(កំពង់ចាម)៖ លោក មួន វាសនា ទីប្រឹក្សាសម្ដេចពញាចក្រី ហេង សំរិន និងជាប្រធានគណៈគ្រប់គ្រងនៃសកលវិទ្យាល័យគ្រប់គ្រង និងសេដ្ឋកិច្ច UME បានថ្លែងប្រាប់និស្សិតឲ្យចេះរៀបចំផែនការ ក្នុងការសិក្សាដើម្បីទទួលបានជោគជ័យនាថ្ងៃអនាគត។
លោក មួន វាសនា បានលើកឡើងដូច្នេះ ក្នុងឱកាសដឹកនាំក្រុមសាស្រ្តាចារ្យ នៃប្រទេសអូស្ត្រាលីមកផ្ដល់បទពិសោធន៍ល្អៗ ដល់ក្រុមនិស្សិតប្រមាណជាង២០០នាក់ នៅល្ងាចថ្ងៃទី០៩ ខែកុម្ភៈ ឆ្នាំ២០១៩ នៅសាកលវិទ្យាល័យ គ្រប់គ្រង និងសេដ្ឋកិច្ច UME សាខាខេត្តកំពង់ចាម។
លោក មួន វាសនា បានថ្លែងថា ឆ្លងតាមការសង្កេតរបស់លោកឃើញថាប្រជាពលរដ្ឋជាច្រើន ដែលពួកគាត់ប្រកបមុខរបរ ដោយគ្មានផែនការជាក់លាក់ ពុំសូវឃើញពួកគាត់ទទួលបានជោគជ័យនោះទេ។ ដោយឡែក មានប្រជាពលរដ្ឋមួយចំនួន ដែលពួកគាត់ប្រកបមុខរបរកសិកម្ម ឬប្រកបមុខរបរអាជីវកម្មផ្សេងៗ ដោយមានផែនការជាក់លាក់ ឃើញថាពួកគាត់តែងតែទទួលបានជោគជ័យជីវភាពគ្រួសាររបស់ពួកគាត់ធូរធា។
ប្រធានគណៈគ្រប់គ្រងសាកលវិទ្យាល័យគ្រប់គ្រង និងសេដ្ឋកិច្ច បានបន្ថែមថា ក្រុមនិស្សិតគួរតែមានការខិតខំសិក្សាស្រាវជ្រាវឲ្យបានច្រើន ដើម្បីបន្ថែមចំណេះដឹងរបស់ខ្លួន ដែលការសិក្សាស្រាវជ្រាវនោះ មានរូបមន្ត៥ដំណាក់កាលដែលគួរធ្វើ។
ដំណាក់កាលទី១ គឺកំណត់រកឲ្យឃើញអ្វីមួយដែលយើងចង់ស្រាវជ្រាវ, ដំណាក់កាលទី២៖ ត្រូវស្រាវជ្រាវតាមប្រព័ន្ធ អ៊ីនធឺណិតដូចជា Youtube ឬ Google ជាដើម, ដំណាក់កាលទី៣៖ ត្រូវប្រមូលទិន្នន័យឲ្យបានច្រើន តាមរយៈដែលយើងបានចុះទៅដល់ទីកន្លែង និងតាមរយៈការសាកសួរ ស្ទាបស្ទង់ និងសង្កេតកត់ត្រា ពីមនុស្ស ឬអាជ្ញាធរនៅតំបន់នោះ, ដំណាក់កាលទី៤៖ ធ្វើការវិភាគទៅលើទិន្នន័យដែលយើងទទួលបាន និងដំណាក់កាលទី៥៖ យើងត្រូវសរសេរកំណត់ ហេតុទុក ដើម្បីយកទៅធ្វើការសាកសួរអ្នកមានចំណេះដឹងខ្ពង់ខ្ពស់ ពិភាក្សាលើទិន្នន័យទាំងនោះ ដើម្បីទទួលបានចំណេះដឹង។ ចំណេះដឹងទាំងនេះ យើងអាចយកមករៀបចំផែនការ ទាំងការសិក្សា និងការចេញប្រកបការងារ ដើម្បីទទួលបានជោគជ័យនៅក្នុងឆាកជីវិតរបស់ខ្លួន៕
