(ភ្នំពេញ)៖ កម្លាំងនៃអធិការដ្ឋាននគរបាលខណ្ឌទួលគោក បានឃាត់ខ្លួនជនសង្ស័យ៤នាក់ជាបន្ដបន្ទាប់ រយៈពេល២ថ្ងៃ នៅថ្ងៃទី២២-២៣ ខែមករា ឆ្នាំ២០១៩នេះ ដែលជាប់ពាក់ព័ន្ធករណីវាយប្លន់យកទូរស័ព្ទ, លួចម៉ូតូ និងករណីគ្រឿងញៀន ក្នុងមូលដ្ឋាន។
របាយការណ៍របស់អធិការដ្ឋាននគរបាលខណ្ឌ បានឲ្យដឹងថា នៅថ្ងៃទី២២ ខែមករា ឆ្នាំ២០១៩ កម្លាំងនគរបាលប៉ុស្តិ៍បឹងសាឡាង បានឃាត់ខ្លួនជនសង្ស័យម្នាក់ជាក់ស្តែង នៅចំណុចក្រោមស្ពានអាកាសស្ទឹងមានជ័យ ផ្លូវលេខ២៧១ សង្កាត់ស្ទឹងមានជ័យ ខណ្ឌមានជ័យ ពីបទលួចមានស្ថានទម្ងន់ទោស (វាយប្លន់យកលុយ និងទូរស័ព្ទ) ប្រព្រឹត្តនៅចំណុចជិតបង្កាន់ដៃស្ពានអាកាសស្ទឹងមានជ័យ ផ្លូវលេខ២៧១ ក្រុមទី៥២ ភូមិ៧ សង្កាត់បឹងសាឡាង ខណ្ឌទួលគោក។
ជនសង្ស័យឈ្មោះ ចាន់ សុផានិត ហៅខ្និត អាយុ១៩ឆ្នាំ មុខរបរមិនពិតប្រាកដស្នាក់នៅផ្ទះជួលគ្មានលេខ ក្រោមស្ពានអាកាសស្ទឹងមានជ័យ ផ្លូវ២៧១ ភូមិមានជ័យ សង្កាត់ស្ទឹងមានជ័យ ខណ្ឌមានជ័យ។ ជនរងគ្រោះឈ្មោះ ហួន ចែម ភេទប្រុស អាយុ២៨ឆ្នាំ មុខរបរព្រូឡានក្រុមហ៊ុនឡានរិទ្ធមុន្នី ស្នាក់នៅភូមិត្រពាំងជ្រៃ ឃុំត្រពាំងជ្រៃ ស្រុកបរសែត ខេត្តកំពង់ស្ពឺ។ សម្ភារបាត់បង់រួមមាន លុយខ្មែរ៣០០,០០០រៀល, ទូរស័ព្ទចំនួន០១គ្រឿងម៉ាក LG ពណ៌ស គ្មានស៊ីម (ទើបទិញ)។
ដោយឡែក នៅវេលាម៉ោង១១៖០០នាទីនៅថ្ងៃទី២៣ ខែមករា ឆ្នាំ២០១៩ កម្លាំងនគរបាលប៉ុស្តិ៍ផ្សារដេប៉ូទី១ បានឃាត់ខ្លួនជនសង្ស័យម្នាក់ជាក់ស្តែង ពីបទលួច (លួចម៉ូតូ) ប្រព្រឹត្តនៅចំណុចមុខផ្ទះលេខ២៥ ផ្លូវលេខ២៣៧ក្រុមទី៣១ ភូមិ៧ សង្កាត់ផ្សារដេប៉ូទី១ ខណ្ឌទួលគោក។ ជនសង្ស័យ ឈ្មោះ ចាន់ វណ្ណៈ ហៅកាក់ អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិផ្អេរ សង្កាត់ទំនុបទឹក ខណ្ឌចំការមន។
វត្ថុតាងចាប់យករួមមាន ម៉ូតូចំនួន០១គ្រឿងម៉ាក TODAY ពណ៌ខៀវ ពាក់ផ្លាកលេខភ្នំពេញ1DB-3717 (ជារបស់ជនរងគ្រោះ) ដោយមានការរឯកភាពពី ព្រះរាជអជ្ញារងបានប្រគល់ជូនជនរងគ្រោះបណ្តោះអាសន្ន។ ជនរងគ្រោះ ឈ្មោះ កន រ៉ាវីត ភេទប្រុស អាយុ១៦ឆ្នាំ មុខរបរជាងជួសជុលរថយន្ត។
