(ភ្នំពេញ)៖ ឧបនាយករដ្ឋមន្ត្រី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នៅថ្ងៃទី០៦ ខែកុម្ភៈ ឆ្នាំ២០១៩ បានចេញប្រកាសដើម្បីកែសម្រួលការតែងតាំងមន្រ្តីទូតមួយចំនួន។ នេះបើយោងតាមសេចក្តីប្រកាស ដែលអង្គភាពព័ត៌មាន Fresh News ទទួលបាននៅថ្ងៃទី០៧ ខែកុម្ភៈ ឆ្នាំ២០១៩។
យោងតាមប្រកាសបានឲ្យដឹងថា ក្រសួងបានសម្រេចលុបចោល ការតែងតាំងមន្ត្រីរាជការចំនួន២រូប ដែលមានក្នុងប្រកាសចុះថ្ងៃទី១៧ ខែមករា ឆ្នាំ២០១៩ ដូចខាងក្រោម៖
* ១៖ លោក ហេង ហុក ជាលេខាធិការទី១ នៃស្ថានឯកអគ្គរាជទូត និងអង្គការអន្តរជាតិ ប្រចាំសហភាពមីយ៉ាន់ម៉ា។
* ២៖ កញ្ញា តាន់សូលីដា ជាលេខាធិការទី១ នៃស្ថានបេសកកម្មអចិន្ត្រៃយ៍កម្ពុជា ប្រចាំមន្ទីរអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ ប្រទេសស្វីស។
ក្រៅពីនេះ ក្រសួងការបរទេស ក៏បានសម្រេចតែងតាំងមន្ត្រីរាជការ ឱ្យទៅបំពេញភារកិច្ច នៅក្រៅប្រទេសរួមមាន៖
* ស្ថានឯកអគ្គរាជទូតកម្ពុជាប្រចាំសហភាពមីយ៉ាន់ម៉ា គឺលោក ម៉ៅ ដារ៉េត ត្រូវបានតែងតាំងជាលេខាធិការទី១ ជំនួសលោក សូ ប៊ុណ្ណា។
* ស្ថានបេសកកម្មអចិន្ត្រៃយ៍កម្ពុជា ប្រចាំមន្ទីរអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ ប្រទេសស្វីស គឺលោក សាយ ប៊ុនឆេង ត្រូវបានតែងតាំងជាលេខាធិការទី១ ជំនួសលោក វ៉េ វុទ្ធា ផងដែរ។
ក្រៅពីនេះ លោក ហេង ហុក ក៏ត្រូវបានតែងតាំងជាអនុប្រធានសវនកម្មផ្ទៃក្នុង ជំនួសលោក ប៉ូ ស៊ីវុត្ថា ដែលចូលនិវត្តន៍ ផងដែរ៕
