(ភ្នំពេញ)៖ លោក ជា ពិសី ជំនួយការសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាអភិបាលខណ្ឌឬស្សីកែវ បានថ្លែងប្រាប់ភ្នាក់ងារ Fresh News នៅល្ងាចថ្ងៃទី២៧ ខែមករា ឆ្នាំ២០១៩នេះឲ្យដឹងថា លោកសូមប្រកាសចាត់វិធានការតាមផ្លូវច្បាប់ ចំពោះម្ចាស់គណនី​ Facebook ឈ្មោះ «រតនះ កូនពៅ» ប្រសិនបើការស្រាវជ្រាវបានរកឃើញក្នុងពេលឆាប់ៗនេះ ថាជាអ្នកណាឲ្យប្រាកដ។

ការប្រកាសចាត់វិធានការបែបនេះ របស់លោក ជា ពិសី ត្រូវបានធ្វើឡើងក្រោយពីម្ចាស់គណនី Account Facebook «រតនះ កូនពៅ» បានយករូបភាព​​លោក និងភរិយា លោកស្រី អាន ផល្លា ជា ពិសី ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ ខណ្ឌឫស្សីកែវ ទៅកាត់ត Post លើបណ្ដាញសង្គម ក្នុងបំណងទុច្ចរិត ដែលបណ្ដាលឲ្យប៉ះពាល់ដល់កិត្តិយស។

លើសពីនេះ លោក ជា ពិសី ក៏បានប្រកាសបដិសេធ និងមិនទទួលស្គាល់ដាច់ខាត រាល់ការសរសេរជាសារផ្សេងៗ ឬយកកម្រងរូបភាពទាំងឡាយណា របស់លោក និងភរិយា ពិសេសរូបភាព​របស់សម្ដេចតេជោ ហ៊ុន សែន ដែលត្រូវបានយកទៅកាត់តបង្ហោះ​លើបណ្ដាញសង្គម ដោយគណនី Facebook «រតនះ កូនពៅ» មួយនេះ ៕​