បើតាមរបាយការណ៍ដដែលនេះ នៅវេលាម៉ោង០៤៖៤០នាទី ថ្ងៃទី២៣ ខែមករា ឆ្នាំ២០១៩ កម្លាំងនគរបាលប៉ុស្តិ៍រដ្ឋបាលបឹងសាឡាង បានសហការជាមួយ កម្លាំងនគរបាលប៉ុស្តិ៍រដ្ឋបាលទឹកល្អក់ទី៣ បានធ្វើការឃាត់ខ្លួនជនសង្ស័យម្នាក់ ពីបទលួច (លួចម៉ូតូ) ឃាត់ខ្លួននៅចំណុចស្ថានីយ៍ចាក់ប្រេងសាំងកាល់តិច ផ្លូវម៉ៅសេទុង ក្រុមទី០៦ ភូមិ២ សង្កាត់ទឹកល្អក់ទី៣ ខណ្ឌទួលគោក ប្រព្រឹត្តនៅចំណុចមុខផ្ទះជួលលេខ២៨ ផ្លូវលេខ២៣៤ ក្រុមទី២២ ភូមិ៨ សង្កាត់បឹងសាឡាង ខណ្ឌទួលគោក។
ជនសង្ស័យឈ្មោះ ងំ កាលីម ហៅកាលីម អាយុ២២ឆ្នាំ មុខរបរពុំពិតប្រាកដ ស្នាក់នៅផ្ទះមិនចាំលេផ្លូវ៣០ម៉ែត្រ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ។ វត្ថុតាងចាប់យកមាន ម៉ូតូមួយគ្រឿងម៉ាក Suzuki Smash ស៊េរី២០០៥ ពណ៌ខ្មៅ ពាក់ស្លាកលេខតាកែវ1A-2973។ ជនរងគ្រោះឈ្មោះ អ៊ុក បូរិន ភេទប្រុស អាយុ៥៧ឆ្នាំ មុខរបររត់ម៉ូតូឌុប ស្នាក់នៅផ្ទះជួលលេខ២៨ ផ្លូវលេខ៣២៤ ក្រុមទី២២ ភូមិ៨ សង្កាត់បឹងសាឡាង ខណ្ឌទួលគោក
ដោយឡែកករណីគ្រឿងញៀនវិញ កម្លាំងនគរបាលប៉ុស្តិ៍រដ្ឋបាលបឹងសាឡាង នៃអធិការដ្ឋាននគរបាលខណ្ឌទួលគោក បានល្បាតការពារសុវត្ថិភាពនៅក្នុងមូលដ្ឋាន បានឃាត់ខ្លួនជនសង្ស័យម្នាក់ ពីបទរក្សាទុកដោយខុសច្បាប់នូវសារធាតុញៀន ប្រព្រឹត្តនៅចំណុចផ្ទះលេខ៥៣ ផ្លូវលេខ៣៣៦ ក្រុមទី២៨ ភូមិ១០ សង្កាត់បឹងសាឡាង ខណ្ឌទួលគោក។
ជនសង្ស័យឈ្មោះ តេង សុត្រា ហៅម៉ៅ ភេទប្រុស អាយុ៣៦ឆ្នាំ មុខរបររត់ម៉ូតូកង់បី ស្នាក់នៅផ្ទះលេខ២១A ផ្លូវ លេខ៥៩៨ សង្កាត់ភ្នំពេញថ្មី ខណ្ឌសែនសុខ។ វត្ថុតាងចាប់យករួមមាន ក្រាមពណ៌សថ្លា (សង្ស័យជាគ្រឿងញៀន) មួយកញ្ចប់តូច, ទូរស័ព្ទដៃ០១គ្រឿងម៉ាក Nokia ស៊េរី១០៥ ពណ៌ខៀវ និងម៉ូតូកង់បី (PassApp) ចំនួន០១គ្រឿង ពណ៌ទឹកមាស ពាក់ផ្លាកលេខភ្នំពេញ1HE-1070។
ក្រោយឃាត់ខ្លូនជនសង្ស័យទាំង៤នាក់ខាងលើ ត្រូវបានបញ្ជូនទៅការិយាល័យជំនាញ ដើម្បីធ្វើការសួរនាំ និងកសាងសំណុំរឿងបញ្ជូនទៅចាត់ការបន្ដតាមនីតិវិធី៕
