(បាត់ដំបង)៖ រឿងរ៉ាវកម្លាំងយោធភូមិភាគទី៥ បានចាប់ត្រាក់ទ័រមួយគ្រឿង ដែលឆ្លងដែនមកពីប្រទេសថៃ តាមច្រករបៀងនោះ នៅតែបន្ដប្រទាញប្រទង់គ្នានៅឡើយ។ ភាគីដែលអះអាងថាជាម្ចាស់ត្រាក់ទ័រ នៅតែនិយាយថា ខ្លួនមានឯកសារផ្លូវច្បាប់គ្រប់គ្រាន់ ខណៈដែលយោធភូមិភាគទី៥ បញ្ជាក់ថា ប្រសិនបើមានឯកសារបង់ពន្ធគ្រប់គ្រាន់ ហេតុអីបាននាំចូលតាមច្រករបៀង។

លោក ឡាត់ ចំប៉ី តំណាងលោក ចាន់ យ៉ាត ដែលជាម្ចាស់ត្រាក់ទ័រត្រូវសមត្ថកិច្ចឃាត់ទុកនោះ បានប្រាប់អង្គភាព Fresh News នៅព្រឹកថ្ងៃទី២៨ ខែធ្នូ ឆ្នាំ២០១៨នេះថា ម្ចាស់ត្រាក់ទ័រដែលសមត្ថកិច្ចឃាត់ទុក ​កាលពីខែកញ្ញានោះ មាន​ឯកសារត្រឹមត្រូវដើម្បីសម្គាល់ថា ត្រាក់ទ័រនោះមិនមែនជារបស់ខុសច្បាប់នោះទេ ដោយរូបគេបានទិញពីប្រទេសថៃ ក្នុងតម្លៃ៥០ម៉ឺនបាត (ប្រហែលជាង១​៥,០០០ដុល្លារ) ហើយបានបង់ពន្ធគយ អស់៦៥០ដុល្លារបន្ថែមទៀត។

លោកបន្ថែមទៀតថា ខ្លួនមិនចង់បន្ដរឿងវែងឆ្ងាយនោះទេ ដោយខ្លួនគ្រាន់តែចង់ឲ្យមេបញ្ជាការយោធភូមិភាគទី៥ ដោះស្រាយបញ្ចប់រឿង ហើយប្រគល់ត្រាក់ទ័រមកវិញ ដោយហេតុថា រូបគេមានឯកសារបញ្ជាក់ត្រឹមត្រូវ ទាំងវិក្កិយបត្រទិញពីប្រទេសថៃ និងឯកសារបង់ពន្ធគយ​។

យ៉ាងណាក៏ដោយ យោធភូមិភាគទី៥ ​បានចេញមកបញ្ជាក់បន្ថែមថា ប្រសិនបើលោក ចាន់ យ៉ាត មានឯកសារគ្រប់គ្រាន់ដើម្បីសម្គាល់ត្រាក់ទ័រនេះ ចុះហេតុអ្វីបានជាទិញពីប្រទេសថៃ មិនចូលមកកម្ពុជាតាមច្រកអន្ដរជាតិ បែរជាចូលមកតាមច្រកបៀង។ ភាគីយោធភូមិភាគទី៥ បានដាក់ការសង្ស័យថា អាចមានបញ្ហា ទើបម្ចាស់ត្រាក់ទ័ររត់ការធ្វើឯកសារផ្លូវច្បាប់តាមក្រោយ។ មួយវិញទៀតករណីនេះ ត្រូវបានអ្នកនាំពាក្យយោធភូមិភាគទី៥ អះអាងថា តំណាងក្រុមហ៊ុនត្រាក់ទ័ររបស់ថៃ ក៏បានទាមទារយកត្រាក់ទ័រនេះ ត្រឡប់ទៅវិញដែរ ដោយបង្ហាញឯកសារផ្លូវច្បាប់ និងអះអាងថា ត្រាក់ទ័រនេះត្រូវបានពលរដ្ឋថៃទិញពីក្រុមហ៊ុនបង់រំលោះ មិនទាន់ឱ្យលុយគ្រប់ចំនួន ហើយត្រូវចោរលួចមិនដឹងមូលហេតុ។

សូមបញ្ជាក់ថា កាលពីល្ងាច​ថ្ងៃទី១៣ ខែកញ្ញា ឆ្នាំ២០១៨ កងការពារលេខ៥០៣ ចំណុះឱ្យយោធភូមិភាគទី៥ បានបំពេញបេសកកម្មដើរល្បាតបង្គោលព្រំដែន ក៏បានប្រទះឃើញត្រាក់ទ័រ១គ្រឿង ដែលសង្ស័យជារបស់ក្រុមរកស៊ីល្មើសព្រំដែន យកលាក់ទុកនៅចំណុចបង្គោលលេខ៣៧ ទល់មុខប៉ុស្តិ៍ច្រកចេញលេខ១៩ កងរយលេខ១២៤របស់ថៃ ព្រមទាំងបានយកមកទៅរក្សាទុកនៅយោធភូមិភាគទី៥ ជាបណ្តោះអាសន្ន៕