(ភ្នំពេញ)៖ យោងតាមសេចក្ដីរាយការណ៍ របស់ភ្នាក់ងារ Fresh News ប្រចាំខណ្ឌដង្កោ រាជធានីភ្នំពេញ បានបញ្ជាក់ឲ្យដឹងថា ការតវ៉ារបស់កម្មករក្រុមហ៊ុន ស៊ិនទ្រី រឿងផ្ទុះការតវ៉ា​សុំតម្លើងប្រាក់ខែ ត្រូវបានដោះស្រាយ បញ្ចប់ហើយ នារសៀលថ្ងៃទី២៧ ខែធ្នូ ឆ្នាំ២០១៨នេះ ក្រោយពីថៅកែក្រុមហ៊ុន សម្រេចតម្លើងបន្ថែមប្រាក់ខែ ឲ្យកម្មករ ក្នុង១នាក់៩ដុល្លារ ដោយការតម្លើងនេះ នឹងអនុវត្ដចាប់ពីខែកុម្ភៈ ឆ្នាំ២០១៩ តទៅ។

តាមសេចក្ដីរាយការណ៍ បានបន្ថែមទៀតថា ក្នុងជំនួបការដោះស្រាយបញ្ហាកម្មករ​ ស៊ិនទ្រី ធ្វើកូដកម្មនេះ ដោយមានវត្តមានចូលរួម ពីសំណាក់លោក​ ខៀវ​ សាវុធ​ អនុប្រធាននាយកដ្ឋានវិវាទការងារ នៃក្រសួងការងារ, លោក​ ហួត​ ហៃ​ អភិបាលរងរាជ​ធានីភ្នំពេញ​,​ ថៅកែក្រុមហ៊ុន, លោក​ កៅ​ សុខវ៉ាត​ សហជីពក​ម្មករនិយោជិកវិស័យទេសចរណ៍ នៃក្រុមហ៊ុន ស៊ិន ទ្រី​ និងមន្ត្រីពាក់ព័ន្ធមួយចំនួនទៀត។

តាមសេចក្ដីរាយការណ៍ របស់ភ្នាក់ងារ Fresh News បានបញ្ជាក់ទៀតថា ក្រោយពីដោះស្រាយបញ្ចប់ បញ្ហារឿងតម្លើងប្រាក់ខែនេះ ខណៈពេលនេះ រថយន្ដដឹកសំរាម របស់ក្រុមហ៊ុន ស៊ិនទ្រី ជាច្រើនគ្រឿង បាននឹងកំពុងចេញដំណើរការ ប្រមូលសំរាមនៅក្នុងរាជធានីភ្នំពេញ ដូចជាធម្មតាឡើងវិញ។

កាលពីព្រឹកមិញ ក្រោយមានបញ្ហានេះកើតឡើង អភិបាលរាជធានីភ្នំពេញ លោក ឃួង ស្រេង ម្ខាងបញ្ជាឲ្យអភិបាលខណ្ឌទាំង១២ បញ្ចេញកម្លាំងប្រជាការពារ ចុះប្រមូលសំរាមតាមដងផ្លូវជាបណ្ដោះអាសន្ន និងម្ខាងទៀតឲ្យជួបពិភាក្សាជាមួយភាគីពាក់ព័ន្ធ ដើម្បីរកដំណោះស្រាយបន្ដទៀត៕