(ព្រះវិហារ)៖ លោកឧត្តមសេនីយ៍ទោ ច័ន្ទ សុភក្ត្រ័ា មេបញ្ជាការរងយោធភាគទី៤ មេបញ្ជាការតំបន់ប្រតិបត្តិការសឹករងព្រះវិហារ និងជាប្រធានក្រុមការងារថ្នាក់ខេត្ត ចុះជួយស្រុកឆែប ខេត្តព្រះវិហារ នៅថ្ងៃទី២៥ ខែមករា ឆ្នាំ២០១៩នេះ បានដឹកនាំអនុប្រធានក្រុមការងារ សមាជិកក្រុមការងារចុះជួយស្រុកឆែប និងអាជ្ញាធរដែនដី មន្ត្រីរាជការ កងកម្លាំងប្រដាប់អាវុធទាំង៣ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋប្រមាណ៧០០នាក់ ចូលរួមមីទ្ទិញអបអរសារទរខួបអនុស្សាវរីយ៍លើកទី៤០ ទិវាជយ័ជំនះ ៧ មករា (៧ មករា ១៩៧៩-៧ មករា ២០១៩ )នៅស្រុកឆែប ខេត្តព្រះវិហារ។
លោក ច័ន្ទ សុភក្ត្រ័ា បានលើកឡើងថា ៤០ឆ្នាំមកនេះ ប្រទេសកម្ពុជាបានប្រែក្លាយពីគំនរផេះផង់ រហូតមានការអភិវឌ្ឍន៍រីកចំរើនគ្រប់វិស័យ ប្រកបដោយក្តីមោទនភាពបំផុត ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី និងជាប្រធាគណបក្សប្រជាជនកម្ពុជា។
ក្រោយពីបានស្តាប់សុន្ទរកថារបស់សម្តេចតេជោ ហ៊ុន សែនរួចមក, លោក ច័ន្ទ សុភក្ត្រា័ បានលើកឡើងថា ថ្ងៃ៧មករា គឺជាថ្ងៃកំណើតទី២ របស់ប្រជាជនកម្ពុជា ដែលនេះជាសច្ចធម៌ប្រវត្តិសាស្រ្ត ដែលគ្មានជនណា ឬកម្លាំងណាមកបំភ្លៃឬបំផ្លាញបានឡើយ។
លោកបានបន្ដទៀតថា មានថ្ងៃ៧មករា ឆ្នាំ១៩៧៩ ទើបមានអ្វីៗ ដូចសព្វថ្ងៃនេះ ហើយថា ថ្ងៃ៧មករា បានកើតចេញពីការលះបង់សាច់ស្រស់ ឈាមស្រស់ និងភាពអង់អាចក្លាហានរបស់ថ្នាក់ដឹកនាំ យុទ្ធជនកម្ពុជា បានវាយដណ្តើមជោគជ័យ លើរបបប្រល័យពូជសាសន៍ ដូច្នេះសូមស្មារតី ថ្ងៃ៧ មករា ស្ថិតស្ថេរជាអមតៈ។
លោកថា ៤០ឆ្នាំកន្លងមកនេះ គឺ៤០ឆ្នាំ នៃសាមគ្គីភាព វីរភាព និងជ័យជម្នះ ហើយការខិតខំពុះពាររបស់គណបក្សប្រជាជនកម្ពុជា ក្នុងរយៈពេល៤០ឆ្នាំមកនេះ បានកែប្រែមាតុភូមិកម្ពុជា ពីគំនរផេះផង់ឲ្យរស់ឡើងវិញ និងរីកចម្រើនលូតលាស់គ្រប់វិស័យប្រ កបដោយមោទនភាពបំផុត ដែលបានពង្រឹងមូលដ្ឋានគ្រឹះ សម្រាប់ឲ្យយើងឈានទៅសម្រេចនូវគោលដៅដ៏ឧត្តុងឧត្តម គឺកម្ពុជាមួយ ឯករាជ្យ សន្តិភាព សេរីភាព អព្យាក្រឹត ប្រជាធិបតេយ្យ និងវឌ្ឍនភាព។
ជាមួយគ្នានោះ លោក ច័ន្ទ សុភក្ត្រ័ា ក៏បានអំពាវនាវដល់បងប្អូន ប្រជាពលរដ្ឋទាំងអស់ ត្រូវរួមគ្នាជួយថែរក្សា សុខសន្តិភាព ដែលរកបានដោយលំបាកបំផុត នាបច្ចុប្បន្ននេះ ឲ្យនៅស្ថិតស្ថេរគង់វង្សជានិរន្ត សម្រាប់អនាគតយូរអង្វែងរបស់ប្រទេសជាតិ និងប្រជាពលរដ្ឋខ្មែរយើងតទៅទៀត៕
