(ភ្នំពេញ)៖ យុវជនម្នាក់ ត្រូវបានចោរកាត់សោម៉ូតូម៉ាក Honda Scoopy ស៊េរី ២០១៣ ពណ៌ខ្មៅ១គ្រឿង យកទៅបានដោយសុវត្ថិភាព កាលពីវេលាម៉ោង៦ព្រឹកថ្ងៃទី០៥ ខែមករា ឆ្នាំ២០១៩ ស្ថិតនៅផ្ទះ E3 ២៨៩ Z ផ្លូវ១១០ ក្នុងខណ្ឌដូនពេញ រាជធានីភ្នំពេញ។ យុវជនបាត់ម៉ូតូខាងលើមានឈ្មោះ ហុង ប៊ុនថន អាយុ២៥ឆ្នាំ រស់នៅតាមអាស្រ័យដ្ឋាន កើតហេតុខាងលើនេះ។
បើតាមជនរងគ្រោះខាងលើ បានរៀបរាប់ឲ្យដឹងថា ម៉ូតូរបស់ខ្លួនបានបាត់ទៅ នៅវេលាម៉ោង៦ព្រឹក ខណៈដែលខ្លួនចុះមកយកម៉ូតូជិះចេញទៅ ខាងក្រៅ ហើយមិនបានឃើញម៉ូតូរបស់ខ្លួន នៅកន្លែងដាក់ដូចសព្វដង។
ក្រោយបាត់ម៉ូតូភ្លាម ជនរងគ្រោះ បានសួរនាំអ្នកផ្ញើម៉ូតូដែលប្រចាំការនៅទីនោះ តែអ្នកមើលម៉ូតូ បានអះអាងថា នៅវេលាម៉ោង៦ព្រឹកនោះ ខ្លួនបានបណ្តើរម៉ូតូ៤ទៅ៥គ្រឿង យកចេញមកខាងក្រៅដូចរាល់ថ្ងៃ (ក្នុងនោះក៏មានម៉ូតូជនរងគ្រោះដែរ) ដើម្បីឲ្យម្ចាស់ម៉ូតូ យកទៅជិះចេញទៅខាងក្រៅ កុំឲ្យចង្អៀតនៅខាងក្នុងផ្ទះពេក ពេលនោះ ខណៈខ្លួនដើរចូលទៅខាងក្នុងផ្ទះ ហើយដើរចេញមកវិញ ឃើញយុវជនម្នាក់ បានជិះម៉ូតូជនរងគ្រោះចេញទៅបាត់ ដោយខ្លួននឹកស្មានថា ជាប្អូនប្រុសបង្កើតរបស់ជនរងគ្រោះ។
បើបងប្អូនសាធារណជន ឬសមត្ថកិច្ច បានឃើញម៉ូតូ នៅតាមហាងបញ្ចាំម៉ូតូ ដូចមានភិនភាគខាងលើ សូមជួយរាយការណ៍ជូនសមត្ថកិច្ចផង ដើម្បីមានវិធានការ៕
