(ភ្នំពេញ)៖ ក្រុមហ៊ុនស៊ីនទ្រី (ខេមបូឌា) បានចេញសេចក្តីជូនដំណឹងរបស់ខ្លួន ពីភាពរអាក់រអួល ក្នុងរយៈពេលចុងក្រោយនេះ លើការប្រតិបត្តិការសម្អាត ប្រមូលសំរាម និងដឹកជញ្ជូនសំរាម ដែលធ្វើឲ្យបងប្អូនសាធារណជនមានការងឿងឆ្ងល់។ នេះបើយោងតាមសេចក្តីជូនដំណឹងរបស់ក្រុមហ៊ុន ដែលអង្គភាពព័ត៌មាន Fresh News ទទួលបាននៅរសៀលថ្ងៃទី៨​ ខែមករា ឆ្នាំ២០១៨នេះ។

នៅក្នុងសេចក្តីជូនដំណឹងរបស់ខ្លួន ក្រុមហ៊ុនស៊ីនទ្រី បានបង្ហាញហេតុផលធំៗចំនួន២រួមមាន៖

*ទី១៖ បញ្ហាបាតុកម្មទាមទារដំឡើងប្រាក់បៀវត្ស ពីសំណាក់កម្មករកាលពីថ្ងៃទី២៦ ខែធ្នូ ឆ្នាំ២០១៨
*ទី២៖ បញ្ហាបាតុកម្មបិទផ្លូវញឹកញាប់នៅផ្លូវ២១៧ ដែលជាផ្លូវតែមួយគត់សម្រាប់រថយ​ន្តដឹកសំរាមធ្វើចរាចរណ៍ ដឹកជញ្ជូនសំរាមយកទៅចាក់នៅទីលានចាក់សំរាមដង្កោ។ ម្យ៉ាងទៀតផ្លូវសំរាប់ចូលទៅទីលានចាក់សំរាម មានច្រកចេញ-ចូលតែមួយ (ផ្លូវតែមួយ) ទើបធ្វើឲ្យដំណើរការដឹកជញ្ជូនសំរាម មានការយឺតយ៉ាវ។​

ជាមួយគ្នានេះ ក្រុមហ៊ុនស៊ីនទ្រី ក៏សុំការអធ្រាស្រ័យចំពោះការរអាក់រអួលនេះ ហើយក្រុមហ៊ុនក៏សូមសំណូមពរដល់សាធារណជនទាំងអស់ មេត្តាជួយវិចខ្ចប់សំរាមរបស់ខ្លួនឲ្យរបៀបរៀបរយ ដើម្បីជួយពន្លឿន ក្នុងប្រតិបត្តិការប្រមូល និងដឹកជញ្ជូនសំរាម ដើម្បីថែរក្សា អនាម័យបរិស្ថាន ក្នុងរាជធានីភ្នំពេញរបស់យើង។

សូមបញ្ជាក់ថា ការតវ៉ារបស់កម្មករក្រុមហ៊ុន ស៊ីនទ្រី រឿងផ្ទុះការតវ៉ា​សុំតម្លើងប្រាក់ខែ ត្រូវបានដោះស្រាយបញ្ចប់ កាលពីរសៀលថ្ងៃទី២៧ ខែធ្នូ ឆ្នាំ២០១៨ ក្រោយពីថៅកែក្រុមហ៊ុន សម្រេចតម្លើងបន្ថែមប្រាក់ខែ ឲ្យកម្មករក្នុង១នាក់៩ដុល្លារ ដោយការតម្លើងនេះ នឹងអនុវត្ដចាប់ពីខែកុម្ភៈ ឆ្នាំ២០១៩តទៅ។ មុនពេលដោះស្រាយបញ្ចប់បញ្ហានេះ ក្រុមកម្មករប្រមូលសំរាម បានផ្អាកសកម្មភាព រហូតធ្វើឲ្យសំរាមនៅគរពេញផ្លូវ និងនៅមុខផ្ទះរបស់ប្រជាពលរដ្ឋ រហូតមានអាជ្ញាធរទាំង១២ខណ្ឌ បានបញ្ចេញកម្លាំងប្រជាការពារចេញដឹកសំរាមដោយខ្លួនឯង៕