(ភ្នំពេញ)៖ ពិតជាគួរឱ្យសោកស្តាយជាទីបំផុត ដែលសហរដ្ឋអាមេរិក តាមរយៈស្ថានទូតរបស់ខ្លួនប្រចាំនៅកម្ពុជាបានបង្ហាញចរិតក្រអឺតក្រទម តាំងខ្លួនជាចៅហ្វាយនាយកម្ពុជា រំលោភលើគោលការណ៍ការទូតបង្គាប់បញ្ជាមកលើកម្ពុជាដែលជារដ្ឋអធិបតេយ្យភាព និងឯករាជ្យ និងព្យាយាមបំភ្លៃប្រវត្តិសាស្ត្រពិត។

តាមរយៈសេចក្តីថ្លែងការណ៍របស់ខ្លួននៅថ្ងៃទី៣០ ខែមករា ឆ្នាំ២០១៩ អាមេរិកបានអំពាវនាវឱ្យប្រទេសកម្ពុជាប្រកាន់ខ្ជាប់នូវនយោបាយការបរទេសឯករាជ្យ អធិបតេយ្យភាព និងប្រកបដោយតុល្យភាពដែលរក្សាបាននូវអនាគតរបស់ប្រទេសសម្រាប់​ប្រជាជនកម្ពុជាទាំងអស់ បន្ទាប់ពីបន្ទោសកម្ពុជាថា លម្អៀងទៅរកមហាអំណាចមួយបង្កវិនាសសកម្ម សម្លាប់ ប្រជាជនកម្ពុជារាប់លាននាក់។ ពិនិត្យមើលមួយភ្លែត សហរដ្ឋអាមេរិកហាក់ដូចជាមានចេតនា ល្អចំពោះកម្ពុជា ប៉ុន្តែបង្កប់ទៅ ដោយគំនិតដ៏អាក្រក់បំផុតក្នុងការបង្គាប់បញ្ជា និងជ្រៀតជ្រែកចូលក្នុងកិច្ចការផ្ទៃក្នុងកម្ពុជាដើម្បីបម្រើផលប្រយោជន៍ភូមិសាស្ត្រនយោបាយខ្លួននិងបង្កើន​យុទ្ធសាស្ត្រដុតរោលកម្តៅ នយោបាយដើម្បីផ្តល់ឱកាសឱ្យក្រុមប្រឆាំងដែលជាកូនចឹង នយោបាយរបស់ខ្លួន។ ​មន្ត្រីស្ថានទូតអាមេរិកបាននិង​កំពុងតែព្យាយាមបំភ្លៃប្រវត្តិសាស្ត្រ និងលាងជម្រះខ្លួនពី ឧក្រិដ្ឋកម្មដ៏សាហាវ ឃោរឃៅរបស់ខ្លួនមកលើប្រជាជនកម្ពុជា និងឱ្យគេចាត់ទុកខ្លួនប្រៀបបាននិងឥសី និងជាសាស្ត្រាចារ្យផ្នែកសិទ្ធិមនុស្ស និងប្រជាធិបតេយ្យ ដ៏ចំណាន ដែលប្រទេសទាំងឡាយគួរតែស្តាប់ការទូន្មាន និងអនុវត្តតាមខ្លួន។ ​តើសហរដ្ឋអាមេរិកបានធ្វើអ្វីខ្លះមកលើជាតិ និងប្រជាជនកម្ពុជា?

