(ភ្នំពេញ)៖ ដើម្បីគាំទ្រដល់ការលូតលាស់ផ្នែក អាជីវកម្មរបស់ក្រុមហ៊ុន និងការផ្លាស់ប្ដូរផ្នែកឌីជីថលឲ្យកាន់តែមាន ភាពងាយស្រួលក្រុមហ៊ុន NTT Communications (NTT Com) បានសហការរួមគ្នាជាមួយក្រុមហ៊ុន VMware រៀបចំកិច្ចប្រជុំតុមូលមួយរួមគ្នាពិភាក្សា អំពីការពន្លឿនការផ្លាស់ប្ដូរប្រព័ន្ធឌីជីថល ដល់សហគ្រាសនៅកម្ពុជា ដោយគ្រោងចែកចាយដំណោះស្រាយ Hybrid Cloud លំដាប់ពិភពលោក។

លោក Masato Tsuboi អនុប្រធានប្រតិបត្តិ NTT Com ប្រចាំប្រទេសថៃឲ្យដឹងថា «សហគ្រាសចាំបាច់ត្រូវធ្វើ ទំនើបកម្មលើប្រព័ន្ធ ICT របស់ខ្លួន ដោយពឹងផ្អែកលើបច្ចេកវិទ្យា​ Hybrid Cloud ​ព្រមទាំងបង្កើននូវសុវត្ថិភាព និងការទទួលផលលើការវិនិយោគ (ROI) ជាអតិបរមា ដើម្បីបំពេញតម្រូវការអាជីវកម្ម ប្រកបដោយភាពសមស្រប និងរហ័សរហួន»។

លោកបន្ថែមថា «ក្រុមហ៊ុននឹងខិតខំធ្វើយ៉ាងណា ឱ្យសហគ្រាសនានា ទទួលយកបណ្តាញបច្ចេកវិទ្យាចុងក្រោយ ដែលសហការយ៉ាងរលូនជាមួយប្រព័ន្ធបច្ចេកវិទ្យាព័ត៌មាន ដែលមានស្រាប់ ដោយពុំមានការផ្លាស់ប្តូរ ដល់ផ្នែកប្រតិបត្តការ និងគ្រប់គ្រងឡើយ ហើយ NTT Com បានរួមគ្នាជាមួយក្រុមហ៊ុន VMware ពិតជាអាចជួយសម្រួលដល់ដំណើរការ​ប្រើប្រាស់ Hybrid Cloud​ របស់​អតិថិជនបាន»។

លោក Daniel Choo អ្នកគ្រប់គ្រង VMware ឲ្យដឹងថា «សហគ្រាសចាំបាច់ត្រូវផ្លាស់ប្តូរខ្លួនដោយធ្វើទំនើបកម្ម លើបច្ចេកវិទ្យាព័ត៌មានដែលនឹងជួយសម្រួល ឱ្យពួកគាត់កែលម្អភាពបត់បែន និងបង្កើនភាពរហ័សរហួស ហើយអាចធ្វើឱ្យអាជីវកម្ម របស់ពួកគាត់កាន់តែលូតលាស់ផងដែរ»។

​លោកបន្តថា តាមរយៈកិច្ចប្រជុំតុមូលនេះ NTT និង VMware គ្រោង​ចែកចាយដំណោះស្រាយ Hybrid Cloud លំដាប់ពិភពលោក ហើយសហការគាំទ្រដល់អាជីវកម្មនៅកម្ពុជា ក្នុង​ដំណើរ​ផ្លាស់ប្តូផ្នែកឌីជីថលរបស់ខ្លួន។
ក្នុងវគ្គកិច្ចប្រជុំតុមូលនេះ NTT Com បានពិភាក្សាពីវិធីសាស្រ្ត Hybrid Cloud, ស្ថាបត្យកម្ម Cross-Cloud និងការធ្វើរប្រតិបត្តការ​អំពី Public និង Private Cloud។

លោកបន្ថែមថា ក្រុមហ៊ុនផ្សេងៗក៏បានពិភាក្សាពីវិធីរៀងៗខ្លួន ដែលអាចជួយសហគ្រាសក្នុងការផ្លាសប្តូរ និងពង្រីកផ្នែកឌីជីថលលើអាជីវកម្មរបស់ខ្លួន ហើយនៅថ្ងៃមុខ NTT Com គ្រោងរៀបចំកិច្ចប្រជុំតុមូលផ្សេងៗទៀត ដើម្បីចូលរួម​ការផ្លាស់ប្រែផ្នែកឌីជីថលនៅកម្ពុជា។

សូមជម្រាបថា NTT Communications មានការិយាល័យនៅក្នុងរាជធានីភ្នំពេញ បើកសម្ភោធក្នុងឆ្នាំ២០១០ ដោយផ្គត់ផ្គង់លើសេវាកម្មអ៊ិនធឺណេតល្បឿនលឿន និង​ការប្រឹក្សាយោបល់ចំពោះដំណោះស្រាយ លើបច្ចេកវិទ្យាព័ត៌មាន និងសារគមនាគមន៍(ICT) ដល់អតិថិជនជាសហគ្រាសតាមវិស័យនានា រួមទាំងវិស័យហិរញ្ញវត្ថុ និងឧស្សាហកម្មផលិតផងដែរ៕