(រតនគិរី)៖ ស្នងការដ្ឋាននគរបាលខេត្តរតនគិរី នៅព្រឹកថ្ងៃទី១៥ ខែមករា ឆ្នាំ២០១៩នេះ រៀបចំប្រកាសតែងតាំងផ្ទេរភារកិច្ច និងតម្លើងឋានន្តរស័ក្តិ មន្រ្តីនគរបាលជាតិ នៃស្នងការដ្ឋាននគរបាល ខេត្តរតនគិរី ក្រោមអធិបតីភាព នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក តំណាងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងលោក លន់ សុភាព អភិបាលរងខេត្ត។
តាមប្រកាសរបស់ក្រសួងមហាផ្ទៃ ស្តីពីកាផ្ទេរភារកិច្ចតែងតាំងមុខតំណែង និងតម្លើងឋានន្តរស័ក្តិមន្រ្តីនគរបាលជាតិ សម្រេចផ្ទេរភារកិច្ចការិយាល័យជំនាញ នៃស្នងការដ្ឋាននគរបាលខេត្តរតនគិរី ចំនួន១៤រូប, ផ្ទេរភាកិច្ច និងតម្លើងឋានន្តរស័ក្តិ អធិការដ្ឋាននគរបាលស្រុកចំនួន៥រូប។
លោក លន់ សុភាព អភិបាលរងខេត្តរតនគិរី បានថ្លែងដោយសម្តែងនូវការអបអរសាទរ ដែលនាយឧត្តសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ស្នើតែងតាំង និងផ្ទេរភារកិច្ច ដល់មន្រ្តីនគរបាលជំនាញ នៃស្នងការដ្ឋាននគរបាលខេត្តរតនគិរីចាស់ និងថ្មី ហើយការតែងតាំង និងផ្ទេរភារកិច្ចនាពេលនេះ គឺជាកិច្ចការផ្លាស់ប្តូររដ្ឋបាលធម្មតា តាមកំណែទម្រង់ របស់រាជរដ្ឋាភិបាលកម្ពុជា។
ថ្លែងក្នុងឱកាសនោះ នាយឧត្តមសេនីយ៍ ប៉ែន វិបុលក ក៏បានណែនាំស្នងការរងនគរបាលខេត្តរតនគិរី ទើបប្រកាសផ្ទេរភារកិច្ច និងតម្លើងឋានន្តរស័ក្តិថ្មី ត្រូវសិក្សា និងយកគំរូតាមអ្នកចាស់ ហើយត្រូវស្វែងយល់ពីភូមិសាស្ត្រ និងថ្នាក់ក្រោម តើកងកម្លាំងចង់បានអ្វី? ដើម្បីពង្រឹងប្រសិទ្ធភាពការងារបន្ថែមទៀត។ ដោយឡែក ចំពោះថ្នាក់ក្រោមវិញ ក៏ត្រូវស្វែងយល់ និងគោរពថ្នាក់លើរបស់ខ្លួនវិញ ដែលទាំងអស់នេះសម្រាប់សម្រួលដល់ការងារឲ្យបានជោគជ័យ និងដំណើរការងារដោយរលូន។
ទន្ទឹមនោះដែរ នាយឧត្តមសេនីយ៍ ប៉ែន វិបុល ក៏បានផ្ដាំផ្ញើបន្ថែមដល់លោកស្នងការរងទទួលផែនទាំងអស់ ចាប់ពីថ្ងៃនេះតទៅ ត្រូវតែបន្ដរក្សាសាមគ្គីភាពផ្ទៃក្នុង ពង្រឹង និងបង្កើតសមត្ថភាព របស់មន្ដ្រីទាំងអស់ មិនត្រូវប្រកាន់បក្ខពួក ឬក្រុមណាឡើយ គឺត្រូវធ្វើការងាររួមគ្នាជូនប្រជាពលរដ្ឋ ឲ្យស្របតាមអ្វីដែលថ្នាក់ដឹកនាំប្រគល់ជូន៕
