(ភ្នំពេញ)៖ កម្មករ កម្មការិនី ប្រមាណជា១០០នាក់ មកពីរោងចក្រកាត់ដេរប្រេស្ទិច ស្ថិតក្នុងស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី០៣ ខែមករា ឆ្នាំ២០១៩នេះ បាននាំគ្នាដង្ហែក្បួនឆ្ពោះមកកាន់ក្រសួងការងារ និងបណ្តុះបណ្តាលវិជ្ជាជីវៈ ដើម្បីទាមទារលក្ខខណ្ឌការងារមួយចំនួន រួមទាំងទទួលយកប្រធានសហជីពប្រចាំរោងចក្រនោះវិញ។

លោក ប៉ាវ ស៉ីណា ប្រធានសម្ព័ន្ឋសហជីពចលនាកម្មករ បានប្រាប់អង្គភាពព័ត៌មាន Fresh News ថា ចំណុចដែលកម្មករបានទាមទារនោះរួមមាន៖
១៖ សូមឲ្យក្រុមហ៊ុនទទួលយកឈ្មោះ ហួន សុវិត ប្រធានសហជីព​ចលនាកម្មករប្រចាំរោងចក្រ ប្រេស្ទិច ហ្គាមេន ចូលធ្វើការវិញ។
២៖ សូមឲ្យក្រុមហ៊ុនធ្វើកាតបេឡាជាតិរបបសន្តិសុខសង្គម ជូនកម្មករកម្មកានី។
៣៖ ក្រុមហ៊ុនមិនត្រូវកាត់លុយកម្មករ នៅពេលកម្មករដាក់ច្បាប់កន្លះថ្ងៃ ហើយក្រុមហ៊ុនមិនត្រូវកាត់លុយបាយកន្លះខែនោះទេ។
៤៖ នៅពេលកម្មករឈឺ មានសំបុត្រពេទ្យត្រឹមត្រូវ ក្រុមហ៊ុនត្រូវរក្សាប្រាក់ឈ្នួលជូនពួកគាត់។
៥៖ នៅពេលកម្មករ កម្មកានី ដាក់ច្បាប់មានធុរ:ចាំបាច់ក្រុមហ៊ុនអនុញ្ញាតិ និងរក្សាប្រាក់ឈ្នួល និងអត្តប្រយោជន៍ផ្សេងជូនពួកគាត់។
៦៖ ក្រុមហ៊ុនមិនត្រូវបង្ខិតបង្ខំកម្មករអោយលើសពីសមត្ថភាពកម្មករនោះឡើយ។
៧៖ ក្រុមហ៊ុនត្រូវបើកលុយបាយជូនកម្មករក្នុងមួយសប្តាហ៍ម្តង។
៨៖ សូមឲ្យក្រុមហ៊ុនប្តូរកិច្ចសន្យាពី ២ខែ​​ មក៦ខែ វិញម្តង។
៩៖ ក្រុមហ៊ុនមិនត្រូវបង្ខំឲ្យកម្មករធ្វើការមុនម៉ោងជាដាច់ខាត។
១០៖ សូមកុំឲ្យកុំក្រុមហ៊ុនរើសអើងសហជីពចលនាកម្មករគ្រប់រូបភាព។
១១៖ សូមឲ្យក្រុមហ៊ុនដកប្រធានផ្នែករដ្ឋបាលចេញជាបន្ទាន់។
១២៖ សូមឲ្យក្រុមហ៊ុនណែនាំប្រធានចិន និងប្រធានផ្នែកខ្មែរឲ្យប្រើប្រាស់សំដីសមរម្យមកលើកម្មករនិយោជិក។
១៣៖ សូមឲ្យក្រុមហ៊ុនរៀបចំឲ្យមានបន្ទប់ពេទ្យ និងថ្នាំពេទ្យឲ្យបានគ្រប់គ្រាន់។
១៤៖ សូមឲ្យក្រុមហ៊ុនរៀបចំតុសំរាប់កម្មករនិយោជិកហូបបាយអោយបានគ្រប់គ្រាន់។

លោក ប៉ាវ ស៊ីណា បានអះអាងថា សំណើខាងលើនេះ ត្រូវបានកម្មករធ្វើការតវ៉ាទាមទារអស់ជាច្រើនថ្ងៃមកហើយ ប៉ុន្តែមិនទាន់មានដំណោះស្រាយនោះទេ ទើបក្រុមកម្មករសម្រេចដង្ហែក្បួនមកកាន់ក្រសួងការងារ។ បើតាមលោក ប៉ាវ ស៊ីណា ក្រុមកម្មករ ក៏គ្រោងហែក្បួនតវ៉ាទៅផ្ទះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅជិតវិមានឯករាជផងដែរ៕