(បាត់ដំបង)៖ នារសៀលថ្ងៃទី២៣ ខែមករា ឆ្នាំ២០១៩ នៅសាលាខេត្តបាត់ដំបង មានពិធីប្រកាសផ្ទេរភារកិច្ច ប្រធានសាខាគយ និងរដ្ឋាករថ្មីខេត្តបាត់ដំបង ក្រោមអធិបតីភាពលោក ផា អេងវ៉េង អគ្គនាយករង នៃអគ្គនាយកគយ និងរដ្ឋាករកម្ពុជា តំណាងលោកបណ្ឌិត គុណ ញឹម ប្រតិភូរាជរដ្ឋាភិបាល ទទួលបន្ទុកជាអគ្គនាយកគយ និងរដ្ឋាករកម្ពុជា, លោក អ៊ុយ រី ប្រធានក្រុមប្រឹក្សាខេត្ត, លោក ហឿង សុគន្ធ អភិបាលរងខេត្តបាត់ដំបង ថ្នាក់ដឹកនាំ មន្ត្រីរាជការមន្ទីរអង្គភាពនានាជុំវិញខេត្ត អភិបាលក្រុងស្រុកជាច្រើនរូបទៀត។
លោក ឈុន សុភមង្គល ប្រធានសាខាគយ និងរដ្ឋាករខេត្តបាត់ដំបងចាស់ បានឡើងធ្វើរបាយការណ៍សង្ខេបស្តីពី សកម្មភាពការងាររបស់សាខាគយ និងរដ្ឋាករខេត្តបាត់ដំបងរយៈពេលជាង៣ឆ្នាំ កន្លងមក ដែលជាដែនសមត្ថកិច្ចលោកគ្រប់គ្រងបានលទ្ធផលល្អប្រសើរ។
ក្នុងឱកាសនោះដែរ លោកប្រធានសាខាថ្មី បានប្តេជ្ញាចិត្តបន្តដឹកនាំការងារសាខាគយ និងរដ្ឋាករខេត្តបាត់ដំបងឲ្យបានល្អ និងដឹកនាំមន្រ្តីក្រោមឱវាទខិតខំ ប្រមូលពន្ធឲ្យមានការកើនឡើងជាងមុនផងដែរ។
លោក ផា អេងវ៉េង បានលើកឡើងថា ការផ្លាស់ប្តូរ គឺជាភារកិច្ចចាំបាច់ និងតម្រូវការរបស់រាជរដ្ឋាភិបាលស្របតាមគោលនយោបាយជាតិ។ ជាមួយគ្នានោះ អ្នកចាស់ផ្លាស់ទៅដោយភាពរីករាយ ដោយឡែក អ្នកដែលមកឡើងកាន់តំណែងថ្មី ត្រូវបន្តដឹកនាំការងារឲ្យបានល្អប្រសើរ មានសាមគ្គីភាពផ្ទៃក្នុង ពង្រឹងកិច្ចសហប្រតិបត្តិការជាមួយអាជ្ញាធរមូលដ្ឋានគ្រប់លំដាប់ថ្នាក់ និងប្រទេសជិតខាង ពិសេសយកចិត្តទុកដាក់ត្រួតពិនិត្យទំនិញឆ្លងកាត់ឲ្យបានត្រឹមត្រូវ និងទប់ស្កាត់បទល្មើសគេចពន្ធគ្រប់ប្រភេទ។
នាឱកាសនោះ លោកអគ្គនាយករងបានផ្តាំផ្ញើដល់លោក យូ ហេង ប្រធានសាខាគយ និងរដ្ឋាករខេត្តបាត់ដំបង ទើបឡើងកាន់តំណែងថ្មី ដែលបានឡើងប្តេជ្ញាចិត្តថា លោកត្រូវបានប្តេជ្ញាបំពេញភារកិច្ចរបស់ខ្លួនឲ្យបានខ្ជាប់ខ្ជួន ដែលថ្នាក់លប្រគល់ឲ្យគោរពប្រតិបត្តិការងារឲ្យបានតាមការណែនាំ និងអនុវត្តតាម អភិក្រម៤ប្រការបស់ក្រសួងសេដ្ឋកិច្ច និងហិរញ្ញវត្ថុ, ព្រមទាំងគោរពអភិក្រមរបស់រាជរដ្ឋាភិបាល៤ប្រការ និង១ ប្រការទៀតគឺធ្វើការវះកាត់។
ថ្នាក់ដឹកនាំ និងមន្រ្តីសាខាទាំងអស់ ត្រូវគោរពក្រមសីលធម៌ជាមន្ត្រីគយ និងរដ្ឋាករក៏ដូចជា ការចូលរួមសហការឲ្យបានល្អផ្ទៃក្នុងអង្គភាព និងមន្ទីរអង្គភាព អាជ្ញាធរពាក់ព័ន្ធក្នុងខេត្តឲ្យបានល្អ។
ជាពិសេស គោរពអនុវត្ត នូវភារកិច្ចសំខាន់ទាំង៣របស់គយ រួមមាន៖ ប្រមូលចំណូលពន្ធ អាករ និងកម្រៃផ្សេងៗជូនរដ្ឋឲ្យបានគ្រប់ និងលើសផែនការ, បង្ការ និងបង្ក្រាបអំពើរត់គេចពន្ធឲ្យបាន លទ្ធផលខ្ពស់ សម្រួលពាណិជ្ជកម្មអន្តរជាតិឲ្យបានសមស្រប។ សូមបញ្ជាក់ថា លោក យូ ហេង ប្រធានសាខាគយ និងរដ្ឋាករខេត្តបាត់ដំបងថ្មីជំនួសលោក ឈុន សុភមង្គល ប្រធានសាខាគយ និងរដ្ឋាករខេត្តបាត់ដំបងចាស់ ត្រូវបានផ្លាស់ទៅជាប្រធានសាខាគយនិងរដ្ឋាករខេត្តឧត្តមានជ័យវិញ។
លោក ហឿង សុគន្ធ បានបញ្ជាក់ថា ក្នុងនាមលោកអភិបាលខេត្តនិងរដ្ឋបាលខេត្ត ធ្វើការគាំទ្រ និងបន្តកិច្ចសហការព្រមទាំងធ្វើការសម្របសម្រួល ការងាររបស់សាខាគយ និងរដ្ឋាករខេត្ត និងអង្គភាពនានាជុំវិញខេត្ត ដើម្បីសហការអនុវត្តការងារឲ្យបានកាន់តែល្អប្រសើរជាងមុនបន្ថែមទៀត៕
