(ភ្នំពេញ)៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបង្ហាញពីសមិទ្ធផល នៃផែនការធំៗ ដែលក្រសួងសាធារណការ និងដឹកជញ្ជូន សម្រេចបាន​ពេញមួយឆ្នាំ២០១៨ កន្លងទៅនេះ ដែលលទ្ធផលសម្រេចបានទាំងនោះរួមមាន៖ ការងារដឹកជញ្ជូនផ្លូវគោក និងសុវត្ថិភាពចរាចរណ៍, ការងារដឹកជញ្ជូនផ្លូវទឹកផ្លូវសមុទ្រ និងកំពង់ផែ, ការងារផ្លូវដែក, ការងារសាធារណការ, ការងារភស្តុភារកម្ម និងអង្គភាពសហគ្រាសសាធារណៈ។

លោកទេសរដ្ឋមន្ត្រី ស៊ុន ចាន់ថុល បានបង្ហាញពីសមិទ្ធផលសំខាន់ៗយ៉ាងដូចនេះ នារសៀលថ្ងៃទី១០ ខែមករា ឆ្នាំ២០១៩ ក្នុងឱកាសដែលលោកបាន ចូលរួមក្នុងពិធីបិទសន្និបាទបូកសរុបការងារ របស់ក្រសួងសាធារណការ និងដឹកជញ្ជូន ក្រោមអធិបតីភាពលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ព្រមទាំងមានមន្ត្រីគ្រប់ជាន់ថ្នាក់ ចូលរួមជាច្រើន រូបទៀតផងដែរ នៅសាលសន្និសីទចតុមុខ។

រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងថា សមិទ្ធផលការងារឆ្នាំ២០១៨ ដែលជាឆ្នាំ នៃការទទួលបាននូវការគាំទ្រ និងជឿទុកចិត្តខ្លាំងពី បងប្អូនប្រជាពលរដ្ឋ មកលើក្រសួងសាធារណការ និងដឹកជញ្ជូន ដែលបានអនុវត្តការងាររបស់ខ្លួន ទទួលជោគជ័យតាមការសន្យា ហើយសមិទ្ធផលការងារសំខាន់សំខាន់ទាំងនោះមានដូចជា៖

ទី១៖ ការងារដឹកជញ្ជូនផ្លូវគោក និងសុវត្ថិភាពចរាចរណ៍

*បន្តកែលម្អប្រព័ន្ធស្វ័យប្រវត្តិកម្មលើការចុះបញ្ជី និងត្រួតពិនិត្យលក្ខណៈបច្ចេកទេសយានយន្ដ និងការពង្រីកការផ្តល់សេវាសាធារណៈ ទៅដល់ប្រជាពលរដ្ឋ​នៅតាមមន្ទីរសាធារណការ និងដឹកជញ្ជូន រាជធានីខេត្ត ក្រុង​មួយចំនួនទៀត
*តភ្ជាប់ប្រព័ន្ធស្វ័យប្រវត្តិកម្ម ផ្ទៀងផ្ទាត់ការចុះបញ្ជីយានយន្ត ជាមួយប្រព័ន្ធទិន្ន័យពន្ធគយ របស់អគ្គនាយកដ្ឋានគយ និងរដ្ឋាករកម្ពុជា
*ពង្រីកទីតាំងផ្ដល់សេវាប័ណ្ណបើកបរនៅផ្សារទំនើប aeon mall២
*ដាក់ឲ្យប្រើប្រាស់ជាផ្លូវការ នៅមជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់
*​គិតត្រឹមឆ្នាំ២០១៨ ក្រសួងបានចែកមួកសុវត្ថិភាពប្រមាណ​៥៦,២៩៣មួក និងស្ទិកឃ័រចំណាំងផ្លាត ជូនប្រជាពលរដ្ឋសរុបប្រមាណ​៣,៤០០,០០០សន្លឹក
*ត្រួតពិនិត្យ និងឃាត់រថយន្តដឹកជញ្ជូនលើសទម្ងន់កម្រិតកំណត់ចំនួន ២,៦៨៨គ្រឿង និងពិន័យជាថវិកាសរុប ៦,០១៨លានរៀល និងបានកាត់ទ្រុងរថយន្តកែច្នៃខុសបច្ចេកទេសបានសរុបចំនួន ១,៧៩២គ្រឿង។

ទី២៖ ការងារដឹកជញ្ជូនផ្លូវទឹកផ្លូវសមុទ្រ និងកំពង់ផែ

*ក្រសួង​បានដាក់ឲ្យដំណើរការការណូតដឹកអ្នកដំណើរ តាមផ្លូវទឹកពីឬស្សីកែវទៅតាខ្មៅ (​៥ស្ថានីយ៍៖ ឬស្សីកែវ ផ្សារចាស់ ចតុមុខ ច្បារអំពៅ និងក្រុងតាខ្មៅ)
*សាងសង់ផែបណ្ដែត និងស្ពានចុះផែ នៅខេត្តកំពង់ឆ្នាំង និងស្វាយរៀង

