(ភ្នំពេញ)៖ បញ្ជាការដ្ឋានអង្គរក្ស នៃអគ្គបញ្ជាការដ្ឋាន សូមប្រកាសថ្កោលទោស និងប្រឆាំងដាច់ខាតចំពោះការអំពាវនាវរបស់ទណ្ឌិត សម រង្សី នៅថ្ងៃទី២៥ ខែមករា ឆ្នាំ២០១៩ ដើម្បីឲ្យកងទ័ពប្រឆាំងរាជរដ្ឋាភិបាលស្របច្បាប់របស់កម្ពុជា ដែលកើតចេញពីការបោះឆ្នោតដោយសេរី ត្រឹមត្រូវ យុត្តិធម៌ និងតម្លាភាព។
បញ្ជាការដ្ឋានអង្គរក្ស គោរព និងអនុវត្តន៍ម៉ឺងម៉ាត់ដាច់ខាតនូវបទបញ្ជា និងអនុសាសន៍ដ៏ខ្ពង់ខ្ពស់របស់សម្តេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ត្រីនៃកម្ពុជា ដែលបានដាក់ចេញនូវភារកិច្ចជាអាទិភាព ដល់កងយោធពលខេមរភូមិន្ទ កាលពីថ្ងៃទី២៤ ខែមករា ឆ្នាំ២០១៩ កន្លងមកនេះ ដើម្បីវាយកម្ទេចជនក្បត់ជាតិ ដែលប៉ុនប៉ងបង្កើតបដិវត្តន៍ពណ៌ បំផ្លិចបំផ្លាញសុខសន្តិភាពរបស់ប្រជាជនកម្ពុជា។
បញ្ជាការដ្ឋានអង្គរក្ស ត្រៀមខ្លួនរួចជាស្រេច ដើម្បីអនុវត្តន៍នូវដីការបស់តុលាការ នៃព្រះរាជាណាចក្រកម្ពុជា ក្នុងការចាត់វិធានការចំពោះជនក្បត់ជាតិ ដែលតុលាការតាមចាប់ខ្លួន និងសូមអំពាវនាវដល់ជនរួមជាតិទាំងអស់ កុំជឿតាមការអំពាវនាវរបស់ ទណ្ឌិត សម រង្សី។
បញ្ជាការដ្ឋានអង្គរក្ស បានប្រកាសយ៉ាងដូច្នេះថា «យើងទាំងអស់គ្នា ជានាយទាហាន នាយទាហានរង និងពលទាហាន ក្នុងបញ្ជាការដ្ឋានអង្គរក្សទាំងមូល ប្តេជ្ញាបង្កាបដាច់ខាតនូវជនដែលប៉ុនប៉ងបំផ្លិចបំផ្លាញ សុខសន្តិភាព ហើយប្ដេជ្ញាថែរក្សានូវសន្តិសុខ សណ្តាប់ធ្លាប់សង្គម និងស្ថេរភាពជូនជាតិមាតុភូមិ ឲ្យបានជាដាច់ខាត»។
ក្នុងពិធីអបអរសាទរខួប២០ឆ្នាំ នៃការបង្កើតទីបញ្ជាការដ្ឋានកងទ័ពជើងគោកកាលពីថ្ងៃទី២៤ ខែមករា ឆ្នាំ២០១៩កន្លងទៅនេះ សម្តេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន បានប្រកាសឲ្យកងទ័ពអនុវត្តន៍ឲ្យបានខ្ជាប់ខ្ជួនក្នុងការការពារនូវសុខសន្តិភាព និងសេចក្តីសុខរបស់ប្រជាពលរដ្ឋ ហើយត្រូវរួមគ្នាទប់ទល់ជាមួយសកម្មភាពទាំងឡាយដែលប៉ុនប៉ងធ្វើបដិវត្តន៍ផ្តួលរំលំរាជរដ្ឋាភិបាលស្របច្បាប់។
សម្តេចតេជោ ហ៊ុន សែន បានបញ្ជាកងទ័ពទាំងអស់ឲ្យអនុវត្តន៍វិធានការកម្ទេចជនបំផ្លាញសុខសន្តិភាព និងសេចក្តីសុខរបស់ប្រជាពលរដ្ឋ ដោយមិនចាំបាច់រង់ចាំបទបញ្ជានោះទេ។ សម្តេចតេជោ បានបញ្ជាក់ថា សម្តេចមិនខ្លាចនឹងចាត់វិធានការចំពោះជនមួយក្តាប់តូច ដើម្បីរក្សានូវសេចក្តីសុខរបស់ប្រជាពលរដ្ឋទូទាំងប្រទេសនោះឡើយ៕
