(ភ្នំពេញ)៖ រដ្ឋមន្ដ្រីក្រសួងព័ត៌មានលោក ខៀវ កាញារីទ្ធ នៅរសៀលថ្ងៃទី២៩ ខែមករា ឆ្នាំ២០១៩នេះ បានបង្ហោះលើ Facebook ដោយចោទជាសំណួរទៅកាន់ មន្ដ្រីនគរបាលថា អ្នកបើកបុកគេស្លាប់ហើយរត់គេចខ្លួន តើមានប៉ុន្មានភាគរយចាប់បានមកវិញ?។

លោករដ្ឋមន្ដ្រី បានបញ្ជាក់ទៀតថា ការចោទជាសំណួរនេះ មិនមែនជាការឌឺដងអ្វីនោះទេ ប៉ុន្ដែលោកឃើញថា ករណីគ្រោះថ្នាក់ចរាចរណ៍ ហើយអ្នកបង្ករត់គេចខ្លួនបាត់ហាក់មានការកើនឡើង។

រដ្ឋមន្ដ្រី ខៀវ កាញារីទ្ធ បានសរសេរយ៉ាងដូច្នេះថា «មកពីវត្តវិញ​ក៏នឹកចង់សួរខាងនគរបាលនូវសំណួរមួយ តើក្នុងចំណោមអ្នកបើកបុកគេស្លាប់ហើយរត់គេចខ្លួន តើមានប៉ុន្មានភាគរយដែលយើង តាមចាប់បាន​? មិនមែនរឿងសួរដុតទេ តែឃើញបុករត់នេះវាហាក់ដូចជាមានច្រើន ជាងអ្នកផឹករត់ទៅទៀត​!»។

យ៉ាងណាក៏ដោយ សម្រាប់ខ្លឹមសារបង្ហោះនៅលើ Facebook មួយឃ្លានេះរបស់លោករដ្ឋមន្ដ្រី បន្ទាប់ពីមាន​ហេតុការណ៍គ្រោះថ្នាក់ចរាចរណ៍ដ៏រន្ធត់មួយ បានកើតឡើង បណ្ដាលឲ្យមនុស្សមួយគ្រួសារដែលជិះក្នុងរថយន្ដតែមួយស្លាប់បាត់បង់ជីវិត៦នាក់ នៅកន្លែងកើតហេតុ។

ជាការកត់សម្គាល់ ការបង្ហោះសារ​នៅលើ Facebook របស់លោករដ្ឋមន្ដ្រី បន្ទាប់ពីមាន​ហេតុការណ៍គ្រោះថ្នាក់ចរាចរណ៍ដ៏រន្ធត់មួយ បានកើតឡើង បណ្ដាលឲ្យមនុស្សមួយគ្រួសារដែលជិះក្នុងរថយន្ដតែមួយស្លាប់បាត់បង់ជីវិត៦នាក់ នៅកន្លែងកើតហេតុ។

របាយការណ៍ផ្លូវការ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ បានបង្ហាញថា មនុស្ស១,៧៦១នាក់ បានស្លាប់ និង៤,៧៧០នាក់ ផ្សេងទៀតរងរបួស ក្នុងគ្រោះថ្នាក់ចរាចរណ៍នៅកម្ពុជា ឆ្នាំ២០១៨។ ​

របាយការណ៍បញ្ជាក់ថា នៅឆ្នាំ២០១៨ គ្រោះថ្នាក់ចរាចរណ៍កើតឡើង៣,២៦៧ករណី ធ្លាក់ចុះ៧ភាគរយ បើធៀបនឹងឆ្នាំ២០១៧។ ចំណែកចំនួនអ្នកស្លាប់ បានធ្លាក់ចុះ១ភាគរយ ខណៈចំនួនអ្នករងរបួសបានធ្លាក់ចុះ១៤ភាគរយ។ តាមរយៈតួលេខនេះមធ្យមក្នុង១ថ្ងៃ មនុស្សប្រហែល៥នាក់ បានស្លាប់ដោយគ្រោះថ្នាក់ចរាចរណ៍៕​