(ភ្នំពេញ)៖ លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) នៅថ្ងៃទី០៦ ខែមករា ឆ្នាំ២០១៩នេះ បានលើកឡើងថា ខួប៤០ឆ្នាំ នៃថ្ងៃជ័យជំនះ ៧មករា (៧ មករា ១៩៧៩ - ៧ មករា ២០១៩) រយៈពេល៤០ឆ្នាំ បានធ្វើដំណើរលឿនណាស់ ក្នុងសម័យសន្តិភាពនេះ តែក្នុងរបបប្រល័យពូជសាសន៍ រយៈពេលជិត៤ឆ្នាំ យូរណាស់។ នេះជាជោគជ័យ បានក្លាយជាថ្ងៃកំណើតទី២ របស់ប្រជាជនកម្ពុជា។
លោក ហេង រតនា បានបន្ថែមទៀតថា លទ្ធផល នៃការសម្លាប់ប្រជាជនកម្ពុជាខ្លួនឯង ជាង៣លាននាក់ ដូចសម្លាប់សត្វនោះ មូលហេតុនៃទង្វើឃោរឃៅនេះ កើតឡើងដោយសារកត្តាជាច្រើន ដូចជាសង្គ្រាមលោក សង្គ្រាមស៊ីវិល។
លោកបន្ដថា «ជាពិសេស ការតស៊ូបដិវត្តកំហឹងវណ្ណៈ រវាងអ្នកមានអ្នកក្រ រវាងកម្មករ-កសិករ ជាមួយ ស្តេច នាម៉ឺនមន្ត្រីរាជការ កងកម្លាំងប្រដាប់អាវុធ ភាពស្អប់ខ្ពើមអយុតិ្តម៌ក្នុងសង្គម អំពើពុករលួយ និងចង់បាន សង្គមមួយស្អាតស្អំ ស្មើភាពគ្នា ដោយគ្មាន អ្នកមាន-អ្នកក្រ (គ្មានអ្នកជិះជាន់គេ និងគ្មានអ្នកត្រូវបានគេជិះជាន់) គឺថាដើម្បី និងដើម្បីគឺថា (កម្ពុជាឆ្នាំសូន្យ នៅឆ្នាំ១៩៧៩)»។
លោក ហេង រតនា បានគូសបញ្ជាក់ថា ការរំដោះជាតិបានមកវិញ គឺជាវរភាពគ្មានពីរ សំរាប់មេដឹកនាំ ដែលបានចូលរួម និងលះបង់គ្រប់យ៉ាងដើម្បីបុព្វហតុជាតិ ដ៍មហាធំធេងនេះ! នៅឆ្នាំ២០១៣ កម្ពុជាហៀប នឹងធ្លាក់ចូលសង្គ្រាមស៊ីវិលជាថ្មី តាមរយៈបដិវត្តន៍បែបថ្មី គឺបដិវត្តន៍ពណ៌។
ទន្ទឹមគ្នានោះ លោកបានលើកឡើងទៀតថា «ដោយចេញដំណើរ ពីទាមទារលទ្ធផលបោះឆ្នោត ក្លាយទៅជាទាមទារតំឡើងប្រាក់បៀត្សរ៍ ក្លាយទៅទាមទារ ហ៊ុន សែន អើយចុះចេញទៅ ក្លាយទៅជាកូដកម្មដុតរោងចក្រ មន្ទីរពេទ្យ។ ទាំងនេះ ជាលទ្ធផលនៃសង្គមខែ្មរយើង ដែលចាំបាច់ត្រូវពង្រឹងភាព ជាម្ចាស់របស់ខ្លួន គឺត្រូវស្គាល់ខ្លួនឯងឲ្យច្បាស់ ដើម្បីជាមូលដ្ឋានរឹងមាំ ក្នុងការពង្រឹងឆន្ទះជាតិនិយម»។
ជាមួយគ្នានោះ លោកក៏បានឲ្យដឹងថា ប្រវត្តិសាស្ត្រទាំងនេះ ក៏ជាមេរៀនសំរាប់អប់រំ នាម៉ឺនមន្ត្រី គហិបតី សេដ្ឋី អ្នកកាន់អំណាចគ្រប់ជាន់ថ្នាក់ នៅសម័យទំនើបនេះ ត្រូវខិតខំចៀសវាងបង្កទុក្ខវេទនា ក្នុងសង្គមតាមរយៈការរំលោភច្បាប់ ដោយរាប់ទាំងការរំលោភទៅលេីច្បាប់ បរិស្ថានព្រៃឈេី បឹងបួរ រ៉ែ និងសម្បត្តិជាតិដទៃទៀត ដេីម្បីផលប្រយោជន៍ផ្ទាល់ខ្លួន ដែលនាំឱយប៉ះពាល់ផលប្រយោជន៍ប្រជាជន និងមិនត្រូវបង្កអយុតិ្តធម៌សង្គម ត្រូវតែនាំគ្នាខិតខំពិន្ទុល្អជាមួយប្រជាជននិងប្រទេសជាតិ។
លោក ហេង រតនា បានបន្ថែមទៀតថា «ជាពិសេសខិតខំ ធ្វើអំពើល្អ ជាមួយអ្នកដែលទន់ខ្សោយជាងខ្លួន នោះនឹងជួយឲ្យសន្តិភាព ដែលរកបានដោយលំបាកបំផុតបច្ចុប្បន្ននេះ អាចស្ថិតស្ថេរគង់វង្សប្រកបនិរន្តភាព សំរាប់អនាគតយូរអង្វែងតទៅ នៃព្រះរាជាណាចក្រ ដ៏កំសត់នេះ»៕
