន៍​ ដោយពង្រឹងលទិ្ធប្រជាធិបតេយ្យ និងសិទិ្ធមនុស្សតាមសង្គមវប្បធម៌របស់ខ្លួន!»៕