(ភ្នំពេញ)៖ ជនសង្ស័យចោរម្នាក់ចូលទៅលួចម៉ូតូ១គ្រឿង នៅខាងក្រោមផ្ទះរបស់គេ ខណៈឃើញស្ថានភាពទំនងជាស្ងប់ស្ងាត់ទៅហើយនោះ ព្រោះម្ចាស់ដេកនៅជាន់ខាងលើ បែរជាស៊យភ្លាត់ស្នៀតត្រូវគេផ្សេងឃើញ និងស្រែកឡើងផ្អើលឆោរឡោរ ហើយដេញតាមក្របួចជាប់ប្រគល់ឲ្យនគរបាល នៅរសៀលថ្ងៃទី១៧ ខែមករា ឆ្នាំ២០១៩នេះ ស្ថិតនៅចំណុចផ្ទះជួលលេខ៤០ ផ្លូវ៦២R ក្រុម៥ ភូមិទួលសំពៅ សង្កាត់ទួលសង្កែ១ ខណ្ឌឬស្សីកែវ។
អធិការនគរបាលខណ្ឌឬស្សីកែវ លោកវរសេនីយ៍ទោ គល់ យី បានប្រាប់ពីដំណើររឿង មុនឈានដល់ការឃាត់ខ្លួនជនសង្ស័យជាចោរលួចម៉ូតូដើម្បីសាកសួរ ប៉ុន្មានម៉ោងក្រោយ ដោយមានការបញ្ជាក់បន្ថែមពីសាក្សីផងនោះ ទើបដឹងថានៅវេលាកើតហេតុ ជនរងគ្រោះបានទុកម៉ូតូ០១គ្រឿងម៉ាក PCX ពណ៌ស ពាក់សា្លកលេខភ្នំពេញ1FH-0555 នៅខាងក្រោមបន្ទប់ជួល (ចំណុចកើតហេតុ) ក៏លឺសូសំលេងស្រែកថា ចោរៗលួចម៉ូតូទើបចុះពីលើបន្ទប់ជួលមកមើលឃើញ ប្រជាពលរដ្ឋកំពុងតែនាំគ្នាដេញចាប់ ខណៈដែលកម្លាំងសមត្ថកិច្ចមូលដ្ឋានកំពុងយាមល្បាត បានចេញមកអន្តរាគមន៍ឃាត់ខ្លួនជនសង្ស័យភ្លាមៗ និងរកឃើញវត្ថុតាងមានដូចជា ដែកសំប៉ែតចុងស្រួចចំនួន០៥, កូនសោរខ្សៀលេខ៨ចំនួន០១, កូនសោរម៉ូតូចំនួន០២ និងទូរសព្ទ័០១គ្រឿងម៉ាកសាំស៊ុង ពណ៌ខៅ្ម (ចុចពិល) ១គ្រឿង។
លោកវរសេនីយ៍ទោ គល់ យី បានបង្ហើបទៀតថា ជនសង្ស័យឈ្មោះ ហេង វីរៈ អាយុ២៨ឆ្នាំ ជនជាតិវៀតណាម (មានសារធាតុញៀន) ស្នាក់នៅផ្ទះជួល ក្នុងភូមិ១៦ សង្កាត់ស្រះចក ខណ្ឧដូនពេញ។ ចំណែកជនរងគ្រោះឈោ្មះ ប៉ិច សុភី ភេទប្រុស អាយុ២៧ឆ្នាំ មុខរបរជាងមា្នងសិលា ស្នាក់នៅផ្ទះកើតហេតុ។
លោកអធិការថា ជនសង្ស័យដែលត្រូវឃាត់ខ្លួនពាក់ព័ន្ធអំពើលួច មានស្ថានទម្ងន់ទោស និងវត្ថុតាងនានា ដែលដកហូតពីសកម្មភាព បាននិងកំពុងស្ថិតនៅក្រោមការសួរនាំ នៅអធិការដ្ឋានខណ្ឌ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការទៅតាមនីតិវិធី៕
