(ភ្នំពេញ)៖ ក្រសួងសេដ្ឋកិច្ច និងហិរញ្ញវត្ថុ បានចេញប្រកាសថ្មីមួយ ស្តីពីការបង្កើតក្រុមការងារចម្រុះរវាងអគ្គនាយកដ្ឋានពន្ធដារ និងសមាគមនិងអង្គការមិនមែនរដ្ឋាភិបាល។ នេះបើតាមប្រកាសដែលបណ្តាញព័ត៌មាន Fresh News ទទួលបាននៅថ្ងៃទី៣១ ខែមករា ឆ្នាំ២០១៩នេះ។

ក្រុមការងារនេះ មានលោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក អគ្គនាយកដ្ឋានពន្ធដារ និង លោក សឿន សារឿន នាយកប្រតិបត្តិ នៃគណៈកម្មាធិការសហប្រតិបត្តិការដើម្បីកម្ពុជា ជាសហប្រធាន ព្រមទាំងមានអនុប្រធាន និងសមាជិក២៦រូបផ្សេងទៀត។

ក្រុមការងារចម្រុះនេះ មានភារកិច្ចក្នុងភាពជាដៃគូ អនុវត្តនូវការងារដូចខាងក្រោម៖

* ពង្រឹងការអនុវត្តច្បាប់ និងបទប្បញ្ញត្តិស្តីពីសារពើពន្ធ ដែលកំពុងមានជាធរមាន
* ពិនិត្យ និងបកស្រាយឲ្យបានត្រឹមត្រូវនូវច្បាប់ និងបទប្បញ្ញត្តិនានា ពាក់ព័ន្ធនឹងពន្ធដារ ដែលមានភាពមិនច្បាស់លាស់ ព្រមទាំងកែសម្រួល និងបង្កើតបញ្ញត្តិមួយចំនួនតាមការចាំបាច់
* ពិនិត្យបញ្ហានានាទាក់ទងនឹងការអនុវត្តវិធាន និងនីតិវិធីសារពើពន្ធ សំដៅបង្កើតជំនឿទុកចិត្តរបស់អ្នកជាប់ពន្ធ និងធានាដល់ការអនុវត្តច្បាប់ និងបទប្បញ្ញត្តិស្តីពីពន្ធដារឲ្យបានរលូន និងមានប្រសិទ្ធភាពខ្ពស់
* ពិនិត្យ និងដោះស្រាយបញ្ហាអាដហុក ដែលពាក់ព័ន្ធនឹងពន្ធដារ
* ពង្រឹងការអនុវត្តក្រមសីលធម៌វិជ្ជាជីវៈទីប្រឹក្សាច្បាប់ គណនេយ្យ សវនកម្មឯករាជ្យ និងភ្នាក់ងារផ្តល់សេវាពន្ធដារ៕