(ប៉េកាំង)៖ រដ្ឋាភិបាល​ទីក្រុងប៉េកាំងបាន​ទទូចឲ្យសហរដ្ឋអាមេរិក​ បញ្ឈប់ការគាបសង្កត់​គ្មានហេតុផល​មកលើ​ក្រុមហ៊ុន​បច្ចេក​វិទ្យាចិន ជាពិសេស​​​គឺក្រុមហ៊ុន Huawei Technologies តែម្តង។ នេះបើតាម​សម្តីអ្នកនាំពាក្យក្រសួង​ការបរទេសចិន ដកស្រង់​ខ្លឹម​សារ​ដោយទីភ្នាក់ងារ​ព័ត៌មានចិន ស៊ីនហួរ នៅល្ងាចថ្ងៃ​អង្គារ ទី២៩ ខែមករា ឆ្នាំ២០១៩។

រដ្ឋាភិបាលចិន​តាមរយៈអ្នកនាំពាក្យ​ក្រសួងការបរទេស​​ចិន បានបង្ហាញពីក្តី​ព្រួយបារម្ភជា​ខ្លាំង ចំពោះការដែល​​សហរដ្ឋអាមេរិក​​ បានធ្វើការចោទប្រកាន់​ចំនួន ១៣ករណី ទាក់ទិន​ការលួចបច្ចេកវិទ្យា និងការរំលោភ​លើទណ្ឌកម្មអ៊ីរ៉ង់​ជា​ដើម​​មក​​លើ​​ក្រុមហ៊ុន Huawei ព្រមទាំងកំពុង​ព្យាយាមសុំការធ្វើបត្យាប័ន ​​នាយកហិរញ្ញវត្ថុ​របស់ Huawei លោកស្រី ម៉េង វ៉ានចូវ (Meng Wanzhou) ពី​ប្រទេសកាណាដា ទៅកាន់​អាមេរិកថែមទៀតនោះ។

បើតាមអ្នកនាំ​ពាក្យក្រសួងការបរទេស​ចិន លោក ហ្គេង ហ្ស័ង (Geng Shuang) រដ្ឋាភិបាលចិន​តែងតែ​ទាមទារឲ្យ​បណ្តា​សហគ្រាស​ចិន​​នានា​ ធ្វើប្រតិបត្តិការ​សេដ្ឋកិច្ចដោយស្រប​តាមផ្លូវច្បាប់ និងស្នើឲ្យ​ប្រទេស​ទាំងអស់​​បង្កើត​បរិយាកាស​ដែល​មានតម្លាភាព​ ​និងមិន​រើស​អើង​​​សម្រាប់​​​ការធ្វើប្រតិបត្តិការ​ត្រឹមត្រូវ​តាមច្បាប់​​​នៃបណ្តា​ក្រុមហ៊ុន​ចិន។

លោក Shuang បានបន្តថា ប៉ុន្តែកន្លងមកនេះ​សហរដ្ឋអាមេរិកបាន​ប្រើប្រាស់អំណាច​របស់ខ្លួន មកបង្ខូចកេរ្តិ៍​ឈ្មោះហើយ​គាប​សង្កត់​​​ក្រុមហ៊ុនចិន និងព្យាយាមលូកលាន់​ក្នុងការប្រតិបត្តិការ​ដោយស្របច្បាប់​របស់​ក្រុមហ៊ុនទាំងនេះ​ថែមទៀតផង ខណៈទង្វើ​របស់អាមេរិក​ទាំងអស់នេះ មានផ្ទុកនូវ​ចេតនា និងឥទ្ធិពលនយោបាយ​សុទ្ធសាធ។

ពាក់ព័ន្ធសំណុំរឿង​លោកស្រី Meng Wanzhou ចិន​បានទទូចជាថ្មីម្តងទៀត​​ឲ្យ​អាមេរិក​ដកចេញវិញ​នូវដីកាចាប់ខ្លួន​លោកស្រី ហើយ​បញ្ឈប់ការ​​ស្នើសុំធ្វើបត្យាប័ន​ទៀត ហើយ​​ទីក្រុងប៉េកាំង​បានស្នើឲ្យ​កាណាដា​គោរព​តាមគោលជំហរ​របស់ចិន ដោយ​យល់ព្រមដោះ​លែង​លោកស្រី Meng ឲ្យមានសេរីភាព​ឡើងវិញ និងកុំធ្វើ​ជាដៃជើង​​សហរដ្ឋអាមេរិក៕