(ភ្នំពេញ)៖ កម្លាំងសមត្ថកិច្ចប៉ុស្តិ៍ស្វាយប៉ាក បានឃាត់ខ្លួនជនសង្ស័យពាក់ព័ន្ធករណីជួញដូរគ្រឿងញៀន ព្រមទាំងដកហូតថ្នាំញៀនចំនួន ៣កញ្ចប់ និងថង់សម្រាប់ច្រកគ្រឿងញៀនមួយចំនួនុំ
ការចុះឃាត់ខ្លួនជនសង្ស័យរូបនេះ បានធ្វើឡើង នៅវេលាម៉ោង ១៖០០នាទីរសៀល ថ្ងៃទី០៣ ខែមករា ឆ្នាំ២០១៩ នៅចំណុចផ្លូវលំក្រុម៧ ភូមិឡកំបោ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
សមត្ថកិច្ចប៉ុស្តិ៍ស្វាយប៉ាក បានប្រាប់ភ្នាក់ងារ Fresh News ឲ្យដឹងថា ជាលទ្ធផលនៃការស្រាវជ្រាវនេះ កម្លាំងសមត្ថកិច្ចបានឃាត់ខ្លួនជនសង្ស័យម្នាក់ឈ្មោះ សាមាន ផេន ភេទប្រុស អាយុ៣៤ឆ្នាំ មុខរបរកម្មករ ស្នាក់នៅផ្លូវបេតុង ក្រុម៧ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។ ចំណែកឯ វត្ថុតាងដកហូតរួមមាន ម្សៅក្រាមពណ៌សថ្លាចំនួន ៣កញ្ចប់តូច និងថង់សម្រាប់ច្រកគ្រឿងញៀនមួយចំនួន។
ក្រោយពីឃាត់ខ្លួនជនសង្ស័យខាងលើរួចមក កម្លាំងសមត្ថកិច្ចប៉ុស្តិ៍ បានបញ្ជូនខ្លួនទៅកាន់អធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង ចាត់បញ្ជូនទៅកាន់សាលាដំបូងរាជធានីភ្នំពេញ៕