ទី៣៖ ការងារផ្លូវដែក

*ដាក់ឲ្យប្រើប្រាស់រថភ្លើងដឹកអ្នកដំណើរ ពីស្ថានីយភ្នំពេញទៅព្រលានយន្តហោះអន្តរជាតិភ្នំពេញ​
*បញ្ចប់គម្រោងស្ដារសាងសង់ឡើងវិញ និងដាក់ឲ្យដំណើរការជាបណ្ដោះអាសន្នផ្លូវដែកភាគខាងជើង (ប៉ោយប៉ែត-ភ្នំពេញ) និងជួសជុលស្ថានីយ៍រថភ្លើងប៉ោយប៉ែត និងបំពាក់ប្រព័ន្ធសុវត្ថិភាពចរាចរផ្លូវដែកភាគខាងជើង។

ទី៤៖ ការងារសាធារណការ

*បញ្ចប់ការជួសជុល និងស្តារឡើងវិញនូវកំណាត់ផ្លូវជាតិលេខ៤៨ ប្រមាណជាង​៦៣គីឡូម៉ែត្រ ទាន់ពេលវេលា
*ជិះកង់ទៅពិនិត្យមើលផ្លូវ (ផ្លូវខូច ប្រេះស្រកានាគ)​
*បើកការដ្ឋានសាងសង់ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មា ផ្លូវជាតិលេខ១១ កំណាត់ផ្លូវជាតិលេខ៥ ព្រែកក្តាម- ឆ្មារម្អម (៤គន្លង)​ គម្រោងពង្រីកកំណាត់ផ្លូវជាតិលេខ៣ ចោមចៅ-ក្រុងកំពត
*ដាក់ឲ្យប្រើប្រាស់កំណាត់ផ្លូវជាតិលេខ១ ប្រវែង ១,៥៧៧គីឡូម៉ែត្រ សេកសក-សំឡូត កំណាត់ផ្លូវជាតិលេខ៦ ថ្នល់កែងកំពង់ចាម-អង្រងសៀមរាប
*បញ្ចប់ការសិក្សាសមិទ្ធផលផែនការមេ សម្រាប់អភិវឌ្ឍហេដ្ឋារចនាសម្ព័ន្ធបណ្ដាញលូ ការសាងសង់ស្ថានីយ៍ប្រព្រឹត្តកម្មទឹកកខ្វក់ នៅក្រុងច្បារមន និងនៅក្រុងព្រះសីហនុ។

ទី៥៖ ការងារភស្តុភារកម្ម

*បញ្ចប់ និងផ្សព្វផ្សាយជាសាធារណៈ ឯកសារនៃការសិក្សាផែនការមេភស្តុភារកម្ម ដែលគាំទ្រដោយWB និង JICA
*សហការជាមួយក្រុមជំនាញការ ធនាគារអភិវឌ្ឍន៍អាស៊ី សាជីវកម្មហិរញ្ញវត្ថុអន្តរជាតិ (IFC) និងស្ថាប័នពាក់ព័ន្ធ សិក្សាគម្រោងអភិវឌ្ឍន៍ភស្តុភាកម្មភ្នំពេញ និងគម្រោងអភិវឌ្ឍន៍មជ្ឈមណ្ឌលភស្តុភាកម្មក្រុងព្រះសីហនុ

និងទី៦៖ អង្គភាពសហគ្រាសសាធារណៈ

*ដាក់ឲ្យដំណើរការ គម្រោងពង្រីកចំណតផែកុងតឺន័រLM១៧ ជំហានទី២ នៅកំពង់ផែស្វ័យយ័តភ្នំពេញ
*ដាក់ឲ្យប្រើប្រាស់ចំណតកំពង់ផែ ពហុបំណងកំពង់ផែស្វ័យយ័តក្រុងព្រះសីហនុ
*កាំសាបបានបញ្ចុះតម្លៃ២០% នៃតម្លៃសេវាកុងត្រាកុងតឺន័រ លើសម៉ោង និង២០% នៃតំលៃត្រួតពិនិត្យកុងតឺន័រ នៅពេលលើកដាក់នៅលើនេះវា
*ផ្តល់សេវាពិសោធន៍សំណង់ និងសាធារណការ ជូនដល់ក្រុមហ៊ុនកងវិស្វកម្ម មន្ទីរសាធារណការខេត្ត ក្រុង និងអង្គភាពពាក់ព័ន្ធបានសរុប១,៣៧៥ករណី​៕​