(ភ្នំពេញ)៖ មន្រ្តីកាំកុងត្រូលផែស្ងួតចុងទីភ្នំពេញ​ បន្តចុះប្រចាំការចំនួន៦ផ្សារ រួមមាន៖ ផ្សារអូរឡាំពិក ផ្សារអូឬស្សី ផ្សារដើមគរ ផ្សារស្ទឹងមានជ័យ ផ្សារធំថ្មី និងផ្សារទួលទំពូង ដោយសហការជាមួយ មន្រ្តីពិសោធន៍ និងគណៈកម្មការផ្សារ បានចុះអង្កេត និងស្រាវជ្រាវទប់ស្កាត់ទំនិញខូចគុណ​ភាពមួយចំនួន ដែលធ្វើឲ្យប៉ះពាល់ដល់សុខភាពអ្នកប្រើប្រាស់​ នាថ្ងៃទី២៧ ខែធ្នូ ឆ្នាំ២០១៨នេះ។

មន្ត្រីជំនាញ បានធ្វើតេស្តបឋមទៅលើម្ហូបអាហារមួយចំនួន ដែលសង្ស័យមានហានិ​ភ័យខ្ពស់ ដើម្បីរកនៅសារធាតុគីមីហាមឃាត់ដូចជា៖ គ្រឿងសមុទ្រ គុយទាវតូច លត បាញ់​កាញ់ មីគ្រប់មុខ ទឹកខ្មេះគ្រប់ប្រភេទ ប្រហិតគ្រប់មុខ ជ្រក់គ្រប់មុខ សាច់ក្រក ត្រីងៀតគ្រប់មុខ និងត្រួតពិត្យទំនិញម្ហូបអាហារវេចខ្ចប់ស្រេច នៅតាមតូបលក់ទំនិញ ខូចគុណភាព គ្មានស្លាកសញ្ញា គ្មានកាលបរិច្ឆេទ សំបកវេចខ្ចប់មិនត្រឹមត្រូវ -ល-។

ការធ្វើបែបនេះ ដើម្បីពន្យល់ណែនាំ ផ្សព្វផ្សាយ អប់រំ អំពីសុវត្ថិចំណីអាហារ និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ដោយជាលទ្ធផល បានដកហូតចាហួយចិនម៉ាក HANLE ហួសកាលបរិច្ឆេទចំនួន០២ កញ្ចប់ ស្មើ១.៤គីឡូក្រាមរក្សាទុក ដើម្បីកំទេចចោលទៅតាមនិតិវិធី។

ជាមួយគ្នានោះ មន្ត្រីកាំកុងត្រូល ដែលប្រចាំការគោលដៅផ្សារនីមួយៗ​ ក៏បានអំពាវនាវដល់អាជីវករផ្សារ ក៏ដូចតាមហាងលក់ទំនិញ​ទាំង​អស់ អាចយកទំនិញរបស់ខ្លួនដែលសង្ស័យថា មានសារធាតុគីមី​ មកពិនិត្យដល់ទីតាំងគោលដៅ បានគ្រប់ពេលម៉ោងប្រចាំការ​។

ចំពោះកម្មភាពទាំងនេះ​ គឺអនុវត្តទៅតាមការ​ណែ​នាំ របស់លោកប្រធានប្រតិភូរាជ​រដ្ឋា​ភិបាល ទទួលបន្ទុកអគ្គនាយកដ្ឋានកាំកុងត្រូល និងលោកប្រធានកាំកុងត្រូលរាជធានីភ្នំពេញ៕