(ព្រះសីហនុ)៖ លោកឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការ ទីបញ្ជាការជួរមុខ នៃគណៈកម្មាធិការជាតិ សន្តិសុខលម្ហសមុទ្រ បានបញ្ជាក់ថា នាវាចម្បាំងមហាយក្សចិន ចំនួន៣គ្រឿង នឹងសុំចតនៅកំពង់ផែខេត្តព្រះសីហនុ រយៈពេល៤ថ្ងៃ ចាប់ពីថ្ងៃទី៩-១២ ខែមករា ឆ្នាំ២០១៩ ដើម្បីរឹតចំណងមិត្តភាពជាមួយកងទ័ពជើងទឹកកម្ពុជា ឱ្យកាន់តែប្រសើរឡើងថែមទៀត។
ថ្លែងប្រាប់បណ្តាញព័ត៌មាន Fresh News នៅរសៀលថ្ងៃទី០៨ ខែមករា ឆ្នាំ២០១៩នេះ ឧត្តមនាវីឯក ទៀ សុខា បានបញ្ជាក់ថា នាវាកងទ័ពរំដោះប្រជាជនចិន ចំនួន៣គ្រឿង ដែលនឹងសំចតនៅកំពង់ផៃស្វយ័ត ខេត្តព្រះសីហនុនេះ រួមមាន៖
*ទី១៖ ឈ្មោះ PLANS WUHU(FFG.529) មានបណ្តោយ១៣៥ម៉ែត្រ ទទឹង១៦ម៉ែត្រ ជម្រៅទឹក៦ម៉ែត្រ ផ្ទុកជាងបួនពាន់តោន
*ទី២៖ នាវាឈ្មោះ PLANSHANDA (FFG.579) មានបណ្តោយ១៣៥ម៉ែត្រ ទទឹង១៦ម៉ែត្រ ជម្រៅទឹក៦ម៉ែត្រ ផ្ទុកជាងបួនពាន់តោន
*ទី៣៖ ឈ្មោះ PLANS DONG PING LAKE (AOR960) បណ្តោយ១៧៩ម៉ែត្រ ទទឹង២៥ម៉ែត្រ ជម្រៅទឹក១០ម៉ែត្រ ផ្ទុកជាងពីរម៉ឺនតោន។
ឧត្តមនាវីឯក បានបញ្ជាក់បន្ថែមទៀតថា «នៅក្នុងអំឡុងពេលទស្សនកិច្ចជាផ្លូវការនេះ ក៏នឹងមានការប្រកួតកីឡាជាមិត្តភាពរវាងក្រុមនាវិកចិន និងនាវិកកម្ពុជា នៅក្នុងមូលដ្ឋានសមុទ្រព្រមទាំងមានការ ធ្វើលំហាត់ហ្វឹកហ្វឺនរួមគ្នាផងដែរ»៕
