(ពិភពលោក)៖ នៅថ្ងៃចន្ទ ទី៣១ ខែធ្នូ ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានប្រាប់សមភាគីអាមេរិកលោក ដូណាល់ ត្រាំ ថាទីក្រុងម៉ូស្គូបានត្រៀមខ្លួនរួចជាស្រេចក្នុងការបើកកិច្ចសន្ទនា ដោះស្រាយបញ្ហាខ្វែងគំនិតគ្នាទាំងឡាយរវាងប្រទេសទាំងពីរ៕
២៖ ចំនួនមនុស្សស្លាប់បានកើនឡើងដល់ ០៤នាក់ហើយ ខណៈមនុស្ស ៦៨នាក់ទៀតបន្តបាត់ខ្លួន នៅក្នុងហេតុការណ៍បាក់រលំអគារស្នាក់នៅមួយកន្លែងនៅឯទីក្រុង ម៉ាកនីតូហ្គសក៍ (Magnitogorsk) ភាគនិរតីប្រទេសរុស្ស៊ី ដែលមានចម្ងាយជាង ១,០០០គីឡូម៉ែត្រ ពីភាគខាងកើតទីក្រុងម៉ូស្គូ៕
៣៖ ចំនួនមនុស្សស្លាប់ដោយសារគ្រោះរអិលបាក់ដី និងទឹកជំនន់ ដែលបង្កឡើងដោយភ្លៀងធ្លាក់ខ្លាំងនៅប្រទេសហ្វីលីពីន បានកើនឡើងដល់ ៦៨នាក់ហើយ៕
៤៖ ប្រធានសេនាធិការយោធាអ៊ីរ៉ង់ លោកឧត្តមសេនីយ ម៉ូហាំម៉េដ បាគែរី (Mohammad Baqeri) បានកត់សម្គាល់ថា វត្តមានកងកម្លាំង និងនាវាផ្ទុកយន្ដហោះចម្បាំងអាមេរិក USS John C. Stennis គឺមានតែដុតបញ្ឆេះជម្លោះ និងបង្កអសន្តិសុខនៅក្នុងតំបន់ឈូងសមុទ្រពែក្សតែប៉ុណ្ណោះ៕
៥៖ យានអវកាស ឆាងអឺ-៤ (Chang'e 4) បានចូលទៅដល់គន្លងគោចរដែលគ្រោងទុក នៅជុំវិញឋានព្រះច័ន្ទដោយជោគជ័យ និងកំពុងត្រៀមខ្លួនសម្រាប់ការព្យាយាមចុះចតជាលើកដំបូងក្នុងប្រវត្តិសាស្រ្ត នៅលើតំបន់ចំហៀងម្ខាងទៀតរបស់ព្រះច័ន្ទ៕
៦៖ សារព័ត៌មានកូរ៉េខាងត្បូង Chosun Ilbo នៅថ្ងៃចន្ទនេះ បានរាយការណ៍ថាមេដឹកនាំកូរ៉េខាងជើង លោក គីម ជុងអ៊ុន បានផ្ញើលិខិតមួយច្បាប់ឱ្យប្រធានាធិបតីអាមេរិក លោក ដូណាល់ ត្រាំ ខណៈកិច្ចចរចារំសាយអាវុធនុយក្លេអ៊ែររវាងប្រទេសទាំងពីរ កំពុងជាប់គាំង៕
