(កំពង់ចាម)៖ ឧកញ៉ា លី វាសនា ពាណិជ្ជករខ្មែរឥស្លាម និងជាប្រធានអង្គការមូលនិធិមូស្លីមកម្ពុជា និងលោកស្រី ដាតុ (ឧកញ៉ា) ម៉ាន ម៉ារីយ៉ាន កសាងវិហារឥស្លាមដ៏ធំជាងគេ នៅទឹកដីខេត្តកំពង់ចាម គ្រោងនឹងចំណាយថវិកាប្រមាណជា ១.២លានដុល្លារ។
នាថ្ងៃទី២៥ ខែមករា ឆ្នាំ២០១៩ មានពិធីបើកការដ្ឋានសាងសង់វិហារឥស្លាមមួយ នៅភូមិព្រៃខ្ជាយ ឃុំបារាយណ៍ ស្រុកព្រៃឈរ ខេត្តកំពង់ចាម ក្រោមអធិបតីភាព លោក គួច ចំរើន អភិបាលខេត្តកំពង់ចាម ដោយមានការចូលរួមពីអភិបាលរងខេត្ត នគរបាល កងរាជអាវុធហត្ថ ប្រធាន-អនុប្រធានមន្ទីរជុំវិញខេត្ត អភិបាល- អភិបាលរងស្រុក ប្រធានការិយាល័យធម្មការស្រុក អ៊ីមុំាម៉ាស្ជឹតស្រុក មេភូមិ មេឃុំ និងអាជ្ញាធរដែនដីគ្រប់ជាន់ថ្នាក់ យុវជន ស.ស.យ.ក គណៈអ៊ីមុំាម៉ាស្ជឹត និងប្រជាពលរដ្ឋភូមិព្រៃខ្ជាយយ៉ាងច្រើនកុះករ។
លោកឧកញ៉ា លី វាសនា ដែលជាម្ចាស់ជំនួយបានរៀបរាប់អំពីប្រវត្តិមួយចំនួន ដែលនាំឲ្យលោកឧកញ៉ា សម្រេចចូលមកជួយកសាងម៉ាស្ជឹតដ៏ធំមួយនេះ ជូនអ្នកភូមិព្រៃខ្ជាយ និងបានកោតសរសើរដល់គណៈអ៊ីមុំាម៉ាស្ជឹត ចំពោះកិច្ចខិតខំប្រឹងប្រែងកន្លងមក និងបានផ្ដាំផ្ញើដល់បងប្អូនប្រជាពលរដ្ឋ ក្នុងភូមិទាំងអស់ឲ្យចេះថែរក្សា និងដឹងគុណដល់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃកម្ពុជា ព្រមទាំងថ្នាក់ដឹកនាំខេត្តទាំងអស់ ដែលតែយកចិត្តទុក្ខដាក់គ្រប់បែបយ៉ាង ដល់បងប្អូនខ្មែរឥស្លាម។
លោក គួច ចំរើន អភិបាលខេត្តកំពង់ចាម ក៏បានសម្តែងនូវសេចក្តីអបអរសាទរ ចំពោះពិធីបើកការដ្ឋានសាងសង់វិហារដ៏ធំស្កឹមស្កៃនេះផងដែរ ដោយលោកបានថ្លែងថា វិហារឥស្លាមមួយនេះ នឹងក្លាយទៅជាវិហារដ៏ស្រស់ស្អាត និងធំជាងគេនៅទឹកដីខេត្តកំពង់ចាម នៅពេលបញ្ចប់ការសាងសង់រួចរាល់ នៅពេលខាងមុខនេះ ដែលគ្រោងនឹងចំណាយថវិកាប្រមាណជា១.២លានដុល្លារ។
លោក ក៏បានអរគុណដល់លោកឧកញ៉ា និងលោកស្រីដាតុ (ឧកញ៉ា) ដែលបានចូលរួមអភិវឌ្ឍន៍ជាមួយរាជរដ្ឋាភិបាល ជូនប្រជាពលរដ្ឋស្រុកព្រៃឈរនេះ ដោយម៉ាស្ជឹតធំថ្មីនេះ ចាប់ផ្តើមសម្រចអនុវត្តការងារ សាងសាង់ចំថ្ងៃទី៧ មករា ឆ្នាំ២០១៩ ត្រូវនឹងខួបលើកទី៤០ នៃទិវាជ័យជំនះ៧មករា ដែលជាថ្ងៃខួបរំលឹកនៃការរំដោះប្រទេសជាតិ ពីរបបសាហាវយង់ខ្នង ប្រល័យពូជសាសន៍ ប៉ុល ពត៕