មន្ត្រីស្ថានទូតជាជាតិអាមេរិកាំង មិនត្រូវធ្វើភ្លេច​អំពីប្រវត្តិសាស្ត្រពីអតីតកាលដែលជាតិខ្លួនបានធ្វើមកលើកម្ពុជាឡើយ ហើយមន្ត្រីខ្មែរខ្លះបម្រើការនៅស្ថានទូតអាមេរិកដែលទទួលប្រាក់ខែអាមេរិកក៏កុំធ្វើជាភ្លេចកំណើតខ្លួនជាខ្មែរដែលជីដូនជីតាឪពុក ម្តាយខ្លួនធ្លាប់រត់គេចគ្រាប់បែក របស់អាមេរិក ហើយកាន់តែ​កុំភ្លេចថា ពលរដ្ឋខ្មែរនៅតែបន្តរងគ្រោះដោយ សំណល់គ្រាប់បែកដែលអាមេរិកទម្លាក់នៅ ឡើយដែរ។ ​នៅចន្លោះពីឆ្នាំ ១៩៦៨ ដល់ឆ្នាំ ១៩៧៣ សហរដ្ឋអាមេរិក បានទម្លាក់គ្រាប់បែកមកលើប្រទេសកម្ពុជាប្រមាណ ៣ លានតោន ដែលការទម្លាក់គ្រាប់បែកនេះបានបំផ្លិចបំផ្លាញផ្ទះសម្បែង​ប្រជាពលរដ្ឋ សម្លាប់ជីវិតមនុស្សរាប់សែននាក់ ហើយក៏ទម្លាក់​គ្រាប់បែកនេះបានធ្វើឱ្យប្រជាពលរដ្ឋខ្មែរមានការឈឺចាប់និងបានរត់ចូលព្រៃតស៊ូប្រឆាំងនឹងការឈ្លានពាននេះ។ អាមេរិក​មិនពេញចិត្តនឹងសម្តេចឪ នរោត្តម សីហនុឡើយដោយសារតែព្រះអង្គមិនគាំទ្រអាមេរិក ហើយកម្ពុជានៅពេលនោះ ជាប្រទេសនៃសមាជិកមិនចូលបក្ខសម្ព័ន្ធ។ ​ដើម្បីពង្រីកឥទ្ធិពលយោធារបស់ខ្លួននៅឥណ្ឌូចិន សហរដ្ឋអាមេរិក បានគាំទ្រក្រុមស្តាំនិយមដឹកនាំដោយលន់ នល់ និងទ្រង់ ​ស៊ីសុវត្ថិ សិរិមតៈដើម្បីធ្វើរដ្ឋប្រហារទម្លាក់សម្តេចឪចេញពីតំណែងនៅថ្ងៃទី១៨ ខែមីនា ឆ្នាំ១៩៧០ ពេលសម្តេចឪយាងទៅទស្សនកិច្ចនៅបារាំង និងរុស្សី។ ​ពួកស្តាំនិយមដែលមានការគាំទ្រពីសហរដ្ឋអាមេរិកបានបំផុសបាតុកម្មប្រឆាំងនឹងសម្តេចឪ ​នរោត្តម សីហនុ ដោយបានចោទព្រះអង្គថា លក់ដីឱ្យយៀកកុង និងប្រព្រឹត្តអំពើពុករលួយ។ នេះគ្រាន់តែជាលេសប៉ុណ្ណោះ ប៉ុន្តែធាតុពិតនៃរដ្ឋប្រហារនេះ គឺជាអន្តរាគមន៍ផ្នែកយោធារបស់សហរដ្ឋអាមេរិក ដើម្បីពង្រីកឥទ្ធិពលយោធានៅឥណ្ឌូចិន ព្រោះក្រោយរដ្ឋប្រហារ គឺនៅថ្ងៃទី ៩ ខែមេសា ឆ្នាំ១៩៧០ អាមេរិកបានធ្វើអន្តរាគមន៍យោធាក្នុងទ្រង់ទ្រាយធំរួមជាមួយកម្លាំង​ធីវគី វៀតណាមខាងត្បូងជាមួយនឹងកម្លាំងកងទ័ពប្រមាណ ១០ ម៉ឺននាក់ បានលុកលុយចូលមកក្នុងប្រទេសកម្ពុជា ហើយដកទៅវិញនៅថ្ងៃទី៣០ ខែសីហាដោយបន្សល់កម្លាំង​ធីវគីនៅកម្ពុជាអោយបន្តជួយរបបសាធារណរដ្ឋខ្មែររបស់​សេនាប្រមុខ លន់ នល់ដែលជាកូនចឹងរបស់ខ្លួន កុំឱ្យដួលរលំ។​ នេះគឺជាការជ្រៀតជ្រែកឈ្លានពានរបស់អាមេរិកមកលើកិច្ចការផ្ទៃក្នុងកម្ពុជា រំលោភលើបូរណភាពដែនដី អធិបតេយ្យភាព និងរាជភាពរបស់កម្ពុជាយ៉ាងច្បាស់ក្រឡែត ហើយច្បាស់ណាស់ សហរដ្ឋអាមេរិកត្រូវ ទទួលខុស ត្រូវចំពោះ ​សោកនាដកម្ម ទៅលើ ការបំផ្លាញ ជីវិតមនុស្ស ផ្ទះសម្បែង វត្តអារ៉ាម និងសត្វពាហនៈ ព្រមទាំងធនធានធម្មជាតិខ្មែរជាច្រើននេះ។ ​

តើសហរដ្ឋអាមេរិក អាងតែខ្លួនជាប្រទេសមហាអំណាច ដើរតែជ្រៀតជ្រែកប្រទេសផ្សេងទៀត ជាពិសេសប្រទេសតូចតាច ដូច្នេះឬ? ​តាមច្បាប់ អន្តរជាតិ គេមិន ​អនុញ្ញាតឲ្យមានការជ្រៀតជ្រែក លើប្រទេសដទៃឡើយ ហើយទោះបីជាប្រទេសតូចឬធំគឺមានសិទ្ធិស្មើគ្នា។ ប៉ុន្តែរហូតមកទល់ ពេលនេះ សូម្បីតែការទទួលខុសត្រូវផ្នែកសីលធម៌ ឬការសុំទោសមួយមាត់ចំពោះសោកនាដកម្មរបស់ខ្លួនប្រឆាំងនឹងប្រជាជនកម្ពុជាក៏មិនបានធ្វើផង ប៉ុន្តែឥឡូវនេះបែរជាមកបំភ្លៃប្រវត្តិសាស្ត្រ និងតាំងខ្លួនឯងថា ជាឥសីជួយសង្គ្រោះកម្ពុជា ទៅវិញ! ​រឿងដ៍អាម៉ាសជាងនេះទៀត ជនជាតិខ្មែរដែលជាអ្នកកាន់ទំព័រហ្វេសប៊ុករបស់ស្ថានទូតអាមេរិក បែរជាវង្វេងប្រវត្តិសាស្ត្រខ្លួនឯង បដិសេធជំនួសចៅហ្វាយនាយរបស់ខ្លួន ទាំងបំពានប្រវត្តិសាស្ត្រថា អាមេរិកមិនមែនជាអ្នកជួយ លន់ នល់ និងទ្រង់ សិរិមតៈ ធ្វើរដ្ឋប្រហារទម្លាក់សម្តេចឪ នរោត្តម សីហនុ។​លិខិតរបស់ទ្រង់ ស៊ីសុវត្ថិ ​សិរិមតៈ ផ្ញើជូនមន្ត្រីសហរដ្ឋអាមេរិកមុនពេលរបប​សាធារណរដ្ឋដួលរលំ គឺជា​ភស្តុតាងស្រាប់។ ទ្រង់ ស៊ីសុវត្ថិ សិរិមតៈ បានសរសេរថា៖ «ជូនចំពោះឯកឧត្ដម និងមិត្ដភក្ដិជាទីស្រឡាញ់ ! ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះសារលិខិត ក្នុងការស្នើអញ្ជើញ នាំខ្ញុំទៅកាន់ប្រទេសឯកឧត្ដម ដែលពោរពេញ ដោយសេរីភាព។ ប៉ុន្ដែគួរឱ្យសោកស្ដាយ ខ្ញុំមិនអាចចាកចេញ ពីប្រទេសនេះ ក្នុងស្ថានភាព កំសាកបែបនេះទេ ។ សម្រាប់រូបឯកឧត្ដម និងជាពិសេស ប្រទេសមហាអំណាចរបស់ឯកឧត្ដម ខ្ញុំមិនដែលជឿក្នុងមួយនាទីណាដែល ឯកឧត្ដមមានគំនិតបោះបង់ប្រជាជនមួយដែលជ្រើសរើសយក សេរីភាពឡើយ ។ ឯកឧត្ដម បានបដិសេធ មិនផ្ដល់ការគាំពារដល់ពួកគេ ហើយយើង ក៏មិនអាចធ្វើអ្វីបានដែរចំពោះរឿង នេះ។ ឯកឧត្ដមបានចាកចោលពួកយើង ហើយខ្ញុំសូមឱ្យឯកឧត្ដម និងប្រទេសរបស់ ឯកឧត្ដមរស់នៅដោយ សេចក្ដីសុខ។ ប៉ុន្ដែ ឯកឧត្ដមត្រូវចងចាំថា ខ្ញុំសុខចិត្ដស្លាប់នៅទីនេះ នៅក្នុងប្រទេសដែលខ្ញុំស្រឡាញ់ វាជារឿងអាក្រក់ណាស់ ព្រោះយើងត្រូវកើតនិងស្លាប់ថ្ងៃណាមួយចៀសមិនរួច ។ ខ្ញុំមានកំហុសតែមួយប៉ុណ្ណោះ គឺជឿជាក់លើ ឯកឧត្ដម ដែលជាជនជាតិអាមេរិក។ សូមឯកឧត្ដមជាទីស្រឡាញ់ ទទួលនូវការរាប់អានដ៏ស្មោះស្ម័គ្រនិងជាមិត្ដភាព អំពីខ្ញុំ»។

ប្រជាជនកម្ពុជា ពិតជាមិននឹក ស្មានឡើយថា អ្នកនយោបាយអាមេរិកដែលជាប់កំអែល សង្គ្រាមនៅវៀតណាមបន្តធ្វើទុក្ខបុកម្នេញកម្ពុជាសព្វបែបយ៉ាង និងថែមទាំងបានគាំទ្រក្រុមជន ក្បត់ជាតិ សម រង្ស៊ី និង កឹម សុខា ក្នុងការរៀបចំផែនការបដិវត្តន៍​​ពណ៌បំផ្លាញកម្ពុជា និងព្យាយាមទាញកម្ពុជាចូលទៅក្នុងសង្គ្រាម មនោគមន៍វិទ្យារបស់ខ្លួនសាជាថ្មី។ តាមរយៈសម្តីសារភាព របស់ឪពុកកូន កឹម សុខា និងកឹម មនោវិទ្យា ថា អាមេរិកបានជួយខ្លួនតាំងពីដើមរៀងមកដើម្បីផ្លាស់ ប្តូររបបដឹកនាំតាមគំរូនៃ ប្រទេសយូហ្គោស្លាវី ស៊ែបប៊ីជា ដើម។ សម រង្ស៊ី ក៏បានសារភាពថា ខ្លួនក៏ជាមេគំនិតអនុវត្តផែនការបដិវត្តន៍ពណ៌នេះដែរ។ បដិវត្តន៍ពណ៌ដែលត្រូវអាជ្ញាធរកម្ពុជាកម្ចេចបានទាំងស្រុងទាំងអង្គការចាត់តាំង និងប្រតិបត្តិករ។ ប៉ុន្តែពិតណាស់ ការដែលគណបក្សដែលឃុបឃិតជាមួយខ្លួនត្រូវបានរំលាយ ហើយអាយ៉ងនយោបាយរបស់ខ្លួន ត្រូវបានចាប់ខ្លួន និងខ្លះរត់ចោលស្រុកពិតជាបានធ្វើឱ្យចៅហ្វាយនាយរបស់ពួកគេពិតជាឈឺចាប់ និងត្រូវបន្តសកម្ម ភាពសងសឹកនិងប្រឆាំងនឹងកម្ពុជា។ តើដោយសារតែកម្ពុជាប្រកាន់នូវឯករាជភាពរបស់ខ្លួននិងបានដឹកនាំក្នុងភាពជា ម្ចាស់វាសនារបស់ខ្លួន មិនស្តាប់បង្គាប់បញ្ជា និងមិនចំណុះឱ្យសហរដ្ឋអាមេរិក បានជាមន្ត្រីនៃប្រទេសមហាអំណាចមួយនេះរួមនឹងសម្ព័ន្ធមិត្ររបស់ខ្លួន ព្យាយាមរករឿងកម្ពុជាមិនចេះចប់ដូច្នេះ? តាមពិតមន្ត្រីសហរដ្ឋអាមេរិកមួយចំនួនគួរទទួលស្គាល់ការពិតថា បច្ចប្បន្ននេះពិភពលោកមិនមែន ជាពិភពលោកឯកប៉ូលទៀតទេ ប៉ុន្តែជាពិភពលោកពហុប៉ូល។ កម្ពុជាបានប្រកាន់ខ្ជាប់នូវនយោបាយការបរទេស ខ្លួនគឺ «អព្យាក្រឹត មិនចូលបក្សសម្ព័ន្ធ និងសន្តិសហវិជ្ជមាន» ហើយកម្ពុជា ធ្វើជាមិត្តជាមួយគ្រប់ប្រទេសទាំងអស់ មិនយកប្រទេសណាមួយធ្វើជាសត្រូវឡើយ ហើយទំនាក់ទំនងត្រូវស្មើភាព និងស្មើសិទ្ធិនៅក្នុងស្មារតីឯករាជ្យ។ នេះជាគោលនយោបាយច្បាស់លាស់របស់ព្រះរាជាណាចក្រកកម្ពុជា! ដូច្នេះក្រុមមន្ត្រីសហរដ្ឋអាមេរិកមួយចំនួន គួរបញ្ឈប់ការលាបពណ៌នយោបាយ និងមនោគមន៍វិជ្ជាមកលើកម្ពុជា ដែលខុសពីការពិតដើម្បីបម្រើឱ្យ ផលប្រយោជន៍ភូមិសាស្ត្រនយោបាយរបស់ខ្លួន។ មិនតែប៉ុណ្ណោះ គួរបញ្ឈប់គាំទ្រលើក្រុមក្បត់ជាតិមកបំផ្លាញកម្ពុជា ហើយក៏គួរបញ្ឈប់ការប្រើប្រាស់អាយ៉ងនយោបាយខ្លួន មកបង្កចលាចលនិងកកូរកកាយផ្ទៃក្នុងកម្ពុជា បំផ្លាញសុខសន្តិភាពនិងការអភិវឌ្ឍរបស់របស់ជាតិនិងប្រជាជនកម្ពុជា។

ពលរដ្ឋខ្មែរដឹងច្បាស់ថាអ្វីដែល មន្ត្រីសហរដ្ឋអាមេរិកមួយចំនួនបាននឹងកំពុងតែបញ្ចេញសេចក្តីថ្លែងការណ៍ផ្សេងៗដែលមាន ចរិតញុះញង់ បំភ្លៃការពិត បង្កការយល់ច្រឡំ គឺគ្រាន់ដើម្បីផ្តល់កម្លាំងចិត្ត និងចិញ្ចឹមក្តីសង្ឃឹម ដល់ក្រុមជនក្បត់ជាតិ សម រង្ស៊ី និងកឹម សុខា តែប៉ុណ្ណោះ ហើយព្យាយាមទាញកម្ពុជាចូលទៅក្នុង ជម្លោះភូមិសាស្ត្រនយោបាយដូចពីអតីតកាល។ ប៉ុន្តែកម្ពុជាពិតជាបានស្គាល់ច្បាស់ពីភាពបែកបាក់ជាតិ និងសង្គ្រាមស៊ីវិលដែលខ្លួនធ្លាប់ឆ្លងកាត់។ អាមេរិកបានប្រព្រឹត្តកំហុសម្តងហើយម្តងទៀត ទម្លាក់គ្រាប់បែកលើប្រទេសកម្ពុជា គាំទ្រលន់ នល់ និងស៊ីសុវត្ថិ សិរិមតៈធ្វើរដ្ឋប្រហារទម្លាក់សម្តេចឪពីតំណែង នាំកម្ពុជាចូលក្នុង សង្គ្រាមឥណ្ឌូចិន ក្រោយមកបាន បន្តគាំទ្រក្រុមខ្មែរក្រហមដែលគេដឹងថា ជាឃាតកសម្លាប់ពលរដ្ឋខ្មែររាប់លាននាក់ឱ្យអង្គុយអសនៈកម្ពុជានៅអង្គការសហប្រជាជាតិ និងបានរួមដៃជាមួយសម្ព័ន្ធមិត្រខ្លួនផ្សេងទៀត ដាក់ទណ្ឌកម្មនយោបាយ និងសេដ្ឋកិច្ចប្រឆាំងនឹងការរស់រានឡើងវិញរបស់ជាតិ និងប្រជាជនកម្ពុជាចន្លោះពីឆ្នាំ ១៩៧៩ ដល់ឆ្នាំ ១៩៩១ ដោយ ធ្វើការថ្កោលទោសជនរងគ្រោះទន់ខ្សោយ។ ក្រោយការបោះឆ្នោតឆ្នាំ ១៩៩៣ អាមេរិកបានបន្តផែនការភូមិសាស្ត្រនយោបាយខ្លួនដោយ គាំទ្រកឹម សុខា និងសម រង្ស៊ី ដើម្បីអនុវត្តផែនការបដិវត្តន៍ពណ៌របស់ខ្លួន ផ្លាស់ប្តូររបប ដឹកនាំស្របច្បាប់។ ប៉ុន្តែផែនការទុច្ចរិតនេះត្រូវបានបំបែក និងបំផ្លាញទាន់ពេលវេលា។

ពលរដ្ឋខ្មែរសង្ឃឹមថា សហរដ្ឋអាមេរិកនឹងមិនប្រព្រឹត្តកំហុសប្រវត្តិសាស្ត្ររសាជាថ្មីមកលើជាតិ និងប្រជាជន កម្ពុជាឡើយ និងសង្ឃឹមថា ជនជាតិខ្មែរមួយចំនួនដែលកំពុងបម្រើផលប្រយោជន៍អាមេរិកក៏មិនងុបងុលពេករហូតដល់បំផ្លាញប្រទេសខ្លួនឯង និងចូលរួមបំភ្លៃប្រវត្តិសាស្ត្រឡើយ។ ប្រវត្តិសាស្ត្រ បានបញ្ជាក់យ៉ាងច្បាស់ពីការទទួលខុសត្រូវរបស់អាមេរិក នៅក្នុងសោកនាដកម្ម នៅប្រទេសកម្ពុជា ជាប្រវត្តិសាស្ត្រដែលមិនអាចបំភ្លៃបានឡើយ។ ការទម្លាក់គ្រាប់បែកប្រមាណ ៣ លានតោន និងការគាំទ្ររដ្ឋប្រហារទម្លាក់សម្តេចឪ នរោត្តម សីហនុ ដែលសហរដ្ឋអាមេរិកបានធ្វើ គឺជាផ្នែកមួយដែល ជំរុញឱ្យមានរបបខ្មែរក្រហម នាំឱ្យកើតមានឧក្រិដ្ឋកម្មសាហាវឃោរឃៅ។ តើនេះជាកំហុសរបស់នរណា? សហរដ្ឋអាមេរិកខ្លួនឯង ពិតជាបានដឹងចម្លើយច្បាស់ សូមកុំបំភ្លៃប្រវត្តិសាស្ត្រ សូមទទួលស្គាល់ការពិត ហើយកម្ពុជាពេលនេះខុសពីកម្ពុជាពីអតីតកាល!

ដោយពល ពានរិន្ទ
រាជធានីភ្នំពេញ ថ្ងៃទី១ ខែកុម្ភៈ ឆ្នាំ ២០១៩